Read koho Đơs Crih 119 Bible Online

Đơs Crih 119 - koho bible

Đơs Crih 119

¹Lơngai ală cau in kis dô bă ò gơs tiah geh lah pơrhơng, Hơ̆ la cau lơh lòt jat bơta boh lam Yàng Jehôwa dê.

²Lơngai ală cau in prap gàr ală jơnau sồr kràñ cê Kơnràñ dê, Hơ̆ la cau jơh nùs jòi jat Kơnràñ.

³Bol khai kung ò lơh tìs, Mơya lòt tòm ală gùng dà Kơnràñ dê.

⁴Yàng neh sồr bol hi prap gàr Ală jơnau sồr Kơnràñ dê dô bă kràñ cê.

⁵Kơp kòñ añ lơh lòt dô bă nền cê Tòm bơta prap gàr ală jơnau sồr Kơnràñ dê.

⁶Gen añ rơp ò gơkòl ƀàssìl, Bơh añ sền song di ală bơta sồr lam Kơnràñ dê.

⁷Tòm tŭ añ bơtê git ală jơnau gơnoar sồr song ring Yàng dê, Gen añ rơp ai nùs song ngan mơ jòng ro Kơnràñ.

⁸Añ rơp prap gàr ală jơnau sồr Kơnràñ dê; Ơ Yàng, dan bañ sang lòi añ.

⁹Mbe cau kơnòm să rgơi lơh lòt sùm tòm bơta sàng goh taih? Pal kơrhia lơh lòt jat jơnau Yàng dê.

¹⁰Añ jơh nùs jòi jat Yàng; Dan Yàng bañ lòi añ tìs nrah ngài bơh ală bơta sồr lam Kơnràñ dê.

¹¹Añ neh prap jơnau Yàng tòm nùs añ, Nàng añ ò tìs glài tòmdră mơ Yàng.

¹²Ơ Yàng Jehôwa, añ jòng ro Kơnràñ; Dan Yàng bơto añ ală jơnau gơnoar sồr Kơnràñ dê.

¹³Añ ai sơndồi añ yal loh jơh ală jơnau gơnoar sồr Yàng neh tơlik.

¹⁴Tòm tŭ añ lơh lòt jat ală jơnau sồr kràñ cê Kơnràñ dê, Gen añ hừh nùs kung be cau pas sơm.

¹⁵Añ rơp kơlôi sơnơng bơh ală jơnau sồr Yàng dê, Mơ sền song di ală gùng dà Kơnràñ dê.

¹⁶Añ rơp hừh nùs tòm ală jơnau sồr Yàng dê; Añ rơp ò hŭi jơnau Kơnràñ dê.

¹⁷Dan Yàng ai lơngai tơngkah tơngkañ añ in, La cau duh broă Yàng, tồ añ in geh kis mơ lơh jat jơnau Kơnràñ dê.

¹⁸Dan Yàng pò mat añ, Nàng añ in sền gŏ ală bơta crih crài tòm bơta boh lam Kơnràñ dê.

¹⁹Añ la cau ơm ing tòm dunnia, Dan Yàng bañ pồn ndơp bơh di añ ală bơta sồr lam Kơnràñ dê.

²⁰Hwềng soàn añ kơp kòñ sùm ò git lơh Bơh ală jơnau gơnoar sồr Kơnràñ dê.

²¹Yàng lah pơrhơng cau pơnhừ să, la cau pal srat rma, La cau tìs nrah ngài bơh di ală bơta sồr lam Kơnràñ dê.

²²Dan tă tơlik bơh di añ bơta bơtat bơtròh mơ bơta sền òsơp bol khai dê, Bơh añ neh prap gàr ală jơnau sồr kràñ cê Kơnràñ dê.

²³Bulah ală kwang bàng nggui bơyai sòdră di añ, Mơya cau duh broă Kơnràñ dê rơp kơlôi sơnơng di ală jơnau sồr Yàng dê.

