Read koho Đơs Crih 42 Bible Online

Đơs Crih 42 - koho bible

Đơs Crih 42

¹Jơnau Đơs Crih Kòn Sau Kôra Cih Nàng Bơto Sồr. Ai Cau Lam Bồ Đơs Chò in Ngui Ơ Yàng Tom Trồ, hwềng soàn añ kòñ ngan geh Yàng, Kung be jùn me tơhìr ngan dà croh.

²Hwềng soàn añ tơhìr Yàng Tom Trồ, la Yàng Tom Trồ gam kis sùm. Tŭ lơi añ rơp lòt tus mơ tìp mat Yàng Tom Trồ taih?

³Tòm tŭ cau lùp sùm lah: “Ntềng đah Yàng Tom Trồ mê dê taih?” Gen dà mat lơh gơs phan sa añ jê ngai mơ mang.

⁴Tòm tŭ nùs añ moat jrùng jê sồt, añ kah wơl ală bơta do: Añ neh lòt bal mơ mpồl gal. Añ lam bol khai tus hơ hìu Yàng Tom Trồ; Bol khai driau chò mơ đơs chò jòng ro Yàng.

⁵Ơ hwềng soàn añ jê, ñchi bơh tài mê gơplơ̆ nùs mơ ò suk ơm taih? Gơn kơnòm tĕ di Yàng Tom Trồ, bơh añ rơp jòng ro Kơnràñ tai, La Bơtau dong kòl añ mơ la Yàng Tom Trồ añ.

⁶Ơ Yàng Tom Trồ, hwềng soàn añ siar roh tòm añ, Gen tàng bơh lơgar Jordan, bơh mơnơm Hermôn, mơ bơh dòr Mijar, añ kơlôi kah Kơnràñ.

⁷Cìr jrô hòi cìr jrô, nggồr ală liang jrài Kơnràñ dê; Ală ryà mơ dà tih Kơnràñ dê neh bồr ndơp añ.

⁸Tòm trồ ngai Yàng Jehôwa ai añ in bơta kòñ gơboh kơ̆ dơn, Mơ tòm trồ mang Yàng ai añ in bơta đơs chò Kơnràñ dê, Hơ̆ la bơta hòi dan mơ Yàng Tom Trồ la Yàng bơta kis añ jê.

⁹Añ đơs mơ Yàng Tom Trồ pơnai lŭ klềr añ jê lah: “Ñchi bơh tài Kơnràñ neh lòi hŭi añ taih? Ñchi bơh tài añ ñìm rac tài bơh ală cau sò tơm rồn bơklơn añ taih?”

¹⁰Tòm tŭ ală cau sò tơm dơñŏ tơnhial mơ lùp sùm lah: “Ntềng đah Yàng Tom Trồ mê dê taih?” Gen bơta hơ̆ ò gơkrơi be bol khai lơh jê sồt di să añ.

¹¹Ơ hwềng soàn añ jê, ñchi bơh tài mê gơplơ̆ nùs mơ ò suk ơm taih? Gơn kơnòm tĕ di Yàng Tom Trồ, bơh añ rơp jòng ro Kơnràñ tai, La Bơtau dong kòl añ mơ la Yàng Tom Trồ añ jê.