Read koho Đơs Crih 38 Bible Online

Đơs Crih 38 - koho bible

Đơs Crih 38

¹Jơnau Đơs Crih Dabit cih nàng kah kir yau Ơ Yàng Jehôwa! Dan bañ gơjrañ mơ lah pơrhơng añ, Kung bañ gơhào gơjrañ mơ lơh glài tơmàl añ.

²Bơh bơta lơh glài Kơnràñ dê be ală kam gơmut tòm să añ, Mơ tê Yàng dê klơn hơđang añ.

³Tài bơh bơta gơjrañ Yàng dê, poac să añ ò gơs tiah lơi gam niam; Tài bơh tồi glài añ jê, ntìng añ ò gơs sơmbòi.

⁴Bơh ală bơta iơh bơsak añ jê gơ ngŏ hơđang bồ añ, Gơ kơnjơ̆ ngan añ in, ò gơkrơi be dô bơta ơnòng kơnjơ̆.

⁵Tài bơh bơta bơrngơl gơla añ jê, Ală tềl sồt añ jê gơ ồm lề mơ gơrề.

⁶Añ kòl kun tơmù mơ ò tus guh, Jơh ngai mho añ moat jrùng ñìm rac.

⁷Gơlơh be ồs hơng chu pơrguc tòm but añ, Mơ poac să añ ò gơs tiah lơi gam niam.

⁸Añ kong siar roh jơh hir mơ gơlơh be lề lac jơh, Añ rơnđơh tài bơh nùs añ kơnjơ̆ ò suk ơm.

⁹Ơ Yàng, Kơnràñ git jơh ală bơta kơp kòñ añ jê, Bơta rac ròc añ jê ò ndơp di đap Yàng.

¹⁰Nùs añ gơdơrcul, pràn añ ò gam tai, Bơta àng tòm mat añ kung roh sơl.

¹¹Ală cau bơyô mơ ală oh mi añ, bol khai ntào ngài bơh bơta rung rài añ jê, Mơ ală gơp bơtiàn añ kung ơm ngài di añ sơl.

¹²Ală cau jòi bơta nàng lơh iơh di añ, bol khai đơs bơh bơta roh rui; Jơh ngai mho bol khai mìng kơlôi bơh bơta blac pơrlồm lơm.

¹³Mơya añ lơh be cau tĭ, ò kơno jơnau lơi, Be cau kloat ò pò bơr dô êt lơi.

¹⁴Ngan, añ gơlik gơs be cau ò kơno, La cau ò gơs jơnau đơs wơl tòm bơr he dê.

¹⁵Mơya, ơ Yàng Jehôwa, añ kơp gơn Kơnràñ; Ơ Jehôwa Yàng Tom Trồ añ jê, Kơnràñ la Bơtau rơp ho wơl.

¹⁶Bơh añ hòi dan lah: “Dan bañ lòi bol khai chò hòp tài bơh añ, Bol khai la cau jòng să tòmdră di añ tòm tŭ jơng añ gơsèng.”

¹⁷Añ mòr gơplơ̆ gơpừ, Bơta jê sồt gam ơm sùm mơ añ.

¹⁸Añ yal glài iơh bơsak añ jê, Añ moat jrùng bơh tồi glài añ jê.

¹⁹Ală cau sò tơm di añ ò bồ la pràn ngan, Mơ cau gơjrañ kơuềng ò bồ di añ la oă ngan.

²⁰Ală cau ai bơta iơh tơm bơta niam añ in, Kung la cau sòdră di añ, tài bơh añ jat bơta niam.

²¹Ơ Yàng Jehôwa, dan bañ sang lòi añ! Ơ Yàng Tom Trồ añ jê! Dan bañ ơm ngài bơh di añ!

²²Ơ Yàng! Kơnràñ la Bơtau dong klàs añ, Dan mhar mhar tus dong kòl añ!