Read koho Đơs Crih 40 Bible Online

Đơs Crih 40 - koho bible

Đơs Crih 40

¹Jơnau Đơs Crih Dabit Cih. Ai Cau Lam Bồ Đơs Chò in Ngui Añ kơ̆ nùs kơp gơn Yàng Jehôwa; Kơnràñ wèt sền mơ iat jơnau rac dan añ jê.

²Kơnràñ kung tă tơngguh añ klàs bơh trồm roh gơprah, lik bơh di bŏ lơnggơr; Kơnràñ ơn jơng añ hơđang pơnai lŭ, Lơh cơnđòa lòt añ in ring lơngai.

³Kơnràñ ơn di bơr añ dô bơta đơs chò pa, Hơ̆ la bơta jòng ro Yàng Tom Trồ bol hi dê. Oă cau rơp gŏ bơta hơ̆ mơ rngòt, Gen dòn kơnòm di Yàng Jehôwa.

⁴Lơngai cau lơi in ơn nùs dòn kơnòm di Yàng Jehôwa, Ò jat cau pơnhừ să, la cau lòt tìs nrah jat ală yàng ma blac.

⁵Ơ Jehôwa Yàng Tom Trồ añ jê, ală broă crih crài Yàng neh lơh, Mơ ală bơta kơlôi sơnơng Kơnràñ dê gơwèt mơ bol hi la oă ngan, Ò gơs cau lơi rgơi pơndròm mơ Yàng! Dilah añ kòñ yal tơlik đơs bơh ală broă hơ̆, Gen gơ la oă ngan, ò jai kòp.

⁶Yàng ò kòñ phan ơn duh khoai mơ phan ơn, Mơya Kơnràñ neh pò tồr añ nàng kơno jơnau Yàng; Yàng ò sồr ơn phan ơn chu pơrguc, hala phan ơn tơwài glài.

⁷Gen añ đơs: “Do añ tus; Tòm dap sră neh cih bơh añ;

⁸Ơ Yàng Tom Trồ añ jê, añ chò hòp lơh jat nùs kòñ Kơnràñ dê; Bơta boh lam Yàng dê ơm tòm nùs añ.”

⁹Tòm mpồl jơnum dờng añ neh yal jơnau chò hòp bơh bơta dong tă; Ne, ơ Yàng Jehôwa, añ ò mềm bơr, be Kơnràñ neh git rau.

¹⁰Añ ò pồn ndơp bơta dong kòl Kơnràñ dê tòm nùs añ, Añ neh đơs bơh bơta dòn song mơ bơta dong klàs Kơnràñ dê. Di đap mpồl jơnum dờng añ ò pồn ndơp bơta kòñ gơboh kơ̆ dơn mơ bơta dòn song Kơnràñ dê.

¹¹Ơ Yàng Jehôwa, dan gơs nùs kòñ nđàc gơwèt mơ añ; Dan bơta kòñ gơboh kơ̆ dơn mơ bơta dòn song Kơnràñ dê sền gàr añ sùm.

¹²Bơh neh gơs ò git nđò bơta iơh gơrwàng gùt dar añ; Ală tồi glài iơh bơsak añ jê neh gơtuh hơđang añ, Tian gơs añ ò rgơi sền; Gơ oă rlau mơ sŏ hơđang bồ añ; nùs añ gơnsràng rngòt.

¹³Ơ Yàng Jehôwa, dan niam nùs dong tă añ! Ơ Yàng Jehôwa, dan mhar mhar dong kòl añ!

¹⁴Ală cau lơi jòi bơta nàng tơnchơt añ, Lòi bol khai in kòl ƀàssìl mơ sơlồng sơlàng jơh lơm; Ală cau lơi kòñ lơh iơh di añ, lòi bol khai in ruc wơl mơ ƀàssìl.

¹⁵Ală cau lơi đơs mơ añ: “Ne, sền tĕ khai!” Lòi bol khai in mơp dơl tài bơh bơta ƀàssìl bol khai dê.

¹⁶Ai jơh ală cau lơi jòi jat Yàng, Dan bol khai in geh chò hòp mơ hòn chò tòm Yàng; Ală cau lơi kòñ gơboh bơta dong klàs Kơnràñ dê, Dan bol khai in đơs sùm lah: “Dờng ngan la Yàng Jehôwa!”

¹⁷Ai añ do la rƀah lơòi mơ siơ̆u siar; Mơya Yàng kah kơlôi bơh añ. Kơnràñ la Bơtau dong kòl añ mơ la Bơtau dong tă añ; Ơ Yàng Tom Trồ añ jê, dan bañ lơh òbat nyà.