Read koho Đơs Crih 145 Bible Online

Đơs Crih 145 - koho bible

Đơs Crih 145

¹Bơta đơs chò jòng ro Dabit cih Ơ Yàng Tom Trồ la Bơtau añ jê, añ rơp yò tơngguh Kơnràñ mơ jòng ro sơnđan Kơnràñ sùm sùm ò lồi.

²Kòp ngai añ rơp jòng ro Yàng, Mơ jòng ro sơnđan Kơnràñ sùm sùm ò lồi.

³Yàng Jehôwa la dờng mơ pal jòng ro ngan; Bơta dờng ryŭ Kơnràñ dê ò rgơi git jơh.

⁴Rài do rơp jòng ro mơ yal broă Yàng dê rài tơnơ̆ in, Mơ rơp yal tơlik ală broă gơnap gơnoar Kơnràñ dê.

⁵Añ rơp kơlôi sơnơng bơh bơta gơklŏ ryŭ ryơm àng gơcrà Yàng dê, Mơ bơh ală broă crih crài Kơnràñ dê.

⁶Cau rơp yal tơlik gơnoar pràn bơh ală broă pal rngòt rngơt Yàng dê, Ai añ gen rơp yal bơh ală bơta dờng ngan Kơnràñ dê.

⁷Bol khai tơngkah wơl bơta tiơng pơnro bơh nùs niam dờng ơnàng Kơnràñ dê, Mơ rơp đơs chò dờng bơh bơta song ring Kơnràñ dê.

⁸Yàng Jehôwa ai bơta nđàc mơ gơs nùs kòñ nđàc, Òbat gơjrañ mơ bềng lìu bơta kòñ gơboh kơ̆ dơn.

⁹Yàng Jehôwa lơh bơta niam jơh tơl nă cau in, Kơnràñ nđàc sơngit di jơh ală phan Kơnràñ neh crơng gơs.

¹⁰Ơ Yàng Jehôwa, jơh ală broă lơh Kơnràñ dê rơp ưnngài Kơnràñ, Mơ jơh ală cau sàng goh Kơnràñ dê rơp jòng ro Kơnràñ.

¹¹Bol khai rơp đơs bơh bơta gơklŏ lơgar Yàng dê, Mơ yal wơl bơh gơnap gơnoar Kơnràñ dê.

¹²Nàng yal tơlik kòn mơnus in git ală broă gơnap gơnoar Yàng dê, Mơ bơta gơklŏ ryŭ ryơm lơgar Kơnràñ dê.

¹³Lơgar Yàng la lơgar gam sùm sùm, Gơnoar at bồ Yàng dê gam gơs jơl jơh ală rài. Yàng Jehôwa lơh jat jơh ală jơnau Kơnràñ dê, Mơ gơs bơta nđàc tòm jơh ală broă lơh Kơnràñ dê.

¹⁴Yàng Jehôwa yò đo jơh ală cau gơplơ̆ gơpừ, Mơ pò tơngguh jơh ală cau kun tơnliah.

¹⁵Jơh ală phan tơnggòr sền di Yàng, Kơnràñ ai bol khai in phan sa jat kơnhai sơnam.

¹⁶Yàng pò tê Kơnràñ dê, lơh hừh nùs jơh ală jơi phan kis in.

¹⁷Yàng Jehôwa la song ring tòm jơh ală gùng dà Kơnràñ dê, Mơ gơs bơta kơ̆ dơn tòm jơh ală broă lơh Kơnràñ dê.

¹⁸Yàng Jehôwa ơm rềp mơ jơh ală cau hòi dan di Kơnràñ, Hơ̆ la ală cau ai bơta song ngan mơ hòi dan di Kơnràñ,

¹⁹Kơnràñ lơh hừh nùs jơh ală cau duh rngòt di Kơnràñ, Kung iat jơnau hòi dan bol khai dê mơ dong klàs bol khai.

²⁰Yàng Jehôwa sền gàr jơh ală cau kòñ gơboh di Kơnràñ, Mơya Kơnràñ rơp tơnroh jơh ală cau iơh bơsak.

²¹Bơr añ rơp đơs jơnau jòng ro Yàng Jehôwa, Lòi jơh ală jơi poac să jòng ro sơnđan sàng goh Kơnràñ dê gam sùm sùm ò lồi.