Read koho Đơs Crih 24 Bible Online

Đơs Crih 24 - koho bible

Đơs Crih 24

¹Jơnau Đơs Crih Dabit cih Plai ù mơ ală phan hơđang gơ, Lơgar dunnia mơ ală cau ơm hơđang gơ, jơh gơrê bal mơ Yàng Jehôwa.

²Bơh Kơnràñ neh lơh mơnàng plai ù hơđang ală dàlềng, Mơ bơtào gơ kơ̆ hơđang ală dà hiòng.

³Ñcau rơp geh guh hơ mơnơm Yàng Jehôwa? Ñcau rơp geh ntào di tiah sàng goh Kơnràñ dê taih?

⁴Hơ̆ la cau gơs tê ò lơh tìs glài mơ gơs nùs sàng goh, Ò wèt hwềng soàn he hơ bơta ma blac, Kung ò srat să blac pơrlồm.

⁵Cau hơ̆ rơp geh lơngai bơh Yàng Jehôwa, Mơ geh Yàng Tom Trồ bơta dong klàs khai dê yal tơlik khai la song ring.

⁶Hơ̆ la jơi bơtiàn ală cau jòi jat Kơnràñ, La ală cau jòi jat Yàng Tom Trồ Jakôp dê. (Selah)

⁷Ơ ală mpồng, pò tĕ bồ hơđang, Ơ ală mpồng rài yut rài yau, pò tĕ hơđang! Gen Bơtau gơklŏ rơp mut.

⁸Bơtau gơklŏ do la ñcau taih? Hơ̆ la Yàng Jehôwa gơs pràn kơldang mơ gơnap gơnoar, Yàng Jehôwa gơs gơnap gơnoar tòm bơta tòmlơh.

⁹Ơ ală mpồng, pò tĕ bồ! Ơ ală mpồng bơh rài yau, pò tĕ hơđang, Gen Bơtau gơklŏ rơp mut.

¹⁰Bơtau gơklŏ do la ñcau taih? Hơ̆ la Yàng Jehôwa Mpồl Ling dê, Să tòm Kơnràñ la Bơtau gơklŏ. (Selah)