²⁴Añ hừh nùs bơh ală jơnau sồr kràñ cê Yàng dê, Ală jơnau hơ̆ kung be ală cau gơnoar bơyai broă añ jê.

²⁵Hwềng soàn añ gơtơmù tòm kơmbuh ù; Dan lơh añ in kis wơl jat be jơnau Yàng dê.

²⁶Tòm tŭ añ yal tơlik bơh ală gùng dà añ jê, Gen Yàng dòp jơnau añ; dan bơto añ in ală jơnau sồr Kơnràñ dê.

²⁷Dan lơh añ in git wă gùng dà jơnau sồr Kơnràñ dê, Gen añ rơp kơlôi sơnơng bơh ală broă crih crài Yàng dê.

²⁸Hwềng soàn añ ñìm rac bơh moat jrùng, Dan lơh añ in gơs pràn jat be jơnau Yàng dê.

²⁹Dan sang ngài bơh di añ ală gùng dà blac chừt, Dan nđàc mơ bơto añ in git bơta boh lam Kơnràñ dê.

³⁰Añ neh sac rwah gùng dà bơta dòn song dê, Añ ơn jơnau gơnoar sồr Kơnràñ dê di đap añ.

³¹Ơ Yàng Jehôwa, añ kòñ gơboh đềt mềr di ală jơnau sồr kràñ cê Yàng dê; Dan bañ lòi añ kòl ƀàssìl.

³²Tòm tŭ Yàng pò ơnàng bơta git wă añ jê, Gen añ rơp ntoat jat gùng dà bơta sồr lam Kơnràñ dê.

³³Ơ Yàng Jehôwa, dan bơto añ in gùng dà ală jơnau sồr Yàng dê, Gen añ rơp prap gàr jơl tus lồi dut.

³⁴Dan ai añ in bơta git wă, Nàng añ prap gàr bơta boh lam Yàng dê mơ jơh nùs lơh jat bơta hơ̆.

³⁵Dan lam añ lòt tòm gùng bơta sồr lam Yàng dê, Bơh añ hừh nùs jat gùng hơ̆.

³⁶Dan lơh nùs añ in wèt hơ ală jơnau sồr kràñ cê Yàng dê; Bañ lòi añ wèt hơ bơta hàm hà.

³⁷Dan pơrlac mat añ klàs sền phan roh lơm; Dan ai añ in geh kis tòm ală gùng dà Kơnràñ dê.

³⁸Dan Yàng lơh kơ̆ nền jơnau ho pơgon Yàng dê mơ cau duh broă Kơnràñ dê, Hơ̆ la jơnau ai cau duh rngòt di Kơnràñ.

³⁹Dan tă sang bơta bơtat bơtròh mơ añ rngòt rngơt, Bơh ală jơnau gơnoar sồr Yàng dê la niam lơm.

⁴⁰Ne, añ kơp kòñ ngan ală jơnau sồr Yàng dê; Dan ai añ in kis tòm bơta song ring Kơnràñ dê.

⁴¹Ơ Yàng Jehôwa, dan ai bơta kòñ gơboh kơ̆ dơn Kơnràñ dê tus mơ añ, Hơ̆ la bơta dong klàs jat jơnau ho pơgon Kơnràñ dê,

⁴²Gen añ rơp gơs jơnau ho wơl mơ cau dơñŏ tơnhial di añ, Bơh añ dòn kơnòm di jơnau Yàng.

⁴³Dan bañ tă jơnau song ngan bơh di bơr añ, Bơh añ gơn kơnòm di ală jơnau gơnoar sồr Kơnràñ dê.

⁴⁴Añ rơp prap gàr bơta boh lam Yàng dê sùm sùm ò lồi.

⁴⁵Añ rơp cơnđòa lòt khat gơboh, Bơh añ neh jòi jat ală jơnau sồr Yàng dê.

