Read koho Đơs Crih 27 Bible Online

Đơs Crih 27 - koho bible

Đơs Crih 27

¹Jơnau Đơs Crih Dabit cih Yàng Jehôwa la Bơtau ai bơta àng mơ la bơta dong klàs añ jê. Añ rơp rngòt dê ñcau taih? Yàng Jehôwa la tiah kìng crŭ kơ̆ cê bơta kis añ jê. Añ rơp rngòt dê ñcau taih?

²Tòm tŭ cau lơh bơta iơh bơsak brồ lơh añ, sa loan poac añ, cau sò tơm mơ cau sòdră di añ, Gen bol khai rơp gơtup pừ.

³Bulah gơs dô bơnòr ling ơm kơp tòmdră mơ añ, Nùs añ rơp ò rngòt; Bulah kơlìn gơtoă gơbơtào sò tơm di añ, Añ rơp dòn kơ̆ nền.

⁴Añ neh dan mơ Yàng Jehôwa dô bơta, mơ rơp jòi jat bơta hơ̆; Hơ̆ la añ kòñ jơl jơh rài kis añ jê geh ơm tòm hìu Yàng Jehôwa, Nàng sền gŏ bơta hàng mơnĕ Yàng Jehôwa dê, Mơ jòi lùp tòm hìu duh khoai Kơnràñ dê.

⁵Bơh tòm ngai gơlòng bòl glar Kơnràñ rơp jơm gòm añ tòm tiah kìng crŭ Kơnràñ dê, Pồn añ tòm tiah ndơp ndơr tòm sàl Kơnràñ dê, Mơ Kơnràñ rơp ơn añ jơnhoa hơđang dô nơm pơnai lŭ.

⁶Tŭ do bồ añ pò tơngguh hơđang rlau mơ jơh ală cau sò tơm gùt dar añ; Tòm sàl Kơnràñ dê añ rơp ơn phan ơn duh khoai bal mơ jơnau driau dờng hòn chò; Añ rơp đơs chò mơ jòng ro Yàng Jehôwa.

⁷Ơ Yàng Jehôwa, dan iat añ tòm tŭ añ hòi driau, Dan nđàc sơngit dê añ mơ dòp jơnau añ jê.

⁸Yàng neh đơs lah: “Jòi jat tĕ muh mat Añ.” Nùs añ đơs mơ Kơnràñ lah: “Ơ Yàng Jehôwa, añ jòi jat muh mat Kơnràñ.”

⁹Dan bañ pồn ndơp mat Yàng bơh di añ. Bañ bơtrơh tơlo cau duh broă Kơnràñ dê tòm tŭ Kơnràñ gơhào gơjrañ, Ơ Yàng la Bơtau neh dong kòl añ. Ơ Yàng Tom Trồ bơta dong klàs añ jê, Dan bañ sang añ mơ bañ lòi añ.

¹⁰Bơh mè bèp añ jê sang lòi añ, Mơya Yàng Jehôwa rơp dòp rò añ.

¹¹Ơ Yàng Jehôwa, dan bơto añ in git gùng dà Kơnràñ dê; Mơ tài bơh ală cau sò tơm di añ, dan lam añ tòm gùng ring drik.

¹²Bañ phi añ tòm nùs kòñ cau sò tơm di añ; Bơh ală cau lơh cơng blac neh bơtào tòmsò di añ, Mơ bol khai tơlik bơta rhung rhang.

¹³Añ dòn ngan lah añ rơp gŏ bơta niam Yàng Jehôwa dê tòm lơgar cau kis dê!

¹⁴Kơp gơn tĕ Yàng Jehôwa; Lơh tĕ pràn kơldang mơ kơ̆ nùs wền dơngoh; Ngan pal kơp gơn tĕ Yàng Jehôwa!