Read koho Đơs Crih 106 Bible Online

Đơs Crih 106 - koho bible

Đơs Crih 106

¹Jòng ro Yàng Jehôwa! Pal ưnngài Yàng Jehôwa bơh Kơnràñ la niam; Bơta kòñ gơboh kơ̆ dơn Kơnràñ dê gam sùm sùm.

²Ñcau rgơi yal ală broă gơnap gơnoar Yàng Jehôwa dê, Hala bơto yal bơta jòng ro Kơnràñ dê dô bă wil tơl taih?

³Lơngai cau lơi in prap gàr bơta song ngan, Mơ lơh jat bơta song ring sùm sùm!

⁴Ơ Yàng Jehôwa, dan kah añ tòm tŭ Kơnràñ ai bơta nđàc làng bol Kơnràñ in; Dan dong kòl añ tòm tŭ Kơnràñ dong tă bol khai.

⁵Tồ añ in gŏ bơta bơtoah bơtoài cau sac rwah Kơnràñ dê, Hòn chò tòm bơta chò hòp làng bol Kơnràñ dê. Nàng añ jòng ro Yàng bal mơ sre brê Kơnràñ dê.

⁶Bol hi mơ ồng pàng bol hi neh tìs glài; Bol hi tìs tòm bơta tồi glài iơh bơsak mơ lơh bơta jàñ bơsak.

⁷Tòm tŭ ồng pàng bol hi dê ơm tòm lơgar Ejiptơ, bol khai ò git wă ală broă crih crài Kơnràñ dê, Bol khai ò kah bơta kòñ gơboh kơ̆ dơn tơngkah tơngkañ Kơnràñ dê, Mơya tòmdră mơ Bơtau Hơđang Rlau Jơh di gah Dàlềng Pơrhê.

⁸Bulah behơ̆, Kơnràñ dong klàs bol khai tài bơh sơnđan Kơnràñ dê, nàng ràng tơlik gơnap gơnoar dờng Kơnràñ dê.

⁹Kơnràñ lah pơrhơng Dàlềng Pơrhê, gen gơlik gơs rañ rsơh; Kơnràñ lam làng bol Israel lòt gan tòm tiah jrô dàlềng dê, kung be lòt gan ƀlàng bràs.

¹⁰Behơ̆ Kơnràñ dong klàs bol khai bơh di tê cau sòdră, Dong tă bol khai bơh di gơnoar cau sò tơm dê.

¹¹Dà bŭ jơh ală cau sò tơm bol khai dê, ò gam dô nă cau lơi.

¹²Gen bol khai dòn jơnau Kơnràñ dê, Mơ bol khai đơs chò jòng ro Kơnràñ.

¹³Mơya bol khai mhar ngan hŭi ală broă Kơnràñ dê, Ò kơp gơn bơta lơh nền Kơnràñ dê gơwèt mơ bol khai.

¹⁴Mơya bol khai gơs nùs hàm kòñ is jat poac să tòm ƀlàng ngềt ngơt, Mơ lòng Yàng Tom Trồ tòm ƀlàng bràs.

¹⁵Kơnràñ ai bol khai in bơta bol khai dan, Mơya sồr bơta kòp jê lơh iơh digùl bol khai.

¹⁶Tòm tŭ ơm tòm tiah bơtào sàl, bol khai ƀoah gơjrañ di Môise mơ Arôn, La cau sàng goh Yàng Jehôwa dê,

¹⁷Ù ha bơr mơ loan Dathan, mơ bồr cau tòm bơnòr Abiram dê.

¹⁸Kung gơs ồs tus sa tòm mpồl bol khai; Lơmpiat ồs chu pơrguc ală cau iơh bơsak.

¹⁹Bol khai lơh gơs dô nơm kơnrồ kòn tòm Hôrep, Duh khoai di đap rùp tŏ.

²⁰Bol khai tòmgơl bơta gơklŏ Yàng Tom Trồ dê, Mơ ai rùp kơnrồ sa ñhơt.

²¹Bol khai hŭi Yàng Tom Trồ la Bơtau dong klàs bol khai dê, La Bơtau neh lơh ală broă dờng tòm Ejiptơ,

²²Ală broă crih crài tòm lơgar Cam, Mơ ală bơta pal rngòt rngơt ngan di gah Dàlềng Pơrhê.

²³Gen tàng Kơnràñ đơs lah Kơnràñ rơp tơnroh bol khai. Mơya Môise, la cau Kơnràñ sac rwah, ntào di đap Kơnràñ ala bol khai, Mơ dan Kơnràñ wèt ngài bơta gơjrañ dờng Kơnràñ dê bơh bơta tơnroh bol khai.