⁴⁶Añ kung rơp đơs bơh ală jơnau sồr kràñ cê Kơnràñ dê di đap ală cau bơtau, Mơ rơp ò kòl ƀàssìl dô êt lơi,

⁴⁷Bơh añ hừh nùs tòm bơta sồr lam Yàng dê, La bơta añ kòñ gơboh.

⁴⁸Añ ki ngàm ală bơta sồr lam Yàng dê mơ añ kòñ gơboh, Mơ añ rơp kơlôi sơnơng bơh ală jơnau sồr Kơnràñ dê.

⁴⁹Dan Yàng kah wơl jơnau Kơnràñ đơs mơ cau duh broă Yàng dê, Bơh Yàng neh ai añ in gơn kơnòm di jơnau hơ̆.

⁵⁰Jơnau ho pơgon Yàng dê ai añ in kis, Hơ̆ la jơnau pơndòm pơniang añ tòm tŭ gơlòng bòl glar.

⁵¹Cau pơnhừ să ò pơlai jơnau dơñŏ tơnhial añ, Mơya añ ò pơrlac ngài bơh bơta boh lam Yàng dê.

⁵²Ơ Yàng Jehôwa, tòm tŭ añ kơlôi sơnơng bơh ală jơnau gơnoar sồr Kơnràñ dê bơh yau òr, Gen añ geh pơndòm pơniang.

⁵³Añ gơjrañ ngan tài bơh cau iơh bơsak sang lòi bơta boh lam Yàng dê.

⁵⁴Ală jơnau sồr Yàng dê neh gơlik gơs bơta đơs chò añ jê tòm hìu ơm ing añ jê.

⁵⁵Ơ Yàng Jehôwa, tòm trồ mang añ kah wơl sơnđan Kơnràñ dê, Kung prap gàr bơta boh lam Kơnràñ dê.

⁵⁶Bơta lơngai lơngò do neh tus hơ añ, Hơ̆ la añ neh prap gàr ală jơnau sồr Yàng dê.

⁵⁷Yàng Jehôwa la sre brê añ jê; Añ ho rơp prap gàr jơnau Kơnràñ dê.

⁵⁸Añ jơh nùs hòi dan bơta nđàc Yàng dê, Dan nđàc di añ jat be jơnau ho pơgon Kơnràñ dê,

⁵⁹Tòm tŭ añ kơlôi sơnơng bơh ală gùng dà Yàng dê, Gen añ cơnđòa lòt jat jơnau sồr kràñ cê Kơnràñ dê.

⁶⁰Añ sơrbac sơrbang prap gàr ală bơta sồr lam Yàng dê, Ò lơh òbat nyà.

⁶¹Bulah che cau iơh bơsak neh pơt dă añ, Mơya añ ò hŭi bơta boh lam Yàng dê.

⁶²Tài bơh ală jơnau gơnoar sồr song ring Yàng dê, Añ guh tòm gùl mơnang nàng jòng ro Yàng.

⁶³Añ lơh bơyô mơ jơh ală cau duh rngòt di Yàng, La cau prap gàr ală jơnau sồr Kơnràñ dê.

⁶⁴Ơ Yàng Jehôwa, plai ù geh bềng lìu bơta kòñ gơboh kơ̆ dơn Yàng dê; Dan bơto añ in ală jơnau sồr Kơnràñ dê.

⁶⁵Ơ Yàng Jehôwa, Kơnràñ neh gơwèt niam hơ cau duh broă Yàng dê, Jat be jơnau Kơnràñ dê.

⁶⁶Dan bơto añ in bơta cahrña song mơ bơta git wă, Bơh añ dòn ală bơta sồr lam Yàng dê.

⁶⁷Lài mơ tŭ añ pơndêt să, añ neh lòt tìs nrah; mơya tŭ do añ prap gàr jơnau Kơnràñ dê.

⁶⁸Yàng la niam mơ lơh bơta niam; Dan bơto añ in ală jơnau sồr Yàng dê.

