Read koho Đơs Crih 109 Bible Online

Đơs Crih 109 - koho bible

Đơs Crih 109

¹Sră Đơs Crih Dabit cih, ai cau lam bồ đơs chò in ngui Ơ Yàng Tom Trồ la Bơtau añ jòng ro, dan bañ ơm mŏ mŏ!

²Bơh cau iơh bơsak mơ cau blac pơrlồm pò bơr sòdră di añ; Bol khai ai lơmpiat blac chừt đơs tòmdră mơ añ.

³Bol khai ai jơnau gơjrañ kơuềng mơ sòdră di añ, Mơ brồ lơh añ ò bồ.

⁴Bol khai yă añ gơwèt mơ bơta kòñ gơboh añ jê, tian gơs tòm tŭ añ hòi dan bol khai in.

⁵Behơ̆ bol khai ai bơta iơh tơm bơta niam, Ai bơta gơjrañ kơuềng tơm bơta kòñ gơboh añ jê.

⁶Bol khai đơs lah: “Bơtào tĕ dô nă cau iơh bơsak tòmdră mơ khai, lòi tĕ cau tòmyă mơ khai ntào đah ma khai.

⁷Tòm tŭ khai kong cahrña, lòi khai kòl lơh nền glài, Mơ lòi jơnau hòi dan khai dê gơkòl kòp be gơs glài!

⁸Lòi ală ngai rài kis khai dê gơlik dô êt lơm,

⁹Lòi kòn sau khai dê gơlik kòn đòi, Mơ bau ùr khai dê gơlik ùr bơnrau!

¹⁰Lòi kòn sau khai dê lòt gơlềng gơlàng mơ kanadàn, Lòi bol khai kong bơtrơh bơh di hìu tơrlah bol khai ơm!

¹¹Lòi cau tòm dồs ai jơh ală phan khai gơs, Lòi cau crih mat tòmpìt kơñau cồng nha bơh tơngai broă bòl glar khai dê!

¹²Bañ gơs cau lơi kòñ nđàc di khai, Bañ gơs cau lơi nđàc sơngit di ală kòn đòi khai dê!

¹³Lòi jơi bơtiàn khai dê kòl tơnroh, Mơ sơnđan khai dê kòl jùt roh tòm rài tơnơ̆!

¹⁴Lòi bơta tồi glài iơh bơsak ồng pàng khai dê kòl kah wơl di đap Yàng Jehôwa, Lòi tồi glài mè khai dê ò tŭ lơi geh jùt sang!

¹⁵Lòi ală glài hơ̆ gam ơm sùm di đap Yàng Jehôwa, Mơ bơta kir yau khai dê kòl sang tơlik bơh di ù!

¹⁶Tài bơh khai ò kah yal tơlik bơta kòñ nđàc, Mơya khai ting jat cau dồn sa rƀah siơ̆u siar, Mơ cau gơs nùs jê sồt moat jrùng, jơl tus di tŭ bol khai chơt.

¹⁷Khai gơboh bơta srat rma, gen lòi tĕ bơta srat rma tus hơđang khai! Khai ò gơboh bơta lơngai lơngò, gen lòi tĕ bơta hơ̆ ơm ngài bơh khai!

¹⁸Khai soh bơta srat rma kung be soh ào; Lòi bơta srat rma mut be dà tòm să khai, be mơñà mut tòm ntìng khai dê!

¹⁹Lòi bơta srat rma gơlik be dô blah ào jơm să khai, Be dô nơm che but nàng kơt but khai kòp ngai!”

²⁰Dan Yàng Jehôwa sal wơl behơ̆ di ală cau yă añ. Mơ di ală cau đơs iơh sòdră di bơta kis añ jê.

²¹Mơya, ơ Yàng Jehôwa la Yàng Tom Trồ añ, Dan dong kòl añ bơh sơnđan Kơnràñ; Dan dong tă añ, tài bơh bơta kòñ gơboh kơ̆ dơn Kơnràñ dê la niam.

²²Bơh añ dồn sa rƀah siơ̆u siar, Nùs añ kong jê sồt tòm să añ.

²³Añ sang rài mhar kung be mƀur tòm trồ mho; Añ kong rtuh tơlik kung be srah kong cau pơs.

²⁴Gơltang añ lơbơn tài bơh añ ơt sa, Să jan añ gơlik rgai.

²⁵Ală cau yă añ bơtat bơtròh di añ; Tòm tŭ bol khai gŏ añ gen rơnggô bồ.

²⁶Ơ Yàng Jehôwa la Yàng Tom Trồ añ jê, dan dong kòl añ! Dan dong klàs añ jat bơta kòñ gơboh kơ̆ dơn Kơnràñ dê!

²⁷Lòi bol khai in git hơ̆ la tê Kơnràñ dê; Ơ Yàng Jehôwa, să tòm Kơnràñ neh lơh bơta hơ̆!

²⁸Lòi bol khai srat rma, mơya dan Kơnràñ ai lơngai! Lòi ală cau sòdră di añ kong ƀàssìl, Ai cau duh broă Kơnràñ dê chò hòp!

²⁹Lòi ală cau yă añ kong cau sền òsơp; Lòi bol khai ơm tòm bơta ƀàssìl kung be soh ào jrùh.

³⁰Bơr añ rơp jơh pràn ưnngài Yàng Jehôwa; Añ rơp jòng ro Kơnràñ digùl mpồl oă.

³¹Bơh Kơnràñ ntào đah ma cau siơ̆u siar, Nàng dong klàs khai bơh di cau lơh nền tơnchơt khai.