Read koho Đơs Crih 46 Bible Online

Đơs Crih 46 - koho bible

Đơs Crih 46

¹Bơta đơs chò. Jơnau Đơs Crih kòn sau Kôra cih. Ai cau lam bồ đơs chò in ngui, jat sap đơs chò cau ơruh dê Yàng Tom Trồ la tiah kìng crŭ mơ bơta pràn kơldang bol he dê; Kơnràñ gơs mat nàng dong kòl tòm bơta bòl glar.

²Tài bơh hơ̆ bol he ò gơs rngòt, bulah ù gơs tòmgơl, Bulah mơnơm gơlơnggơr tòm kơnàng dàlềng, (Selah)

³Bulah dàlềng nggồr ur ur mơ gơlik kơmbuh, Bulah ală mơnơm gơlơnggơr tài bơh bơta gơtơngguh ryà dà dê. (Selah)

⁴Gơs dô nơm hiòng dà, ală ntê dà hơ̆ lơh chò hòp ƀòn Yàng Tom Trồ dê, La tiah ơm sàng goh Bơtau Hơđang Rlau Jơh dê.

⁵Yàng Tom Trồ ơm digùl ƀòn hơ̆, ƀòn hơ̆ ò wañ lơnggơh; Rìng àng drim Yàng Tom Trồ dong kòl gơ.

⁶Ală làng bol lơh nggồr nggàc, ală lơgar tơrluh tơrlơm; Yàng tơlik jơnau ntas, gen ù lề jơh.

⁷Yàng Jehôwa Mpồl Ling dê ơm bal mơ bol he, Yàng Tom Trồ Jakôp dê la tiah kìng crŭ bol he dê. (Selah)

⁸Tus tĕ sền ală broă lơh Yàng Jehôwa dê, Hơ̆ la Kơnràñ neh lơh tơrlah hơđang ù.

⁹Kơnràñ wàs jơh kơlìn làm jơh plai ù, Dơrpă ală àtak, koh ală tà gơs rpot rpet, Mơ chu ală rơndeh ơseh tòm ồs.

¹⁰Yàng đơs lah: “Ơm tĕ mŏ mŏ mơ git lah Añ la Yàng Tom Trồ. Añ geh bơtào jơnhoa hơđang ală làng bol, Mơ Añ geh bơtào jòng hơđang ù sơl.”

¹¹Yàng Jehôwa Mpồl Ling dê ơm bal mơ bol he, Yàng Tom Trồ Jakôp dê la tiah kìng crŭ bol he dê. (Selah)