Read koho Đơs Crih 41 Bible Online

Đơs Crih 41 - koho bible

Đơs Crih 41

¹Jơnau Đơs Crih Dabit Cih. Ai Cau Lam Bồ Đơs Chò in Ngui Lơngai cau lơi in wèt sền di cau rƀah lơòi; Tòm ngai rung rài Yàng Jehôwa dong tă khai.

²Yàng Jehôwa jơm gòm khai, sền gàr bơta kis khai dê; Cau kòp khai la cau geh lơngai tòm lơgar; Kơnràñ ò jào phi khai jat nùs kòñ cau sò tơm di khai.

³Yàng Jehôwa yò đo khai tòm tŭ khai bic kòp; Kơnràñ sơm khai bòi jơh tòm tŭ khai kòp jê.

⁴Ai añ, añ đơs lah: “Ơ Yàng Jehôwa, dan nđàc di añ; Sơmbòi añ, bơh añ neh tìs glài tòmdră mơ Yàng.”

⁵Ală cau sò tơm di añ, ai jơnau iơh rmơh mơ đơs bơh añ lah: “Tŭ lơi khai rơp chơt mơ sơnđan khai rơp roh taih?”

⁶Tòm tŭ gơs cau tus còp añ, gen khai mìng đơs jơnau ò kwơ lơm, Nùs bol khai prap bềng bơta iơh bơsak; Tòm tŭ bol khai lik hơ bơdìh gen khai yal tơlik bơta hơ̆.

⁷Jơh ală cau lơi gơjrañ kơuềng di añ bol khai đơs chều bal mơ gơp tòmdră di añ; Bol khai kơlôi đơs lài ală bơta iơh bơh añ.

⁸Bol khai đơs lah: “Khai kòl dô bơta kòp jê iơh rmơh ngan; Khai rơp ò guh tai, bơh di tiah khai ơm bic.”

⁹Tus di cau bơyô đềt mềr añ jê mơ nùs añ dòn kơnòm, La cau neh sa piang lă añ jê, khai kung pò kơndòl jơng sò tơm di añ.

¹⁰Mơya, ơ Yàng Jehôwa, dan nđàc di añ mơ yò tơngguh añ, Gen añ rơp sal tê di bol khai.

¹¹Dilah cau sò tơm ò pha rlau mơ añ, Gen kơnòm di bơta hơ̆ añ git Yàng niam nùs di añ.

¹²Mơya Kơnràñ neh yò đo añ tài bơh bơta song ngan añ jê, Mơ ai añ in ntào kơ̆ sùm sùm di đap Kơnràñ.

¹³Pal jòng ro Yàng Jehôwa la Yàng Tom Trồ Israel dê, Bơh sùm sùm jơl tus sùm sùm ò lồi! Amen! Amen!