Read koho Đơs Crih 37 Bible Online

Đơs Crih 37 - koho bible

Đơs Crih 37

¹Jơnau Đơs Crih Dabit cih Bañ gơs nùs sơềt sơềl tài bơh ală cau iơh bơsak, Kung bañ ƀoah gơjrañ di ală cau lơh iơh.

²Bơh ò jŏ tai bol khai rơp gơkòl pès be ñhơt, Mơ ro mhar be ñhơt tơlir.

³Dòn kơnòm tĕ di Yàng Jehôwa mơ lơh bơta niam; Gen mê rơp ơm tòm lơgar mơ geh Kơnràñ sền gàr.

⁴Hừh hơh tĕ tòm Yàng Jehôwa, Gen Kơnràñ rơp ai mê in bơta mơ nùs mê kơp kòñ.

⁵Jào tĕ gùng dà mê dê Yàng Jehôwa in; Dòn kơnòm tĕ di Kơnràñ, gen Kơnràñ rơp dong mê.

⁶Kơnràñ rơp ràng tơlik bơta ò gơs glài mê dê loh làng be bơta àng, Mơ ràng tơlik bơta song ngan mê dê be bơta àng tòm gùl ngai.

⁷Ơm tĕ ring lơngai di đap Yàng Jehôwa, mơ kơ̆ tĕ nùs kơp gơn Kơnràñ; Bañ gơs nùs sơềt sơềl tài bơh cau geh bơtoah bơtoài tòm gùng dà khai dê, La cau lơh gơlik gơs ală kai gơrmơ̆i iơh khai dê.

⁸Kơryan tĕ, bañ gơjrañ tai, sang tĕ bơta gơjrañ dờng! Bañ gơs nùs sơềt sơềl, bơta hơ̆ mìng lam tus hơ bơta lơh iơh.

⁹Bơh ală cau iơh rơp gơkòl tơnroh, Mơya cau lơi kơp gơn Yàng Jehôwa gen khai rơp dòp geh lơgar.

¹⁰Dô êt jŏ tai, cau iơh bơsak ò gam tai; Bulah mê sền sơwì tòm tiah khai ơm, mơya khai ò gơs tềng hơ̆.

¹¹Mơya cau niam lơnhơn rơp dòp geh lơgar, Mơ geh hừh hơh tòm bơta lơngap lơngai wil tơl.

¹²Cau iơh bơsak kơlôi lơh iơh tòmdră di cau song ring, Mơ rkiat sề di bol khai;

¹³Mơya Yàng Jehôwa dơñŏ di cau iơh bơsak, Bơh Kơnràñ gŏ ngai lơh glài khai mòr tus.

¹⁴Cau iơh bơsak tă đào mơ wàr àtak khai dê, Nàng lơh tơlup cau rƀah lơòi mơ siơ̆u siar, Mơ tơnchơt cau lòt jat bơta song ring.

¹⁵Đào bol khai rơp srơp di nùs tòm bol khai dê, mơ àtak bol khai dê rơp pă.

¹⁶Phan cau song ring bulah dô êt, Mơya niam rlau mơ phan oă tơngkah tơngkañ ală cau iơh bơsak dê.

¹⁷Bơh tê cau iơh bơsak dê rơp pă, Mơya Yàng Jehôwa dong kòl cau song ring.

¹⁸Yàng Jehôwa git khà ngai cau wil tơl dê, Mơ phan jơtài khai dê rơp gam sùm sùm.

¹⁹Tòm ngai bòl glar bol khai ò gơkòl ƀàssìl, Tòm ngai jơgloh rung bol khai geh hòm lai.

²⁰Ai cau iơh bơsak rơp roh rui; Ală cau sò tơm di Yàng Jehôwa rơp be bơkào mơ ñhơt hàng mơnĕ tòm ƀlàng, Bol khai roh thit, lề roh be ñhŭ.

²¹Cau iơh bơsak càn mơ ò rgơi tơm wơl, Ai cau song ring gơs nùs dờng ơnàng mơ ai pà.

²²Bơh cau mơ Yàng Jehôwa ai lơngai gen rơp dòp geh lơgar, Ai cau lơi mơ Kơnràñ srat rma gen rơp kòl tơnroh.

²³Yàng Jehôwa tề lam ală cơnđòa cau dê, Mơ Kơnràñ bơtào kơ̆ khai tòm gùng dà niam nùs Kơnràñ.

²⁴Bulah khai gơtup pừ kung ò bic tơn, Tài bơh Yàng Jehôwa at tê yò đo khai.

²⁵Lài añ gam kơnòm, tŭ do neh kra, Mơya añ ò gŏ cau song ring gơkòl sang lòi ò, Hala kòn sau khai dê lòt kanadàn.

²⁶Tŭ lơi khai kung gơs nùs sơrmah sơrmài mơ ai càn, Kòn sau khai dê gơlik gơs cat lơngai cau in.

²⁷Pleh tĕ dê bơta iơh mơ lơh tĕ bơta niam, Gen mê rơp gam sùm sùm.

²⁸Bơh Yàng Jehôwa kòñ gơboh bơta song ring; Kơnràñ rơp ò sang lòi cau sàng goh Kơnràñ dê. Cau song ring geh Yàng sền gàr sùm sùm, Ai kòn sau cau iơh bơsak dê rơp kòl tơnroh.

²⁹Cau song ring rơp dòp geh lơgar, Mơ ơm tềng hơ̆ sùm sùm.

³⁰Bơr cau song ring đơs bơta jak chài, Mơ lơmpiat khai đơs jơnau song ngan.

³¹Bơta boh lam Yàng Tom Trồ khai dê ơm tòm nùs khai, Cơnđòa lòt khai dê ò gơsèng.

³²Cau iơh bơsak kơp mòc cau song ring, Mơ jòi bơta nàng tơnchơt khai.

³³Yàng Jehôwa ò sang lòi khai tòm tê cau iơh bơsak, Kung ò lòi khai kong lơh nền glài tòm tŭ khai kòl cahrña.

³⁴Kơp gơn tĕ Yàng Jehôwa, mơ lơh jat gùng dà Kơnràñ dê, Gen Kơnràñ rơp yò tơngguh mê nàng dòp geh lơgar; Mê rơp gŏ bơta tơnroh cau iơh bơsak dê.

³⁵Añ neh gŏ cau iơh bơsak gơs gơnoar pràn ngan, Mơ gơlik dờng be chi pơnàng Liban dê.

³⁶Gen añ lòt gan; ne, khai ò gam tai; Añ jòi khai mơya ò bàn.

³⁷Ai tĕ nùs kơlôi di cau ò gơs tiah geh lah pơrhơng, mơ sền tĕ di cau song ring, Bơh cau ring lơngai geh kòn sau rơ̆sơmpài ràipơjềng.

³⁸Ai ală cau tìs glài rơp kòl roh rui jơh; Kòn sau cau iơh bơsak dê rơp kòl tơnroh.

³⁹Bơta dong klàs cau song ring dê tus bơh Yàng Jehôwa; Kơnràñ la tiah kìng crŭ bol khai dê tòm tŭ bòl glar.

⁴⁰Yàng Jehôwa dong kòl mơ dong tă bol khai, Kơnràñ dong tă bol khai bơh di cau iơh bơsak, mơ dong klàs bol khai, Tài bơh bol khai kìng crŭ să he tòm Kơnràñ.