Read koho Đơs Crih 139 Bible Online

Đơs Crih 139 - koho bible

Đơs Crih 139

¹Jơnau Đơs Crih Dabit cih ai cau lam bồ đơs chò in ngui Ơ Yàng Jehôwa, Kơnràñ neh sền sơwì añ mơ git añ!

²Yàng git tòm tŭ añ nggui mơ tòm tŭ añ ñă ntào; Yàng git loh ală bơta kơlôi sơnơng añ jê bơh tiah ngài.

³Yàng sền sơwì gùng lòt mơ bơta bic rlô añ jê, Mơ mòng git jơh ală gùng dà añ jê.

⁴Tian gơs lơmpiat añ òhềt đơs dô jơnau, Ơ Yàng Jehôwa, Kơnràñ neh git tơl jơh rau.

⁵Yàng gơrwàng añ đah ngkòi mơ đah đap; Yàng ơn tê Kơnràñ dê hơđang añ.

⁶Bơta git wă hơ̆ la crih crài ir añ in, La jơnhoa ngan tian gơs añ ò rgơi wă wơng.

⁷Ntềng đah añ rgơi lòt ngài bơh di Hwềng Yàng dê taih? Hala tiah lơi añ rgơi dô pồn bơh di mat Yàng dê taih?

⁸Dilah añ guh hơ trồ, Yàng ơm tềng hơ̆! Dilah añ bic tòm lơgar Làng ƀồc, Yàng kung gơs tềng hơ̆ sơl!

⁹Dilah añ gơs pơnđar àng drim dê Tus ơm di tiah lồi nhàr dàlềng dê,

¹⁰Tềng hơ̆ tê Yàng kung rơp tề lam añ, Tê ma Yàng dê rơp sơmbat kơ̆ añ.

¹¹Dilah añ đơs lah: “Ngan bơta klam jơngo rơp kìng ndơp añ, Mơ bơta àng gùt dar añ gơlik gơs trồ mang,”

¹²Tian gơs bơta klam jơngo ò di la jơngo gơwèt mơ Yàng, Trồ mang gơ sòl pơnđàng be trồ ngai, Bơh bơta klam jơngo be la àng gơwèt mơ Yàng.

¹³Bơh Yàng neh mòn gơs pơnah đah dơlam añ jê, Yàng neh tàñ gơs añ tòm kơndul mè añ jê.

¹⁴Añ jòng ro Yàng, bơh añ neh geh crơng gơs dô bă pal rngòt mơ crih crài ngan. Crih crài ngan ală broă lơh Kơnràñ dê, añ git loh ngan.

¹⁵Tòm tŭ añ geh crơng gơs tòm tiah ndơp, Geh mòn gơs tòm ală tiah jrô ù dê, bơta gơcrap tòp tòm añ ò geh pồn ndơp bơh di mat Yàng.

¹⁶Mat Yàng neh gŏ pơnah òhềt gơs rùp să añ jê; Ntum khà ală ngai lơh nền añ in Neh geh cih tòm sră Kơnràñ dê tòm tŭ òhềt gơs dô ngai lơi tòm ală ngai hơ̆.

¹⁷Ơ Yàng Tom Trồ, ală bơta kơlôi sơnơng Yàng dê añ ò rgơi jòi bàn! Ntum khà ală bơta kơlôi sơnơng hơ̆ la dờng ò git nđò!

¹⁸Dilah añ kòñ kòp ală bơta kơlôi sơnơng hơ̆, gen oă rlau mơ bràs. Tòm tŭ añ kah rngal añ gam ơm mơ Yàng.

¹⁹Ơ Yàng Tom Trồ, dan Yàng tơnchơt ală cau iơh bơsak, Mơ bơtrơh tơlik bơh di añ ală cau lơh gơhòr mhàm.

²⁰Bol khai đơs tòmdră mơ Yàng dô bă lac lèo; Bol khai yò tơngguh is să he mơ sòdră di Yàng nàng lơh iơh.

²¹Ơ Yàng Jehôwa, añ ò di gơjrañ kơuềng di ală cau gơjrañ kơuềng di Yàng ò ơ? Ò di cù kìr di ală cau guh tòmdră mơ Yàng sơl ơ?

²²Añ jơh nùs gơjrañ kơuềng ngan di bol khai; Añ kòp bol khai la ală cau sò tơm di añ.

²³Ơ Yàng Tom Trồ, dan sền sơwì añ mơ git nùs añ jê! Dan lòng añ mơ git ală bơta kơlôi sơnơng añ jê!

²⁴Dan sơwì sền tòm añ gơs gùng dà iơh lơi hala ò? Dan tề lam añ tòm gùng gam sùm sùm.