Read koho Đơs Crih 39 Bible Online

Đơs Crih 39 - koho bible

Đơs Crih 39

¹Jơnau Đơs Crih Dabit cih ai Jeduthun in la cau lam bồ đơs chò Añ neh đơs lah: “Añ rơp kơrmap gàr gùng dà añ jê, Nàng añ ò tìs glài mơ lơmpiat añ jê; Tòm tŭ cau iơh bơsak gam ơm di đap añ, Añ rơp kơrmap gàr bơr añ kung be cau kèp bơr ơseh.”

²Añ ơm mŏ mŏ ò đơs dô jơnau, añ prap bơta ring lơngai kung ò kwơ; Bơta bòl glar jê sồt añ jê sơlo gơbơtơl tai.

³Nùs añ gơlik duh hul tòm añ, Tòm tŭ añ kơlôi sơnơng, ồs sa pơrguc añ, Gen lơmpiat añ đơs lah:

⁴“Ơ Yàng Jehôwa, dan ai añ in git bơta lồi dut añ jê, Mơ khà ală ngai añ jê la nđò; Lòi añ in git rài kis añ jê gơ dô mhar kàr lơi.

⁵Ne, Yàng lơh ală ngai añ jê dô êt kàr mpàng tê, Mơ rài kis añ jê be ò gơs phan lơi di đap Kơnràñ. Ngan, rài kis kòp nă dê la kung be mìng dô dơ̆ tă nhơm! (Selah)

⁶Ngan, kòp nă cơnđòa lòt ò gơkrơi be dô nơm mƀur, Bơta kơlôi rcang khai dê la ò kwơ; Cau tơrgòm pơjum phan mơna, mơya ò git ñcau rơp dòp prap.

⁷Ơ Yàng, tŭ do ñchi añ kơp gơn taih? Añ gơn kơnòm di Kơnràñ.

⁸Dan dong añ klàs di jơh ală bơta tìs glài añ jê. Bañ lòi cau bơrngơl gơla gơs kai nàng dơñŏ tơnhial di añ!

⁹Añ lơh be kloat, ò pò bơr, Tài bơh Yàng neh lơh broă hơ̆.

¹⁰Dan Yàng bañ pù lơh añ tai; Añ kong lề lac tài bơh tê Yàng lơh glài.

¹¹Tòm tŭ Yàng lơh glài tơmàl kòn mơnus tài bơh tồi glài, Gen Kơnràñ lơh siar roh bơta hàng mơnĕ khai dê ò gơkrơi be mŏ tu sa; Ngan, rài kis kòp nă dê la kung be mìng dô dơ̆ tă nhơm. (Selah)

¹²Ơ Yàng Jehôwa, dan iat jơnau hòi dan añ jê, ai tồr iat jơnau rac dan añ jê; Dan bañ ơm mŏ mŏ tòm tŭ añ hòr dà mat! Bơh añ la cau nac tòm hìu Yàng dê, Cau ơm ing be jơh ală ồng pàng añ jê.

¹³Dan bañ sền trol di añ nàng añ ñŏ chò hòp wơl, Lài mơ tŭ añ lòt thit, mơ añ ò gam tai.”