⁶⁹Cau pơnhừ să ai jơnau đơs blac lơh iơh di añ, Mơya añ jơh nùs prap gàr jơnau sồr Kơnràñ dê.

⁷⁰Nùs bol khai dê lơmă mơ ală alai, Ai añ gen hừh nùs tòm bơta boh lam Yàng dê.

⁷¹Hơ̆ la niam añ in bơh añ neh pìn pơndêt să, tồ añ in rgơi bơtê jơnau sồr Yàng dê.

⁷²Bơta boh lam bơh bơr Yàng đơs La kwơ màng añ in rlau mơ rbô rhiang màh priă.

⁷³Mpàng tê Yàng neh crơng gơs añ mơ mòn rùp să añ; Dan Yàng ai añ in bơta git wă, nàng añ bơtê bơta sồr lam Kơnràñ dê.

⁷⁴Ală cau duh rngòt di Yàng rơp gŏ añ mơ hòn chò, Tài bơh añ gơn kơnòm di jơnau Kơnràñ dê.

⁷⁵Ơ Yàng Jehôwa, añ git bơta cahrña Kơnràñ dê la song ring, Mơ hơ̆ la bơh bơta dòn song mơ Kơnràñ lòi añ in kong tơnliah să.

⁷⁶Dan bơta kòñ gơboh kơ̆ dơn Yàng dê pơndòm pơniang añ, Jat be Yàng neh ho pơgon mơ cau duh broă Kơnràñ dê.

⁷⁷Dan bơta kòñ nđàc Yàng dê tus mơ añ, nàng añ in geh kis; Bơh bơta boh lam Kơnràñ dê lơh añ in hừh nùs.

⁷⁸Lòi cau pơnhừ să in kòl ƀàssìl, Tài bơh bol khai ngui bơta blac chừt mơ lơh iơh di añ, Ai añ gen rơp kơlôi sơnơng bơh ală jơnau sồr Kơnràñ dê.

⁷⁹Lòi ală cau duh rngòt di Yàng tus hơ añ, Nàng bol khai rgơi git ală jơnau sồr kràñ cê Kơnràñ dê.

⁸⁰Lòi añ in gơs nùs ò gơs tiah geh lah pơrhơng gơwèt hơ ală jơnau sồr Yàng dê, Tồ añ in ò kòl ƀàssìl.

⁸¹Hwềng soàn añ kơp kòñ ngan bơta dong klàs Yàng dê; Añ gơn kơnòm di jơnau Kơnràñ dê.

⁸²Mat añ siar roh bơh kơp gơn jơnau ho pơgon Yàng dê; Añ lùp lah: “Tŭ lơi Yàng rơp pơndòm pơniang añ taih?”

⁸³Bơh añ neh gơlik gơs be nhồng gơltau pơr hơđang ñhŭ ồs, Mơya añ ò hŭi jơnau sồr Yàng dê.

⁸⁴Nđò jŏ cau duh broă Yàng dê pal kong taih? Tŭ lơi Yàng rơp cahrña di ală cau kup kơryan añ taih?

⁸⁵Cau pơnhừ să neh tò trồm lơh añ in dùh, Hơ̆ la cau ò lơh jat bơta boh lam Yàng dê.

⁸⁶Jơh ală bơta sồr lam Yàng dê la kơ̆ cê; Cau ngui bơta blac pơrlồm kup kơryan añ; dan Yàng dong kòl añ!

⁸⁷Bol khai mòr tơnroh añ bơh di ù, Mơya añ ò sang lòi jơnau sồr Yàng dê.

⁸⁸Dan sền gàr bơta kis añ jê jat bơta kòñ gơboh kơ̆ dơn Yàng dê, Nàng añ in rgơi prap gàr jơnau sồr kràñ cê Yàng dê.

⁸⁹Ơ Yàng Jehôwa, jơnau Kơnràñ dê geh bơtào kơ̆ cê sùm sùm hơđang trồ.

