Read koho Đơs Crih 21 Bible Online

Đơs Crih 21 - koho bible

Đơs Crih 21

¹Jơnau Đơs Crih Dabit cih. Ai cau lam bồ đơs chò in ngui Ơ Yàng Jehôwa, tòm bơta pràn Kơnràñ dê bơtau hòn chò, Tòm bơta dong kòl Kơnràñ dê khai hòn chò hừh hơh.

²Yàng neh ai khai in bơta nùs khai kơp kòñ, Ò di ò ai bơta lơi sơndồi khai neh dan. (Selah)

³Bơh Yàng ai bơta lơngai niam mơ wă rò khai, Tơndau sơgơn màh ngan di bồ khai.

⁴Khai dan bơta kis mơ Yàng, gen Yàng ai khai in, ală ngai khai kis jŏ jòng sùm sùm ò lồi.

⁵Kơnòm dê bơta dong kòl Yàng dê, khai geh gơklŏ dờng ngan, Yàng ai khai in bơta màng ryŭ mơ ryŭ ryơm.

⁶Yàng ai pà khai in bơta lơngai gam sùm sùm, Kơnràñ lơh khai in geh bơta chò hòp mơ chò hòn bơh gơs mat Yàng.

⁷Bơh bơtau dòn kơnòm di Yàng Jehôwa; Bơh bơta kòñ gơboh kơ̆ dơn Bơtau Hơđang Rlau Jơh dê, khai rơp ò wañ lơnggơh.

⁸Tê Yàng rơp jòi bàn jơh ală cau sò tơm Yàng dê; Tê ma Yàng rơp jòi bàn ală cau gơjrañ kơuềng di Kơnràñ.

⁹Tòm tŭ Yàng tơlik mat, Kơnràñ rơp chu pơrguc bol khai be bơnhă ồs hơng. Yàng Jehôwa rơp tơnroh bol khai tòm tŭ gơjrañ dờng, Mơ ồs rơp sa bol khai.

¹⁰Yàng rơp tơnroh kòn sau bol khai bơh di ù, Mơ tơnroh jơi bơtiàn bol khai bơh digùl jơi kòn mơnus.

¹¹Dilah bol khai kòñ lơh iơh di Kơnràñ, Dilah bol khai jòi kai gơrmơ̆i, gen rơp ò lơh gơlik gơs.

¹²Bơh Yàng rơp lơh bol khai in ntoat dô, Kơnràñ wàr àtak pơmong di mat bol khai.

¹³Ơ Yàng Jehôwa, dan Kơnràñ geh yò tơngguh tòm gơnoar pràn Kơnràñ dê! Bol hi rơp đơs chò jòng ro gơnap gơnoar Kơnràñ dê.