Read koho Đơs Crih 25 Bible Online

Đơs Crih 25 - koho bible

Đơs Crih 25

¹Jơnau Đơs Crih Dabit cih Ơ Yàng Jehôwa, hwềng soàn añ jê wèt tơngguh hơ Kơnràñ.

²Ơ Yàng Tom Trồ añ jê, añ dòn kơnòm di Kơnràñ; dan bañ lòi añ gơkòl ƀàssìl; Bañ lòi ală cau sò tơm di añ pha rlau mơ añ.

³Ngan dan bañ lòi cau lơi kơp gơn di Kơnràñ gơkòl ƀàssìl; Ai ală cau dờng nùs pơrlơ̆ dră gen lòi bol khai gơkòl ƀàssìl.

⁴Ơ Yàng Jehôwa, dan ai añ in git ală gùng dà Kơnràñ dê, Mơ bơto añ in git gùng sơnah Kơnràñ dê.

⁵Dan lam añ tòm jơnau song Kơnràñ dê mơ bơto sồr añ, Bơh Kơnràñ la Yàng Tom Trồ bơta dong klàs añ jê; Bơh Kơnràñ añ kơp gơn jơh ngai mho.

⁶Ơ Yàng Jehôwa, dan kah wơl bơta kòñ nđàc mơ bơta kòñ gơboh kơ̆ dơn Kơnràñ dê, Bơh gơ neh gơs sùm bơh rài yau.

⁷Dan bañ kah ală tồi glài añ tìs tòm tŭ kơnòm să, hala ală bơta tìs añ jê: Ơ Yàng Jehôwa, dan kah añ jat be bơta kòñ gơboh kơ̆ dơn mơ nùs niam Kơnràñ dê.

⁸Yàng Jehôwa la niam mơ song ngan; Tài behơ̆ Kơnràñ bơto cau glài in git gùng lòt.

⁹Kơnràñ tề lam cau pơndêt să tòm bơta song, Bơto cau pơndêt să in git gùng dà Kơnràñ dê.

¹⁰Jơh ală gùng dà Yàng Jehôwa dê la bơta kòñ gơboh kơ̆ dơn mơ dòn song, Ai cau lơi in prap gàr bơta ho bal mơ jơnau sồr kràñ cê Kơnràñ dê.

¹¹Ơ Yàng Jehôwa, bơh sơnđan Kơnràñ, Dan toh glài iơh bơsak añ jê, tài bơh gơ la dờng.

¹²Ñcau la cau duh rngòt dê Yàng Jehôwa taih? Kơnràñ rơp bơto bol khai in git gùng khai pal sac rwah.

¹³Bol khai rơp geh ơm jŏ jòng tòm bơta pas sơm lơngai lơngò, Mơ kòn sau khai rơp dòp geh lơgar lơh gơs sre brê.

¹⁴Yàng Jehôwa lơh yô mơ cau duh rngòt di Kơnràñ, Mơ yal ală cau hơ̆ in git bơta ho bal Kơnràñ dê.

¹⁵Mat añ tơnggòr sền sùm di Yàng Jehôwa, Bơh Kơnràñ rơp tă jơng añ klàs bơh di bơtơng.

¹⁶Dan Yàng wèt sền añ mơ nđàc di añ, Bơh añ ơm is mơ kong bòl glar ngan.

¹⁷Dan lơh rài bơta kơlôi rcang tòm nùs añ jê, Mơ tă tơlik añ bơh di bơta jê sồt añ jê.

¹⁸Dan sền sơwì bơta bòl glar kalke mơ bơta dồn sa rƀah añ jê, mơ toh jơh ală tồi glài añ jê.

¹⁹Dan sền sơwì ală cau sò tơm di añ la oă; Bol khai gơjrañ kơuềng di añ dô bă jàñ bơsak ngan.

²⁰Dan sền gàr bơta kis añ jê mơ dong tă añ; Bañ lòi añ gơkòl ƀàssìl, bơh añ kìng crŭ tòm Yàng.

²¹Dan bơta song ngan mơ bơta song ring sền gàr añ, Bơh añ kơp gơn Yàng.

²²Ơ Yàng Tom Trồ, dan dong tơwài Israel Klàs bơh di jơh ală bơta jê sồt bòl glar.