⁹⁰Bơta dòn song Yàng dê gam sùm bơh rài do tus rài ne; Kơnràñ neh bơtào plai ù, mơ gơ gam ơm kơ̆ nền.

⁹¹Jat be bơta lơh nền Yàng dê, ală bơta hơ̆ gam ơm kơ̆ tus di ngai do, Bơh jơh ală phan duh broă Kơnràñ in.

⁹²Dilah bơta boh lam Yàng ò lơh añ in hừh nùs, Gen añ neh gơkòl roh rui tòm bơta gơlòng bòl glar rau.

⁹³Añ rơp ò tŭ lơi hŭi jơnau sồr Yàng dê, Bơh kơnòm di jơnau hơ̆ mơ Yàng ai añ in kis.

⁹⁴Añ gơrê mơ Yàng, dan dong klàs añ, Bơh añ jòi jat ală jơnau sồr Yàng dê.

⁹⁵Ală cau iơh bơsak kơp mòc tơnchơt añ, Mơya añ kơlôi sơnơng bơh ală jơnau sồr kràñ cê Yàng dê,

⁹⁶Añ neh gŏ nhàr bơta wil tơl dê, Mơya bơta boh lam Yàng dê la dờng ơnàng ò git nđò.

⁹⁷Añ kòñ gơboh bơta boh lam Yàng dê ò git lơh! Jơh ngai mho añ kơlôi sơnơng bơh bơta boh lam hơ̆.

⁹⁸Bơta sồr lam Yàng dê lơh añ in gơs jak chài rlau mơ cau sò tơm di añ, Bơh bơta hơ̆ òs ơm sùm mơ añ.

⁹⁹Añ gơs bơta git wă rlau mơ jơh ală cau bơto añ jê, Bơh añ kơlôi sơnơng bơh ală jơnau sồr kràñ cê Yàng dê.

¹⁰⁰Añ git wă rlau mơ cau kra, Bơh añ prap gàr jơnau sồr Yàng dê.

¹⁰¹Añ kơrmap gàr jơng añ klàs di kòp nơm gùng dà iơh bơsak, Nàng prap gàr jơnau Yàng dê.

¹⁰²Añ ò pơrlac sang jơnau gơnoar sồr Yàng dê, Bơh Kơnràñ neh bơto añ.

¹⁰³Jơnau Yàng dê la bơkah lơngồt añ in ò git nđò, Ngan lơngồt rlau mơ dà lơwe tòm bơr añ jê!

¹⁰⁴Kơnòm di jơnau sồr Yàng dê añ geh bơta git wă; Tài bơh añ gơjrañ kơuềng di kòp nơm gùng dà ma blac.

¹⁰⁵Jơnau Yàng la ồs đèng jơng añ in, La bơta àng gùng dà añ jê,

¹⁰⁶Añ neh srat să mơ lơh nền prap gàr Jơnau gơnoar sồr song ring Yàng dê.

¹⁰⁷Añ kong bơta gơlòng bòl glar oă ir; ơ Yàng Jehôwa. Dan ai añ in kis jat be jơnau Kơnràñ dê.

¹⁰⁸Ơ Yàng Jehôwa, dan dòp phan ơn duh khoai la bơta jòng ro añ jê, Mơ bơto añ in ală jơnau gơnoar sồr Kơnràñ dê.

¹⁰⁹Rài kis añ gơtìp sùm bơta sơbơng roh, Mơya añ ò hŭi bơta boh lam Yàng dê.

¹¹⁰Ală cau iơh bơsak pơt dă di añ, Mơya añ ò tìs nrah bơh jơnau sồr Yàng dê.

¹¹¹Jơnau sồr kràñ cê Yàng dê la sre brê añ jê gam sùm sùm; Ngan, jơnau hơ̆ lơh nùs añ in hòn chò.

