Read koho Đơs Crih 44 Bible Online

Đơs Crih 44 - koho bible

Đơs Crih 44

¹Jơnau Đơs Crih kòn sau Kôra cih nàng bơto sồr. Ai cau lam bồ đơs chò in ngui Ơ Yàng Tom Trồ, tồr bol hi neh kơno, Ồng pàng bol hi neh yal wơl Ală broă Kơnràñ neh lơh tòm rài bol khai dê, tòm ală ngai yau òr;

²Yàng neh ngui tê tòm Kơnràñ dê bơtrơh ală lơgar, mơya Kơnràñ tam ồng pàng bol hi dê. Yàng lơh ală làng bol in gơprah gơpring, mơya lơh ồng pàng bol hi in geh khat gơboh.

³Bơh bol khai ò di kơnòm di đào tòm bol khai dê mơ geh lơgar, Kung ò kơnòm di tơwòr tê tòm bol khai dê mơ geh pha; Mơya kơnòm di tê ma Yàng dê, Bơh Yàng neh hừh nùs di bol khai.

⁴Yàng la Bơtau mơ la Yàng Tom Trồ añ jê, La Bơtau neh lơh nền ai Jakôp in geh pha.

⁵Kơnòm di Yàng, bol hi tơlo gơpừ ală cau sò tơm di bol hi. Kơnòm di sơnđan Yàng, bol hi jă di ală cau sòdră di bol hi.

⁶Bơh añ ò di kơnòm di àtak añ, Đào añ kung ò rgơi dong klàs añ.

⁷Mơya Yàng neh dong bol hi klàs di cau sò tơm di bol hi, mơ lơh ƀàssìl di cau gơjrañ kơuềng di bol hi.

⁸Bol hi neh jòng să he sùm tòm Yàng Tom Trồ, Mơ bol hi rơp ưnngài sơnđan Kơnràñ sùm sùm. (Selah)

⁹Bulah behơ̆ Yàng neh sang bol hi, lòi bol hi kong ƀàssìl, Kơnràñ ò tai lik lòt bal mơ mpồl ling bol hi dê.

¹⁰Yàng lơh bol hi in ruc wơl di đap cau tòmlơh mơ bol hi, mơ cau sò tơm di bol hi dòñ ai phan hi dê.

¹¹Yàng neh lơh bol hi in be belàt cau cèng lơh poac, Mơ neh lơh bol hi in nrah nring tòm ală lơgar.

¹²Yàng neh tac làng bol Kơnràñ dê dô bă ƀuơn ngan, ò jòi khà priă kas màng di bol khai.

¹³Yàng lơh bol hi in be phan cau gơp ƀòn hi dơñŏ tơnhial, Be phan bơtat bơtròh mơ bơrsèl tơnhial gùt dar bol hi.

¹⁴Yàng lơh bol hi in be dô jơnau pơnđik digùl ală làng bol, mơ la dô jơnau dơñŏ tơnhial digùl ală làng bol.

¹⁵Kòp ngai bơta sền òsơp ơm sùm di đap añ, Bơta ƀàssìl añ jê jơm gòm di mat añ,

¹⁶Tài bơh jơnau cau dơñŏ tơnhial mơ lah sơrpah, ơm di đap cau sò tơm mơ cau sal tê.

¹⁷Bulah bol hi ò hŭi Yàng, Kung ò lơh ma blac mơ bơta ho bal Yàng dê, Mơya ală bơta hơ̆ neh gơlik tus bol hi in.

¹⁸Nùs bol hi ò ruc wơl, Cơnđòa bol hi kung ò pleh bơh di gùng Yàng.

¹⁹Bulah behơ̆, Yàng neh lơh bol hi in lề lac tòm tiah so brê ơm, Ơn bol hi tòm bơta klam jơngo cik.

²⁰Dilah bol hi neh hŭi sơnđan Yàng Tom Trồ bol hi dê, Hala pò tê hơ dô nă yàng ndai,

²¹Gen Yàng Tom Trồ ò rgơi git sơl ơ? Bơh Kơnràñ git bơta ndơp ndơr tòm nùs cau dê.

²²Ngan tài bơh Yàng tàng bol hi kong cau tơnchơt kòp ngai; Bol khai sền bol hi be belàt cau neh lơh nền nàng lơh poac.

²³Ơ Yàng, dan guh! Ñchi bơh tài Kơnràñ bic taih? Dan kah! Bañ sang lòi bol hi sùm sùm!

²⁴Ñchi bơh tài Yàng pồn mat taih? Ñchi bơh tài Kơnràñ lơh hŭi bơta bòl glar mơ bơta rồn bơklơn di bol hi taih?

²⁵Bơh bol hi neh gơtơmù tus tòm kơmbuh ù, Să jan bol hi gơđềt di ù.

²⁶Dan Yàng guh mơ dong kòl bol hi! Dan Yàng ai nùs kòñ gơboh kơ̆ dơn Kơnràñ dê mơ dong tă bol hi.