Read koho Đơs Crih 45 Bible Online

Đơs Crih 45 - koho bible

Đơs Crih 45

¹Jơnau Đơs Crih kòn sau Kôra cih nàng bơto sồr bơh bơta kòñ gơboh. Ai cau lam bồ đơs chò in ngui, jat sap đơs chò sơnđan la Bơkào Lili Nùs añ bềng lìu ală jơnau đơs niam; Añ đơs jơnau đơs crih cau bơtau in, Lơmpiat añ kung be gai cih cau gơnoar cih chài rgơi.

²Bơtau la hàng mơnĕ rlau mơ ală kòn sau jơi kòn mơnus dê; Jơnau đơs bơr sơndồi bơtau dê la bềng bơta nđàc; Tài behơ̆ Yàng Tom Trồ neh ai lơngai bơtau in gam sùm sùm.

³Ơ bơtau pràn kơldang, dan kơt đào di but, Tòm bơta gơklŏ mơ bơta ryŭ ryơm.

⁴Tài bơh jơnau song, nàng sền gàr bơta song ngan, Tòm bơta ryŭ ryơm bơtau hào bơta pha lin rlau; Lòi tê ma bơtau dê bơto bơtau lơh ală broă cau pal rngòt.

⁵Ală kam bơtau dê la sồt, Pañ bluh nùs cau sò tơm bơtau dê, Ală làng bol gơpừ hơđơm jơng bơtau dê.

⁶Ơ Yàng Tom Trồ, sơbàn Kơnràñ dê gam sùm sùm ò lồi. Gai gơnoar at bồ cau bơtau dê la gai gơnoar song ring.

⁷Bơtau kòñ gơboh bơta song ring, gơjrañ kơuềng di bơta iơh bơsak. Gen tàng Yàng Tom Trồ, la Yàng Tom Trồ bơtau dê, Neh ai bơtau in bơta hòn chò be bong mơñà di bơtau, rlau mơ ală gơp bơyô bơtau dê.

⁸Ală ào bơtau dê gơs ƀô bơlhu cài trŭ, kơlhô, kơmhò kwê̆; Tòm ală gơlang mơ bla gơs jơnau ntas pĕ kơñi lơh bơtau in chò hòp.

⁹Tòm mpồl ală cau ùr màng ryŭ bơtau dê gơs ală kòn ùr ală bơtau dê, Bau ùr cau bơtau bơka să mơ màh Ôphir ntào đah ma bơtau.

¹⁰Ơ kòn ùr, iat tĕ, kơlôi sơnơng tĕ, ai tồr iat tĕ; Hŭi tĕ làng bol mơ hìu nhă bèp ai dê,

¹¹Gen bơtau rơp kòñ bơta hàng mơnĕ ai dê; Bơh khai la bơtau ai dê, cùn khoai tĕ khai.

¹²Làng bol Tirơ rơp cèng phan ơn, Mơ ală cau pas gơs rlau jơh tòm làng bol rơp cèng tơl bơta pas sơm nàng dan geh bơta nđàc ai dê.

¹³Kòn ùr bơtau dê tòm ơdŭ khai dê soh ào tàñ bơrlŭ mơ màh.

¹⁴Khai soh ào oă bơnga mơ geh lam tus di đap bơtau, Bơh tơnơ̆ cau ơruh la bơyô lòt jat khai.

¹⁵Bol khai hòn chò hừh hơh Tòm tŭ geh lam tus mut tòm gơlang bơtau.

¹⁶Ală kòn klau bơtau dê rơp ala ală ồng pàng bơtau dê; Bơtau rơp bơtào bol khai lơh gơs kòn bơtau at bồ tòm làm dunnia.

¹⁷Añ rơp lơh sơnđan bơtau in geh kah wơl tòm jơh ală rài; Behơ̆ ală làng bol rơp jòng ro Kơnràñ sùm sùm ò lồi.