¹¹²Añ ai nùs lơh jat jơnau sồr Yàng dê sùm sùm, jơl tus di lồi dut.

¹¹³Añ gơjrañ kơuềng di cau gơs bàr đah nùs, Mơya añ kòñ gơboh di bơta boh lam Yàng dê.

¹¹⁴Kơnràñ la tiah añ kìng crŭ pồn să mơ be la khèl đo añ jê; Añ gơn kơnòm di jơnau Yàng dê.

¹¹⁵Ơ ală cau lơh iơh bơsak, lòt ngài tĕ bơh di añ, Nàng añ in prap gàr bơta sồr lam Yàng Tom Trồ añ jê,

¹¹⁶Dan Yàng yò đo añ jat be jơnau ho pơgon Kơnràñ dê, tồ añ in kis; Bañ lòi añ kòl ƀàssìl tòm bơta gơn kơnòm añ jê.

¹¹⁷Dan yò đo añ, nàng añ rgơi ơm lơngap lơngai, Mơ ơn nùs kơlôi sơnơng sùm bơh ală jơnau sồr Yàng dê.

¹¹⁸Yàng sang lòi jơh ală cau lòt tìs nrah bơh jơnau sồr Yàng dê; Ngan, bơta lac lèo bol khai dê la ò kwơ.

¹¹⁹Jơh ală cau iơh bơsak tòm plai ù Yàng kòp bol khai be phan sang gòi; Tài behơ̆ añ kòñ gơboh di ală jơnau sồr kràñ cê Kơnràñ dê.

¹²⁰Poac să añ rơm rngòt di Yàng, Kung rngòt di bơta cahrña Yàng dê sơl.

¹²¹Añ neh lơh bơta song ngan mơ song ring; Dan bañ jào phi añ di cau rồn bơklơn añ.

¹²²Dan Yàng ai cau duh broă Kơnràñ in jơnau ho nền nàng geh pơndòm pơniang; Bañ lòi cau ò gơs bơta dòn duh rồn bơklơn añ.

¹²³Mat añ lơgah bơh kơp gơn bơta dong klàs Kơnràñ dê, Mơ bơta gơlik gơs di ngan jơnau ho pơgon song ring Kơnràñ dê.

¹²⁴Dan Yàng gơwèt mơ cau duh broă Kơnràñ dê jat bơta kòñ gơboh kơ̆ dơn Yàng dê, Mơ bơto añ ală jơnau sồr Yàng dê.

¹²⁵Añ la cau duh broă Yàng dê; dan ai añ in bơta git wă, Nàng añ in rgơi git ală jơnau sồr kràñ cê Kơnràñ dê.

¹²⁶Do la tŭ Yàng Jehôwa in lơh broă, Bơh cau neh tìs bơta boh lam Kơnràñ dê.

¹²⁷Tài bơh hơ̆ añ kòñ gơboh di bơta sồr lam Yàng dê rlau mơ màh, Rlau mơ màh ngan.

¹²⁸Ngan, añ lòt jat jơh ală jơnau sồr Yàng dê; Añ gơjrañ kơuềng di kòp nơm gùng dà ma blac.

¹²⁹Ală jơnau sồr kràñ cê Yàng dê la crih crài ngan, Gen tàng hwềng soàn añ prap gàr ală jơnau hơ̆.

¹³⁰Tòm tŭ bơto sồr jơnau Yàng dê gen gơ pơnđàng sòl, Gơ ai bơta git wă cau ò hoan git in.

¹³¹Nùs añ hur har ngan, Tài bơh añ kơp kòñ di ală bơta sồr lam Yàng dê.

¹³²Dan Yàng wèt mat mơ añ mơ nđàc di añ, Jat be Yàng òs lơh gơwèt mơ ală cau kòñ gơboh di sơnđan Yàng.

¹³³Dan sền gàr kơ̆ nền gùng dà añ, jat jơnau ho pơgon Kơnràñ dê; Bañ lòi bơta tồi glài iơh bơsak lơi at bồ añ.