²⁴Bol khai sền òsơp di lơgar hàng mơnĕ, Ò dòn jơnau ho pơgon Kơnràñ dê.

²⁵Bol khai yoam pơrhiat tòm sàl bol khai, Mơ ò dòn jat jơnau Yàng Jehôwa dê.

²⁶Tài behơ̆ Kơnràñ pò tê srat să mơ bol khai lah Añ rơp lơh bol khai in gơplơ̆ chơt tòm ƀlàng ngềt ngơt,

²⁷Lơh jơi bơtiàn bol khai dê gơprah gơpring digùl ală làng bol, Mơ lơh nrah nring bol khai tòm ală lơgar.

²⁸Gen bol khai kung duh rùp ràk Baal Pheô, Mơ sa phan duh khoai ơn pơdơng cau chơt in.

²⁹Behơ̆ bol khai bơrcek Yàng Jehôwa in gơjrañ bơh ală broă lơh bol khai dê, Mơ Kơnràñ tơndùh pluh plàng digùl bol khai.

³⁰Tòm tŭ hơ̆ Phinea ñă ntào lơh bơta cahrña, Gen pluh plàng dơh wơl.

³¹Bơh rài do tus rài ne gam sùm sùm, Broă hơ̆ khai geh kòp la song ring.

³²Bol khai lơh Kơnràñ in gơjrañ tòm dà Meriba, Gen tàng Môise kong Yàng lơh glài tài bơh bol khai,

³³Bơh bol khai lơh Môise in sơềt sơềl, Gen tàng khai đơs ò git kơrhia.

³⁴Bol khai ò tơnroh ală làng bol, Be Yàng Jehôwa neh sồr bol khai,

³⁵Mơya bol khai ơm bơcă bal mơ ală làng bol, Mơ bơtê lơh jat be làng bol hơ̆ lơh.

³⁶Bol khai duh broă rùp ràk ală làng bol hơ̆ dê, Mơ bơta hơ̆ lơh neh gơlik gơs be dă bol khai in.

³⁷Bol khai kup kòn klau kòn ùr bol khai dê Lơh gơs phan ơn duh khoai ală cà in.

³⁸Bol khai lơh gơhòr mhàm cau ò gơs glài, Hơ̆ la mhàm kòn klau kòn ùr bol khai dê Mơ bol khai lơh gơs phan ơn duh khoai rùp ràk lơgar Kanaan dê, Gen tàng lơgar gơlik ƀơ̆ ƀơl bơh mhàm hơ̆.

³⁹Behơ̆ bol khai lơh să tòm gơlik ƀơ̆ ƀơl bơh broă bol khai dê, Gơlik be cau dri tơlàr tòm bơta bol khai lơh.

⁴⁰Tài bơh hơ̆ bơta gơjrañ dờng Yàng Jehôwa dê gơhào khuh mơ làng bol Kơnràñ dê, Kơnràñ cù kìr di bol khai la sre brê Kơnràñ dê.

⁴¹Kơnràñ jào bol khai tòm tê cau làng bol bơdìh; Ală cau gơjrañ kơuềng di bol khai at bồ bol khai.

⁴²Ală cau sò tơm rồn bơklơn bol khai, Bol khai kong ơm hơđơm gơnoar bol hơ̆ dê.

⁴³Oă dơ̆ Yàng dong tă bol khai, Mơya bol khai tòmdră mơ Kơnràñ bơh bơta lơh nền bol khai dê, Mơ bol khai gơtơmù jrô tòm tồi glài iơh bơsak bol khai dê.

⁴⁴Bulah behơ̆, tòm tŭ Kơnràñ kơno jơnau hòi dan bol khai dê, Gen Kơnràñ wèt sền bol khai tòm bơta jê sồt bòl glar bol khai dê.

⁴⁵Bơh bol khai mơ Kơnràñ kah wơl bơta ho bal Kơnràñ dê, Mơ kòñ nđàc bol khai jat bơta kòñ gơboh kơ̆ dơn tơngkah tơngkañ Kơnràñ dê.

⁴⁶Kơnràñ kung lơh bol khai in geh bơta nđàc Di đap ală cau kup bol khai lơh gơs dĭ.

⁴⁷Ơ Jehôwa Yàng Tom Trồ bol he dê, dan dong klàs bol hi, Pơjum tơrgòm bol hi bơh digùl ală làng bol, Tồ bol hi in ưnngài sơnđan sàng goh Kơnràñ dê, Mơ hòn chò tòm bơta jòng ro Kơnràñ.

⁴⁸Jòng ro Jehôwa la Yàng Tom Trồ Israel dê jơl sùm sùm ò lồi! Mơ jơh làng bol đơs tĕ lah: “Amen!” Jòng ro Yàng Jehôwa!