Read koho Đơs Crih 35 Bible Online

Đơs Crih 35 - koho bible

Đơs Crih 35

¹Jơnau Đơs Crih Dabit cih Ơ Yàng Jehôwa, dan pơndang mơ ală cau pơndang mơ añ, Dan tòmdră mơ ală cau tòmlơh tòmdră mơ añ!

²Dan at khèl dờng mơ dềt, Mơ ñă ntào nàng dong kòl añ.

³Dan tă tà mơ đào nàng tòmdră mơ ală cau ting jat añ! Dan đơs mơ hwềng soàn añ lah: “Añ la bơta dong klàs mê dê!”

⁴Cau lơi jòi tơnchơt bơta kis añ, lòi bol khai gơkòl ƀàssìl mơ bơtat bơtròh! Cau lơi kòñ lơh iơh di añ, lòi khai ruc wơl mơ gơkòl ƀàssìl!

⁵Lòi bol khai be kòi nsiap gơkòl càl khồm pơrdô, Mơ gơs cau gơnrơh Yàng Jehôwa dê bơtrơh bol khai tơn!

⁶Lòi gùng bol khai dê gơlik jơngo mơ ntiar, Mơ gơs cau gơnrơh Yàng Jehôwa dê ting jat bol khai!

⁷Bơh bơta bol khai dang òm bơtơng nàng kup añ la ò bồ, Mơ bơta bol khai tò dô nơm trồm nàng tă bơta kis añ jê la ò bồ.

⁸Lòi bơta roh rui nisơna tus hơđang bol khai! Bơtơng bol khai dang òm lòi gơ yar wơl să tòm bol khai, Lòi bol khai dùh tòm hơ̆, mơ kong roh rui tơn.

⁹Gen hwềng soàn añ rơp hòn chò tòm Yàng Jehôwa, Mơ hòn chò tòm bơta dong tă Kơnràñ dê.

¹⁰Jơh ală ntìng añ rơp đơs lah: “Ơ Yàng Jehôwa, ñcau ndròm be Kơnràñ taih? La Bơtau dong tă cau lơbơn bơh di cau pràn kơldang rlau mơ khai, Mơ dong tă cau lơbơn mơ cau siơ̆u siar bơh di cau tòmpìt kơñau khai.”

¹¹Ală cau lơh cơng iơh rmơh bơtào tơngguh, Bol khai lùp añ ală bơta añ ò git.

¹²Bol khai ai bơta iơh sal di bơta niam añ jê, Hwềng soàn añ jê gơkòl sang lòi.

¹³Ai añ tòm tŭ bol khai kòp jê, añ soh bài sơnò kiat, Ai bơta ơt sa mơ bơklơn să jan añ, Añ kun bồ mơ hòi dan,

¹⁴Gơlơh be añ rac ròc bơh cau bơyô hala bơh oh mi tòm añ jê; añ kun mơ ñìm rac kung be cau nggà ñìm mè khai dê.

¹⁵Mơya tòm tŭ añ gơtup pừ, gen bol khai pơjum bal dô bă tòmdră mơ añ, Ală cau ơlă ơlai pơjum bal, bol khai đơs iơh di añ ò dơh mơ añ ò git.

¹⁶Bol khai sơlo dơñŏ tơnhial di añ dô bă ò duh rngòt; Bol khai rkiat sề tòmsò di añ.

¹⁷Ơ Yàng Jehôwa, Yàng rơp sền bơta hơ̆ jơl tus di tŭ lơi taih? Dan dong bơta kis añ jê klàs di ală klìu triă.

¹⁸Gen añ rơp ưnngài Yàng di đap mpồl jơnum dờng, Añ rơp jòng ro Kơnràñ digùl mpồl oă.

¹⁹Dan bañ ai ală cau tòmsò ò bồ di añ, mơ hòn chò tài bơh añ, Kung bañ ai ală cau gơjrañ kơuềng ò bồ di añ gơs mat sền òsơp di añ.

²⁰Bơh bol khai ò đơs jơnau ring lơngai, Mơya bol khai bơyai blac pơrlồm tòmsò di ală cau ơm lơngai tòm ƀòn lơgar.

²¹Bol khai ha dờng bơr sòdră di añ mơ đơs lah: Bol khai đơs: “Ha, ha! Mat bol hi neh gŏ bơta hơ̆ rau!”

²²Ơ Yàng Jehôwa, Kơnràñ neh gŏ bơta hơ̆ rau, dan bañ ơm mŏ mŏ! Ơ Yàng, dan bañ ơm ngài bơh di añ!

²³Ơ Yàng Tom Trồ la Yàng añ jê, dan kah rngal, Dan guh nàng lơh bơta song ring añ in mơ dong tò añ!

²⁴Ơ Yàng Tom Trồ añ jê, dan cahrña añ jat bơta song ring Kơnràñ dê; Dan bañ lòi bol khai hòn chò tài bơh añ!

²⁵Dan bañ lòi bol khai đơs is lah: “Ha ha, hơ̆ la bơta bol he kơp kòñ!” Dan bañ lòi bol khai đơs lah: “Bol he neh sa loan khai rau.”

²⁶Cau lơi hòn chò bơh bơta bòl glar añ jê, Lòi khai gơkòl bal tòm bơta ƀàssìl ƀàsso! Cau lơi bơtào tòmsò mơ añ dô bă pơnhừ să, Lòi khai gơkòl tơnsoh bơta ƀàssìl mơ bơtat bơtròh.

²⁷Ai cau lơi dòp jơnau yal lah añ ò gơs glài, Lòi bol khai in geh driau dờng hòn chò mơ chò hòp, Mơ đơs sùm ò dơh lah: “Dờng ngan la Yàng Jehôwa, La Bơtau hừh nùs bơh bơta lơngap lơngai cau duh broă Kơnràñ dê.”

²⁸Gen lơmpiat añ jê rơp yal bơta song ring Kơnràñ dê, Mơ bơta jòng ro Kơnràñ dê jơh ngai mho.