Read koho Đơs Crih 22 Bible Online

Đơs Crih 22 - koho bible

Đơs Crih 22

¹Jơnau Đơs Crih Dabit cih, ai cau lam bồ đơs chò in ngui, jat sap Jùn Me Àng Drim dê Ơ Yàng Tom Trồ añ jê, ơ Yàng Tom Trồ añ jê, ñchi bơh tài Kơnràñ sang lòi añ? Ñchi bơh tài Kơnràñ ơm ngài ò dong kòl añ, mơ ò kơno jơnau rac ròc añ jê taih?

²Ơ Yàng Tom Trồ añ jê, añ hòi dan tòm trồ ngai mơya Kơnràñ ò ho wơl, tòm trồ mang kung behơ̆ sơl, mơya añ ò geh rlô bòl.

³Ai Yàng la sàng goh, Ơm hơđang sơbàn mơ geh Israel jòng ro.

⁴Ală ồng pàng bol hi dê dòn kơnòm di Yàng; Bol khai dòn kơnòm, gen Yàng neh dong tă bol khai.

⁵Bol khai hòi dan di Yàng mơ geh dong klàs; Bol khai dòn kơnòm di Yàng gen ò gơkòl ƀàssìl.

⁶Mơya añ la dô nơm tu, ò di la kòn mơnus, La bơta ƀàssìl kòn mơnus dê mơ la phan sền òsơp làng bol dê.

⁷Jơh ală cau lơi gŏ añ gen dơñŏ tơnhial di añ, bol khai tong kơmbùng rtơs bồ mơ đơs lah:

⁸“Khai jào phi gùng dà khai dê Yàng Jehôwa in; lòi Kơnràñ dong tă khai, Lòi Kơnràñ dong tă khai, bơh Kơnràñ niam nùs di khai!”

⁹Mơya Yàng la Bơtau tă tơlik añ bơh kơndul mè, Sền gàr añ tòm tŭ añ ơm di toh mè añ jê.

¹⁰Bơh tòm ngai deh añ neh geh jào Yàng in; Yàng la Yàng Tom Trồ añ jê bơh tŭ añ lik bơh kơndul mè.

¹¹Dan bañ ơm ngài bơh di añ, bơh bơta bòl glar kalke mòr tus rềp, Mơ ò gơs cau lơi dong kòl.

¹²Gơs oă kơnrồ dam gơrwàng gùt dar añ, Ală kơnrồ dam pràn kơldang Bassan dê gòm gơrwàng añ.

¹³Bol gơ ha bơr di añ, Ò gơkrơi be klìu triă jak kap crè mơ ơluh ơhùm.

¹⁴Añ gơkòl tuh tơlik be dà, jơh ală ntìng añ jê gơrung bơh tiah tơrbŏ; Plai nùs añ jê be jrềng, Gơlề hòr tòm să añ.

¹⁵Bơta pràn kơldang añ jê ro be nsàng glah, Mơ lơmpiat añ gơđềt di dò; Yàng neh tơmbic añ tòm thul ơmul bơta chơt dê.

¹⁶Ngan ală so gòm gơrwàng gùt dar añ, Dô mpồl cau iơh bơsak gòm gơrwàng añ; Bol khai hwit bluh tê mơ jơng añ.

¹⁷Añ rgơi kòp jơh ală ntìng añ jê. Bol khai rmê mơ dơñŏ di añ.

¹⁸Bol khai tòmpà ồi ào añ jê, Tă khà bơh ào dơlam añ jê.

¹⁹Mơya, ơ Yàng Jehôwa, dan bañ ơm ngài! Ơ Bơtau dong kòl añ, dan mhar mhar dong kòl añ!

²⁰Dan dong hwềng soàn añ jê klàs bơh di đào, Mơ bơta kis añ jê bơh di gơnoar jơi so.

²¹Dan dong añ klàs bơh di bơr klìu triă! Dan dong hwềng soàn bòl glar moat jrùng añ jê klàs bơh di ală ngke rpu brê dê.

²²Añ rơp bơto yal sơnđan Yàng ală oh mi añ in, Mơ jòng ro Yàng digùl mpồl jơnum.

²³Ơ ală cau duh rngòt di Yàng Jehôwa, jòng ro tĕ Kơnràñ! Ơ jơh ală jơi bơtiàn Jakôp dê, jòng ro tĕ Kơnràñ! Ơ jơh ală jơi bơtiàn Israel dê, duh rngòt tĕ di Kơnràñ!

²⁴Bơh Kơnràñ ò di sền òsơp, ò di sền ngkòr ngkàc di bơta dồn sa cau dồn sa dê. Kơnràñ kung ò pồn mat di khai, Mơya tòm tŭ khai hòi dan mơ Kơnràñ, gen Kơnràñ dòp jơnau.

²⁵Bơh Yàng gơlik bơta jòng ro añ jê digùl mpồl jơnum dờng; Añ rơp tơm sir ală jơnau ho pơgon añ jê di đap ală cau duh rngòt di Yàng.

²⁶Cau rƀah rơp sa mơ geh hòm lai; Ală cau jòi Yàng Jehôwa rơp jòng ro Kơnràñ! Dan nùs ală bol mê geh kis gam sùm sùm.

²⁷Jơh ală tiah lồi dut dunnia dê rơp kah mơ rê wơl hơ Yàng Jehôwa; Jơh ală jơi bơtiàn ală làng bol dê rơp duh khoai di đap Kơnràñ.

²⁸Bơh gơnoar at bồ gơrê bal mơ Yàng Jehôwa, Kơnràñ at bồ hơđang ală làng bol.

²⁹Ngan jơh ală cau pơnhừ să tòm dunnia rơp cùn khoai di đap Kơnràñ; Jơh ală cau òs chơt, la ală cau ò rgơi pleh klàs di bơta chơt, Rơp cùn khoai di đap Kơnràñ.

³⁰Dô jơi bơtiàn rơp duh broă Kơnràñ; Cau rơp yal bơh Yàng Jehôwa jơi bơtiàn rơp tus in,

³¹Jơi bơtiàn hơ̆ rơp bơto yal bơta dong tă Kơnràñ dê, yal wơl làng bol òhềt deh in lah: Kơnràñ neh lơh broă hơ̆.