Read koho Đơs Crih 104 Bible Online

Đơs Crih 104 - koho bible

Đơs Crih 104

¹Ơ hwềng soàn añ jê, jòng ro tĕ Yàng Jehôwa! Ơ Jehôwa Yàng Tom Trồ añ jê, Kơnràñ la dờng ngan! Kơnràñ soh bơta gơklŏ mơ bơta ryŭ ryơm be ào.

²Yàng ai bơta àng gòm să tòm Kơnràñ ò gơkrơi be ào, Yàng lì ală tap trồ be dô nơm sàl.

³Yàng bơt mơnàng ală ơdŭ Kơnràñ dê hơđang ală dà, Kơnràñ ngui mhwal lơh gơs rơndeh Kơnràñ in, Mơ hào hơđang càl be pơnđar.

⁴Kơnràñ ngui càl lơh gơs cau kong sồr Kơnràñ dê, Ngui ồs mơ lơmpiat ồs lơh gơs cau duh broă Kơnràñ dê.

⁵Kơnràñ neh ơn plai ù hơđang ală mơnàng gơ dê, Nàng gơ ò gơs tŭ lơi lơnggơr.

⁶Yàng ai dàlềng gòm plai ù be dô nơm ào, Ală dà ngŏ hơđang ală mơnơm.

⁷Tòm tŭ Yàng lah pơrhơng gen dà gơ dô; Tòm tŭ kơno ntas ntơr kơnàs Yàng dê, gen gơ sơrbac sơrbang ntoat dô.

⁸Gơguh tus di ală mơnơm, mơ gơ mù tus di ală thòng, tus hơ tiah mơ Yàng neh lơh nền gơ in.

⁹Kơnràñ lơh nền nhàr dà in nàng dà ò geh lòt rlau, nàng gơ ò rgơi ngŏ tai hơđang ù.

¹⁰Kơnràñ lơh ală croh gơcat dà tòm thòng, Gơhòr digùl ală dòr.

¹¹Ai dà ală jơi phan poan jơng tòm ƀlàng in hùc; Ală alàng brê rài tơhìr tềng hơ̆.

¹²Sềm hơđang trồ rơp ơm di gah ală croh hơ̆, Gơ nrao digùl ală ntê chi.

¹³Bơh di tiah ơm hơđang Kơnràñ dê, Kơnràñ tuh dà hơđang ală mơnơm; Ù tiah geh bềng lìu plai đo bơh broă lơh Kơnràñ dê.

¹⁴Kơnràñ lơh ñhơt hòn phan poan jơng in, mơ ai chi che kòn mơnus in ngui, nàng gơs phan sa gơlik bơh ù.

¹⁵Mơ tơrnòm ño lơh nùs kòn mơnus in hòn chò, ai mơñà lơh muh mat hàng mơnĕ, Mơ gơs piang lă nàng bơtơl pràn kơldang kòn mơnus in.

¹⁶Ală chi Yàng Jehôwa dê geh tuh dà tơngkah tơngkañ, Hơ̆ la chi pơnàng tòm Liban mơ Kơnràñ neh tam.

¹⁷Hơđang ală chi hơ̆ ală sềm lơh rsòn gơ dê; Klàng kò lơh tiah ơm gơ dê tòm chi nho rề.

¹⁸Ală mơnơm jơnhoa la tiah ơm ală keh dê; Trồm lŭ la tiah kìng crŭ ală tơrpài dê.

¹⁹Kơnràñ neh lơh gơs mat kơnhai nàng sơnio kơnhai sơnam, Mattơngai gơ git tŭ gơñơp.

²⁰Kơnràñ lơh bơta klam jơngo hơ̆ la trồ mang, Tŭ hơ̆ jơh ală phan brê lik lòt.

²¹Ală klìu triă brồ dam ơhùm bơh sơmpài gơ dê, Jòi phan sa bơh Yàng Tom Trồ ai.

²²Mattơngai lik gen bol gơ dô rê, Bic tòm trồm gơ dê.

²³Tòm tŭ hơ̆ kòn mơnus lik lòt tus di tiah lơh broă bol khai dê, Mơ lơh broă jơl tus di mho.

²⁴Ơ Yàng Jehôwa, ală broă Kơnràñ dê la oă ngan ò git lơh! Kơnràñ neh lơh jơh ală bơta dô bă jak chài ngan; Plai ù bềng lìu ală phan kis mơ Kơnràñ neh crơng gơs.

²⁵Ngài đah ne la dàlềng dờng mơ ơnàng, Tềng hơ̆ gơs oă ngan phan wañ ò rgơi kòp, ală phan kis dềt mơ dờng.

²⁶Tềng hơ̆ gơs ală ơhò lòt rê, Kung gơs Lebiathan mơ Yàng neh mòn gơs nàng lòi kơnhơl tềng hơ̆.

²⁷Jơh ală jơi phan kis do sền tơnggòr di Yàng, Tồ Yàng ai phan sa bol gơ in jat tŭ jơ.

²⁸Tòm tŭ Yàng ai bol gơ in gen bol gơ dòp leng; Tòm tŭ Yàng pò tê gen bol gơ geh hòm bơh ală phan niam,

²⁹Tòm tŭ Yàng pồn mat gen bol gơdơrcul. Tòm tŭ Yàng tă tơlik nhơm bol gơ dê, gen bol gơ chơt, mơ rê wơl hơ kơmbuh ù.

³⁰Tòm tŭ Yàng sồr Yàng Hwềng Kơnràñ dê lik lòt, gen bol gơ geh crơng gơs; Yàng lơh ù tiah in gơlik gơs pa.

³¹Dan bơta gơklŏ Yàng Jehôwa dê gam sùm sùm, Dan Yàng Jehôwa gơs nùs chò hòp bơh ală broă Kơnràñ dê.

³²Kơnràñ sền di ù tiah gen gơlơnggơr, Kơnràñ ƀư di ală mơnơm gen ñhŭ gơguh.

³³Dilah añ kis jŏ kàr lơi, gen añ rơp đơs chò Yàng Jehôwa in kàr hơ̆; Dilah añ gam kàr lơi, gen añ rơp đơs chò jòng ro Yàng Tom Trồ añ jê kàr hơ̆ sơl.

³⁴Dan bơta kơlôi sơnơng añ jê geh niam nùs Kơnràñ, Bơh añ chò hòp tòm Yàng Jehôwa.

³⁵Lòi ală cau glài kong tơnroh bơh di ù, mơ cau iơh bơsak ò gam tai! Ơ hwềng soàn añ jê, jòng ro tĕ Yàng Jehôwa! Jòng ro Yàng Jehôwa!