Read koho Đơs Crih 118 Bible Online

Đơs Crih 118 - koho bible

Đơs Crih 118

¹Ưnngài tĕ Yàng Jehôwa, bơh Kơnràñ la niam; Bơta kòñ gơboh kơ̆ dơn Kơnràñ dê gam sùm sùm!

²Làng bol Israel đơs tĕ lah: “Bơta kòñ gơboh kơ̆ dơn Kơnràñ dê gam sùm sùm!”

³Hìu nhă Arôn đơs tĕ lah: “Bơta kòñ gơboh kơ̆ dơn Kơnràñ dê gam sùm sùm!”

⁴Ală cau duh rngòt di Yàng Jehôwa đơs tĕ lah: “Bơta kòñ gơboh kơ̆ dơn Kơnràñ dê gam sùm sùm!”

⁵Tòm ngai gơlòng bòl glar añ hòi dan mơ Yàng Jehôwa, Gen Yàng Jehôwa dòp jơnau añ mơ hồ toh añ.

⁶Yàng Jehôwa ơm đah mơ añ, añ ò rngòt; Ñchi kòn mơnus rgơi lơh di añ taih?

⁷Yàng Jehôwa ơm đah mơ añ nàng dong kòl añ; Añ rơp gŏ bơta pha lin rlau mơ cau gơjrañ kơuềng di añ.

⁸Kìng crŭ să he di Yàng Jehôwa La niam rlau mơ dòn kơnòm di kòn mơnus.

⁹Kìng crŭ să he di Yàng Jehôwa La niam rlau mơ dòn kơnòm di ală kwang bàng.

¹⁰Ală làng bol neh gơrwàng añ, Añ ai sơnđan Yàng Jehôwa mơ tơnroh bol khai.

¹¹Bol khai neh gơrwàng añ, neh gơrwàng gùt dar añ bơh kòp đah; Añ ai sơnđan Yàng Jehôwa mơ tơnroh bol khai.

¹²Bol khai neh gơrwàng añ be mpồl òng, Bol khai lơh kung be lơmpiat ồs sa lò; Añ ai sơnđan Yàng Jehôwa mơ tơnroh bol khai.

¹³Añ kòl tơlo pràn kơldang ngan, behơ̆ añ mòr gơtup pừ, Mơya Yàng Jehôwa dong kòl añ.

¹⁴Yàng Jehôwa la bơta pràn kơldang mơ la gơnoar pràn añ jê; Kơnràñ gơlik gơs bơta dong klàs añ jê.

¹⁵Tòm sàl cau song ring gơs bơta đơs chò hòn chò bơh geh pha lin rlau: “Tê ma Yàng Jehôwa dê neh lơh broă dô bă khin cha!

¹⁶Tê ma Yàng Jehôwa dê geh yò tơngguh hơđang, Tê ma Yàng Jehôwa dê neh lơh broă pràn kơldang!”

¹⁷Añ rơp ò chơt ò, mơya añ rơp kis, Mơ yal wơl ală broă Yàng Jehôwa dê.

¹⁸Yàng Jehôwa neh lơh glài tơmàl añ dô bă kràñ cê, Mơya ò lòi añ tus hơ bơta chơt.

¹⁹Pò tĕ añ in ală mpồng song ring, Tồ añ in rơp mut nàng ưnngài Yàng Jehôwa.

²⁰Do la mpồng Yàng Jehôwa dê; Ală cau song ring rơp mut tềng hơ̆.

²¹Añ ưnngài Yàng bơh Yàng neh ho jơnau añ, Mơ gơlik gơs bơta dong klàs añ jê.

²²Pơnai lŭ mơ ală cau bơt hìu neh sang tơlik, Lŭ hơ̆ neh gơlik gơs lŭ mum hìu.

²³Bơta hơ̆ la gơlik bơh Yàng Jehôwa, La dô bơta crih crài di mat bol hi.

²⁴Do la ngai Yàng Jehôwa lơh gơs, Bol he hòn chò tĕ mơ chò hòp tòm ngai hơ̆.

²⁵Ơ Yàng Jehôwa, bol hi rac dan mơ Kơnràñ, dan dong klàs bol hi! Ơ Yàng Jehôwa, bol hi rac dan mơ Kơnràñ, dan ai bol hi in geh bơtoah bơtoài.

²⁶Lơngai cau lơi in ai sơnđan Yàng Jehôwa mơ mut! Bơh di hìu Yàng Jehôwa bol hi ai lơngai mê in.

²⁷Jehôwa la Yàng Tom Trồ, Kơnràñ neh ai bơta àng bol hi in. Kơt tĕ phan ơn duh khoai bal mơ ntê chi, guh hơ ală ngke cơnòng duh khoai dê.

²⁸Yàng la Yàng Tom Trồ añ jê, añ rơp ưnngài Yàng; Yàng la Yàng Tom Trồ añ jê, añ rơp yò tơngguh Yàng hơđang.

²⁹Ưnngài tĕ Yàng Jehôwa, bơh Kơnràñ la niam; Bơta kòñ gơboh kơ̆ dơn Kơnràñ dê gam sùm sùm!