Read koho Đơs Crih 147 Bible Online

Đơs Crih 147 - koho bible

Đơs Crih 147

¹Jòng ro Yàng Jehôwa! Bơta đơs chò jòng ro Yàng Tom Trồ bol he dê la bơta niam ngan, Bơh Kơnràñ gơs nùs nđàc, mơ bơta đơs chò jòng ro Kơnràñ la di pal.

²Yàng Jehôwa bơt bơtào Jerusalem, Kơnràñ pơjum wơl ală cau nrah nring Israel dê.

³Kơnràñ sơmbòi cau gơs nùs jê sồt moat jrùng, Mơ pùt tiah sồt bol khai dê.

⁴Kơnràñ lơh nền ntum khà ală sơmañ, Tơmoh sơnđan jơh ală bol gơ.

⁵Yàng Jehôwa bol he dê dờng ngan, gơs gơnap gơnoar ò git nđò; Bơta git wă Kơnràñ dê ò rgơi was sơnoa.

⁶Yàng Jehôwa yò tơngguh cau kòl rồn bơklơn, Mơ tuh tơlup cau iơh bơsak tòm ù.

⁷Đơs chò tĕ ưnngài Yàng Jehôwa; Pĕ kơñi mơ jòng ro Yàng Tom Trồ bol he dê.

⁸Kơnràñ jơm ală tap trồ mơ mhwal, Rcang dà mìu ù in, Mơ lơh ñhơt in hòn hơđang dòr.

⁹Kơnràñ ai phan sa ală phan poan jơng in, Mơ ai kơnđà kòn in tòm tŭ gơ nggà dan.

¹⁰Kơnràñ niam nùs ò di bơh bơta pràn ơseh dê, Mơ Kơnràñ niam nùs kung ò di bơh jơng cau ntoat rat.

¹¹Mơya Yàng Jehôwa niam nùs di ală cau duh rngòt di Kơnràñ, Mơ niam nùs di cau gơn kơnòm di bơta kòñ gơboh kơ̆ dơn Kơnràñ dê.

¹²Ơ Jerusalem, jòng ro tĕ Yàng Jehôwa! Ơ Siôn, jòng ro tĕ Yàng Tom Trồ mê dê!

¹³Bơh Kơnràñ lơh kơ̆ nền kai mpồng ƀòn mê dê! Mơ ai lơngai lơngò kòn sau mê in ơm digùl mê.

¹⁴Kơnràñ ai bơta ring lơngai tòm nhàr ƀòn mê dê, Mơ tơmbềng mê mơ kòi phe niam rlau jơh.

¹⁵Kơnràñ tơlik gơnoar sồr Kơnràñ dê hơđang ù, Jơnau Kơnràñ dê gơ lòt mhar ngan.

¹⁶Kơnràñ ai mìu kơmbuh piar be sơnò belàt, Rsìh dà tŭ be bùh.

¹⁷Kơnràñ sơmbrih ală pet lŭ piar; Ñcau rgơi ntào jai di đap bơta noat mrềt Kơnràñ dê taih?

¹⁸Kơnràñ tơlik gơnoar sồr gen gơlề jơh, Kơnràñ sồr càl khồm, gen dà gơhòr.

¹⁹Yàng yal loh jơnau Kơnràñ dê Jakôp in, Hơ̆ la ală bơta lơh nền mơ gơnoar sồr Israel in.

²⁰Kơnràñ ò lơh behơ̆ mơ làng bol lơi ndai ò, Bol khai ò git gơnoar sồr Kơnràñ dê. Jòng ro Yàng Jehôwa!