¹³⁴Dan tơwài añ klàs di bơta rồn bơklơn kòn mơnus dê, Nàng añ rgơi prap gàr ală jơnau sồr Kơnràñ dê.

¹³⁵Dan Yàng niam nùs wèt sền cau duh broă Yàng dê, Mơ bơto añ ală jơnau sồr Kơnràñ dê.

¹³⁶Añ hòr dà mat oă ngan, Tài bơh kòn mơnus ò bài prap gàr bơta boh lam Yàng dê.

¹³⁷Ơ Yàng Jehôwa, Kơnràñ la song ring, Bơta cahrña Kơnràñ dê la song ngan.

¹³⁸Yàng ai bơta song ring mơ bơta dòn song, Mơ lơh nền jơnau sồr kràñ cê Kơnràñ dê.

¹³⁹Bơta ngac ngar sa roh añ, Tài bơh cau sò tơm añ hŭi jơnau Kơnràñ dê.

¹⁴⁰Jơnau ho pơgon Yàng dê niam ngan, mơ cau duh broă Yàng dê kòñ gơboh di jơnau hơ̆.

¹⁴¹Añ dềt rhền, kòl sền òsơp, Mơya ò hŭi ală jơnau sồr Yàng dê.

¹⁴²Bơta song ring Yàng dê la song ring gam sùm sùm; Bơta boh lam Yàng dê la song ngan.

¹⁴³Bơta bòl glar mơ bơta jê sồt tus di añ, Mơya añ hừh nùs bơh bơta sồr lam Yàng dê.

¹⁴⁴Ală jơnau sồr kràñ cê Yàng dê la song ring gam sùm sùm; Dan ai añ in bơta git wă, nàng añ rgơi kis.

¹⁴⁵Añ jơh nùs hòi dan mơ Kơnràñ; ơ Yàng Jehôwa, dan ho wơl añ in! Añ rơp prap gàr jơnau sồr Kơnràñ dê.

¹⁴⁶Añ hòi dan mơ Yàng; dan dong klàs añ, Nàng añ rgơi prap gàr ală jơnau sồr kràñ cê Kơnràñ dê.

¹⁴⁷Añ guh lài mơ tŭ rìng àng nàng hòi dan Yàng dong kòl añ; Añ gơn kơnòm di jơnau Yàng dê.

¹⁴⁸Mat añ kah rngal lài mơ tŭ tus jơ drơng mang, Nàng añ rgơi kơlôi sơnơng bơh jơnau ho pơgon Kơnràñ dê.

¹⁴⁹Jat bơta kòñ gơboh kơ̆ dơn Kơnràñ dê, dan iat jơnau añ; ơ Yàng Jehôwa, Dan sền gàr bơta kis añ jê jat bơta song ring Kơnràñ dê.

¹⁵⁰Ală cau bơyai bơta lơh iơh ting jat rềp nàng kup kơryan añ; Bol khai ơm ngài mơ bơta boh lam Yàng dê.

¹⁵¹Mơya, ơ Yàng Jehôwa, Kơnràñ ơm rềp mơ añ, Mơ jơh ală bơta sồr lam Kơnràñ dê la song ngan.

¹⁵²Jat ală jơnau sồr kràñ cê Yàng dê, Bơh yau òr añ neh git lah Kơnràñ neh bơtào ală jơnau hơ̆ gam sùm sùm.

¹⁵³Dan sền bơta gơlòng bòl glar añ jê mơ dong tă añ, Bơh añ ò hŭi bơta boh lam Yàng dê.

¹⁵⁴Dan tò să añ mơ tơwài añ; Dan ai añ in bơta kis jat jơnau ho pơgon Kơnràñ dê.

¹⁵⁵Bơta dong klàs ơm ngài ngan di cau iơh bơsak, bơh bol khai ò jòi jat ală jơnau sồr Yàng dê.

