Read koho Đơs Crih 112 Bible Online

Đơs Crih 112 - koho bible

Đơs Crih 112

¹Jòng ro Yàng Jehôwa! Lơngai cau lơi in duh rngòt di Yàng Jehôwa, Mơ cau lơi gơboh oă ngan bơta sồr lam Kơnràñ dê!

²Kòn sau khai dê rơp geh pràn kơldang tòm lơgar, Jơi bơtiàn cau song ngan rơp geh lơngai lơngò.

³Bơta pas sơm ơm tòm hìu khai, Mơ bơta song ring bol khai dê gam sùm sùm.

⁴Bol khai pơnđàng tòm bơta jơngo be dô bơta àng cau song ngan in; Yàng Jehôwa ai bơta nđàc, gơs nùs nđàc sơngit mơ song ring.

⁵Lơngai cau lơi in gơs nùs sơrmah sơrmài mơ ai càn, Mơ lơh ală broă khai dê dô bă song ngan.

⁶Cau song ring ò gơs tŭ lơi wañ lơnggơh; Bol khai rơp geh cau kah wơl sùm sùm.

⁷Khai ò rngòt di jơnau yal bơh bơta iơh; Nùs khai ơm kơ̆ cê, geh lơngap lơngai tòm Yàng Jehôwa.

⁸Nùs khai ơm kơ̆, ò rngòt di bơta lơi, Tòm tŭ lồi dut bol khai rơp gŏ ală cau sò tơm di khai kong sal tê.

⁹Khai tòmpà dờng ơnàng, ai gòi cau rƀah lơòi in; Bơta song ring bol khai dê gam sùm sùm; Gơnoar pràn khai dê rơp geh yò tơngguh dô bă màng ryŭ.

¹⁰Cau iơh bơsak gŏ bơta hơ̆ gen gơhào gơjrañ; Khai rkiat sề mơ kòl roh thit; Bơta kơp kòñ cau iơh bơsak dê rơp gơlik ò kwơ.