Read koho Đơs Crih 107 Bible Online

Đơs Crih 107 - koho bible

Đơs Crih 107

¹Ưnngài tĕ Yàng Jehôwa, bơh Kơnràñ la niam; Bơta kòñ gơboh kơ̆ dơn Kơnràñ dê gam sùm sùm.

²Ală cau Yàng Jehôwa neh dong tơwài, đơs tĕ bơta hơ̆, Hơ̆ la ală cau Kơnràñ neh tơwài bơh di bơta bòl glar kalke,

³Mơ pơjum tơrgòm wơl bơh ală lơgar, Bơh đah mattơngai lik, đah mattơngai mut, bơh đah đang mơ đah đơm.

⁴Cau ƀà nrah nring tòm ƀlàng bràs ngềt ngơt, Ò jòi bàn gùng tus hơ ƀòn dờng nàng ơm.

⁵Bol khai kong jơgloh tơhìr, Hwềng soàn bol khai siar roh tòm bol khai.

⁶Gen tòm bơta gơlòng bòl glar bol khai hòi dan mơ Yàng Jehôwa, Kơnràñ dong tă bol khai lik bơh bơta jê sồt bòl glar bol khai dê.

⁷Kơnràñ lam bol khai lòt jat gùng song jơl tus ti tŭ tus hơ dô nơm ƀòn dờng nàng ơm.

⁸Lòi bol khai in ưnngài Yàng Jehôwa bơh bơta kòñ gơboh kơ̆ dơn Kơnràñ dê, Mơ bơh ală broă crih crài Kơnràñ lơh jơi kòn mơnus in!

⁹Bơh Kơnràñ lơh cau tơhìr in geh hừh hơh, Lơh cau jơgloh in geh bềng lìu phan bơkah.

¹⁰Cau ƀà ơm tòm bơta jơngo mơ mƀur klam cik, cau ơm jàm tòm bơta jê sồt bòl glar mơ tòm che sreng lòs.

¹¹Tài bơh bol khai neh tòmdră mơ jơnau Yàng Tom Trồ dê, Mơ sền òsơp bơta bơto tơngkah Bơtau Hơđang Rlau Jơh dê.

¹²Nùs bol khai neh gơpừ bơh lơh broă bòl glar; Bol khai gơcồt, ò gơs dô nă cau lơi dong kòl.

¹³Gen tòm bơta gơlòng bòl glar bol khai hòi dan mơ Yàng Jehôwa, mơ Kơnràñ dong tă bol khai lik bơh bơta jê sồt bòl glar bol khai dê.

¹⁴Kơnràñ tă tơlik bol khai klàs bơh bơta jơngo mơ mƀur klam cik, Kung dơrkă gơltac che sreng neh kơt bol khai.

¹⁵Lòi bol khai in ưnngài Yàng Jehôwa bơh bơta kòñ gơboh kơ̆ dơn Kơnràñ dê, Mơ bơh ală broă crih crài Kơnràñ lơh jơi kòn mơnus in!

¹⁶Bơh Kơnràñ lơh tơrlah mpồng mơ kòng, Mơ dơrkă bàr nơm gai lòs kal mpồng.

¹⁷Cau ƀà gơlik kòp jê tài bơh ală gùng dà tồi glài bol khai dê, Mơ kong jê sồt bòl glar tài bơh bơta tồi glài iơh bơsak bol khai dê.

¹⁸Bol khai cù kìr di ală phan sa, Bol khai tus rềp di mpồng bơta chơt.

¹⁹Gen tòm bơta gơlòng bòl glar bol khai hòi dan mơ Yàng Jehôwa, Kơnràñ dong tă bol khai lik bơh bơta jê sồt bòl glar bol khai dê.

²⁰Kơnràñ ai jơnau đơs Kơnràñ dê mơ sơmbòi bol khai, Mơ dong tă bol khai bơh bơta tơnroh.