¹⁵⁶Ơ Yàng Jehôwa, bơta kòñ nđàc Yàng dê la dờng ngan; Dan ai añ in kis jat bơta song ring Kơnràñ dê.

¹⁵⁷Cau kup kơryan mơ cau sò tơm di añ la oă ngan, Mơya añ ò pơrlac sang jơnau sồr kràñ cê Yàng dê ò.

¹⁵⁸Añ sền di cau ò dòn, mơ cù kìr di bol khai, Tài bơh bol khai ò prap gàr bơta sồr lam Yàng dê.

¹⁵⁹Dan sền sơwì añ kòñ gơboh di jơnau sồr Yàng dê ò git nđò! Dan sền gàr bơta kis añ jê jat bơta kòñ gơboh kơ̆ dơn Kơnràñ dê!

¹⁶⁰Jơh ală jơnau Yàng dê la song ngan; Kòp jơnau gơnoar sồr song ring Kơnràñ dê gam sùm sùm.

¹⁶¹Ală kwang bàng kup kơryan añ ò bồ, Mơya nùs añ duh rngòt di jơnau Yàng dê.

¹⁶²Añ chò hòp ngan bơh jơnau Kơnràñ dê, Ò gơkrơi be cau jòi geh phan dờng màng.

¹⁶³Añ gơjrañ kơuềng mơ cù kìr di bơta blac chừt, Mơya añ kòñ gơboh di bơta boh lam Yàng dê.

¹⁶⁴Kòp ngai añ jòng ro Yàng poh dơ̆, Bơh jơnau gơnoar sồr song ring Kơnràñ dê.

¹⁶⁵Cau lơi kòñ gơboh di bơta boh lam Yàng dê gen geh lơngap lơngai dờng ngan, Ò gơs bơta lơi lơh bol khai in gơtup tìs.

¹⁶⁶Ơ Yàng Jehôwa, añ gơn kơnòm di bơta dong klàs Kơnràñ dê, Mơ añ lơh jat ală bơta sồr lam Kơnràñ dê.

¹⁶⁷Hwềng soàn añ prap gàr jơnau sồr kràñ cê Yàng dê, Añ kòñ gơboh oă ngan di ală jơnau hơ̆.

¹⁶⁸Añ prap gàr jơnau sồr mơ jơnau sồr kràñ cê Yàng dê, Bơh jơh ală gùng dà añ jê gơ ơm di đap Kơnràñ.

¹⁶⁹Ơ Yàng Jehôwa, dan jơnau rac dan añ jê tus di đap Yàng; Dan ai añ in bơta git wă jat jơnau Kơnràñ dê.

¹⁷⁰Dan jơnau rac ròc añ jê tus di đap Yàng; Dan dong tă añ jat jơnau Kơnràñ dê.

¹⁷¹Bơr sơndồi añ jê rơp jòng ro Yàng, Tài bơh Yàng bơto añ ală jơnau sồr Kơnràñ dê.

¹⁷²Lơmpiat añ rơp đơs chò bơh jơnau Yàng dê, Bơh jơh ală bơta sồr lam Kơnràñ dê la song ring.

¹⁷³Dan tê Yàng rcang sir nàng dong kòl añ, Bơh añ neh sac rwah jơnau sồr Kơnràñ dê.

¹⁷⁴Ơ Yàng Jehôwa, añ kơp kòñ ngan bơta dong klàs Yàng dê; Añ hừh nùs bơh bơta boh lam Kơnràñ dê.

¹⁷⁵Dan lòi añ kis nàng añ rgơi jòng ro Yàng; Dan lòi ală jơnau gơnoar sồr Kơnràñ dê dong kòl añ.

¹⁷⁶Añ neh tìs nrah ò gơkrơi be belàt roh; Dan jòi cau duh broă Yàng dê, bơh añ ò hŭi bơta sồr lam Kơnràñ dê.