Read koho Đơs Crih 135 Bible Online

Đơs Crih 135 - koho bible

Đơs Crih 135

¹Jòng ro Yàng Jehôwa! Jòng ro tĕ sơnđan Yàng Jehôwa; Ơ ală cau duh broă Yàng Jehôwa dê,

²La cau ntào tòm hìu Yàng Tom Trồ bol he dê, tòm tiah ƀlàng jơng hìu, hìu Yàng Tom Trồ bol he dê, jòng ro tĕ Kơnràñ!

³Jòng ro tĕ Yàng Jehôwa, bơh Yàng Jehôwa la niam; Đơs chò tĕ sơnđan Kơnràñ in, bơh Kơnràñ gơs bơta nđàc.

⁴Bơh Yàng Jehôwa neh sac rwah Jakôp Kơnràñ in, Sac rwah làng bol Israel lơh gơs sre brê Kơnràñ dê.

⁵Bơh añ git Yàng Jehôwa la dờng ngan, Yàng bol he dê la hơđang rlau jơh mơ ală yàng ndai.

⁶Bơta lơi niam nùs Yàng Jehôwa gen Kơnràñ lơh bơta hơ̆, Hơđang trồ hala tòm ù, tòm dàlềng hala tòm ală tiah jrô.

⁷Kơnràñ la Bơtau sồr mhwal guh bơh di tiah lồi dut plai ù, Kơnràñ lơh puhlèp jat mìu, mơ cèng càl lik lòt bơh di ală tiah ơm gơ dê.

⁸Kơnràñ tơnchơt ală kòn tơnhoa lơgar Ejiptơ dê, Bơh kòn mơnus tus di phan poan jơng.

⁹Kơnràñ lơh gơs tòm lơgar Ejiptơ ală bơta krơi tềl is, Lơh glài Pharaôn mơ jơh ală cau duh broă khai dê.

¹⁰Kơnràñ tòmlơh mơ oă làng bol, Mơ tơnchơt ală cau bơtau pràn kơldang,

¹¹Hơ̆ la Sihôn, bơtau làng bol Amôrit dê, Ôk bơtau Bassan dê, Mơ jơh ală cau bơtau at bồ lơgar Kanaan dê.

¹²Kơnràñ ai lơgar bol khai dê lơh gơs sre brê, Hơ̆ la sre brê ai làng bol Kơnràñ in la Israel.

¹³Ơ Yàng Jehôwa, sơnđan Kơnràñ dê gam sùm sùm; Ơ Yàng Jehôwa, bơta tiơng pơnro Kơnràñ dê gam gơs tòm jơh ală rài.

¹⁴Bơh Yàng Jehôwa rơp dong tò làng bol Kơnràñ dê, Mơ gơs nùs nđàc sơngit di ală cau duh broă Kơnràñ dê.

¹⁵Rùp ràk ală làng bol dê lơh mơ priă mơ màh, La broă bơh tê cau lơh gơs.

¹⁶Rùp ràk gơs bơr mơ ò đơs, Gơs mat mơ ò gŏ,

¹⁷Gơs tồr mơ ò kơno, Mơ tòm bơr gơ ò gơs nhơm tă.

¹⁸Cau lơi mòn ală rùp ràk, mơ kòp nă cau dòn kơnòm di gơ, Gen gơlik gơs ndròm be gơ.

¹⁹Ơ hìu nhă Israel, jòng ro tĕ Yàng Jehôwa! Ơ hìu nhă Arôn, jòng ro tĕ Yàng Jehôwa!

²⁰Ơ hìu nhă Lebi, jòng ro tĕ Yàng Jehôwa! Ơ ală cau duh rngòt di Yàng Jehôwa, jòng ro tĕ Yàng Jehôwa!

²¹Bơh Siôn jòng ro tĕ Yàng Jehôwa, La Bơtau ơm tòm Jerusalem! Jòng ro Yàng Jehôwa!