²¹Lòi bol khai ưnngài Yàng Jehôwa bơh bơta kòñ gơboh kơ̆ dơn Kơnràñ dê, Mơ bơh ală broă crih crài Kơnràñ lơh jơi kòn mơnus in!

²²Lòi bol khai ơn phan duh khoai ưnngài Yàng, Mơ ai bơta đơs chò hòn chò tồ yal ală broă Kơnràñ dê!

²³Cau ƀà hào ơhò tòm dàlềng, Mơ lơh broă hơđang ală dà dờng;

²⁴Bol khai gŏ ală broă Yàng Jehôwa dê, Mơ sền ală bơta crih crài Kơnràñ dê tòm dà jrô.

²⁵Kơnràñ sồr, gen gơs càl rbut dờng, Hơ̆ la yò tơngguh ală ryà dàlềng.

²⁶Gơguh jơnhoa tus hơđang trồ, lồc behơ̆ mù tus tòm kơnàng dàlềng; Nùs khin cha bol khai dê roh thit bơh bơta bòl glar hơ̆.

²⁷Bol khai sơwing bồ mơ lòt gơsèng be cau bơñul ñô; Bơta jak chài bol khai dê roh jơh.

²⁸Gen tòm bơta gơlòng bòl glar bol khai hòi dan mơ Yàng Jehôwa, Kơnràñ dong tă bol khai lik bơh bơta jê sồt bòl glar bol khai dê.

²⁹Kơnràñ sồr càl rbut ơm mŏ mŏ, Mơ ală ryà dàlềng ơm ring.

³⁰Gen bol khai chò hòp bơh gơs bơta ring ngềt; Kơnràñ lam bol khai tus hơ rnơs bol khai kòñ.

³¹Lòi bol khai ưnngài Yàng Jehôwa bơh bơta kòñ gơboh kơ̆ dơn Kơnràñ dê, Mơ bơh ală broă crih crài Kơnràñ lơh jơi kòn mơnus in!

³²Lòi bol khai yò tơngguh Kơnràñ tòm mpồl jơnum làng bol dê, Mơ jòng ro Kơnràñ tòm tiah pơjum ală cau kwang kra.

³³Kơnràñ tòmgơl hiòng gơlik gơs ƀlàng bràs, Croh dà gơlik ù rañ rsơh,

³⁴Ù bơkah tiah lơngồt gơlik gơs ù ƀă, Tài bơh bơta iơh bơsak làng bol tềng hơ̆ dê.

³⁵Kơnràñ lơh ƀlàng bràs gơlik gơs tơnau dà, Ù rañ rsơh gơlik ală croh dà.

³⁶Kơnràñ lòi ală cau jơgloh in ơm tềng hơ̆; Bol khai bơt bơtào ƀòn dờng nàng ơm.

³⁷Bol khai sih gar tòm sre mơ tam chi ño, Sre mơ suơn ño tơnggơs plai đo.

³⁸Kơnràñ ai lơngai bol khai in tian gơs bol khai tơnggơs oă tai; Kơnràñ ò lòi phan poan jơng bol khai dê kòl roh gơhuc.

³⁹Tòm tŭ bol khai roh gơhuc mơ kong bòl glar Bơh bơta rồn bơklơn, bơta jê sồt bòl glar mơ bơta moat jrùng,

⁴⁰Gen Kơnràñ tuh bơta sền òsơp hơđang ală kwang bàng, Mơ lơh bol khai in lòt gơlềng gơlàng tòm tiah ngềt ngơt ò gơs gùng.

⁴¹Mơya Kơnràñ yò tơngguh cau siơ̆u siar bơh di bơta bòl glar, Lơh bol khai in gơtơnggơs oă be mpồl belàt.

⁴²Ală cau song ngan gŏ bơta hơ̆ mơ chò hòp, Ai jơh ală cau iơh bơsak pal mềm bơr.

⁴³Cau lơi jak chài gen kơlôi sơnơng tĕ di ală bơta hơ̆, Mơ kơlôi sơnơng bơh bơta kòñ gơboh kơ̆ dơn Yàng Jehôwa dê.