Read koho Đơs Crih 49 Bible Online

Đơs Crih 49 - koho bible

Đơs Crih 49

¹Jơnau Đơs Crih kòn sau Kôra cih. Ai cau lam bồ đơs chò in Ơ jơh ală làng bol, iat tĕ jơnau do! Ơ ală cau ơm tòm dunnia, ai tĕ tồr iat,

²Bulah la cau làng hala cau kwang, Cau pas gơs hala cau rƀah lơòi

³Bơr añ rơp đơs jơnau jak chài; Nùs añ rơp kơlôi sơnơng bơta git wă.

⁴Añ rơp ai tồr iat jơnau pơnđik; Añ rơp pĕ kơñi mơ yal tơlik jơnau pơnhồr añ jê.

⁵Ñchi bơh tài añ pal rngòt tòm ngai bòl glar, Tòm tŭ bơta tồi glài iơh bơsak ală cau rồn bơklơn gơrwàng gùt dar añ taih?

⁶Bol khai kơnòm di phan mơna he dê, Jòng să bơh phan mơna lìu làc he dê.

⁷Ngan, ò gơs cau lơi rgơi tơwài să tòm he dê, Hala tơm khà phan tơwài khai Yàng Tom Trồ in,

⁸Bơh khà phan tơwài bơta kis khai dê la kas ngan, Ò gơs tŭ lơi tơl,

⁹Tồ khai in geh kis sùm sùm, Ò gơs tŭ lơi gŏ bơta ồm lề.

¹⁰Ngan, khai rơp gŏ bulah cau jak chài kung chơt, Cau bơrngơl mơ cau gơla kung pal chơt roh behơ̆ sơl, Mơ lòi phan mơna he dê cau ndai in.

¹¹Bơtô ƀồc bol khai la hìu ơm bol khai dê gam sùm sùm, La tiah ơm bol khai dê tòm jơh ală rài, Bulah bol khai neh gơs ù tiah tòm bol khai dê.

¹²Kòn mơnus ò rgơi klàs chơt kơnòm di bơta màng ryŭ bol khai dê, Khai kung be phan poan jơng pal chơt roh.

¹³Hơ̆ la bơta lồi dut ală cau bơrngơl gơla. Bal mơ jơh ală cau jòi jat bơta niam nùs bol khai dê. (Selah)

¹⁴Bol khai kòl lơh nền mut tòm lơgar Làng ƀồc kung be dô mpồl belàt; Bơta chơt rơp ê gàr bol khai; Bol khai mù song tus tòm bơtô ƀồc, Să jan bol khai dê rơp ồm lề; Lơgar Làng ƀồc rơp la tiah ơm bol khai dê.

¹⁵Mơya Yàng Tom Trồ rơp tơwài hwềng soàn añ bơh di gơnoar lơgar Làng ƀồc, Bơh Kơnràñ rơp wă rò añ. (Selah)

¹⁶Bañ rngòt tòm tŭ gơs cau lơi gơlik pas sơm, Tòm tŭ bơta gơklŏ hìu hơ̆ dê gơbơtơl oă.

¹⁷Bơh tòm tŭ khai chơt khai ò rgơi cèng phan lơi, Bơta gơklŏ khai dê kung ò mù jat khai ò.

¹⁸Bulah tòm tŭ gam kis khai kòp să tòm he la chò hòp, Mơ bulah cau geh jòng ro tòm tŭ khai lơh niam gơwèt mơ să tòm he,

¹⁹Mơya khai rơp chơt kung be ală ồng pàng khai dê; Bol khai ò gơs tŭ lơi gŏ bơta àng tai.

²⁰Kòn mơnus ò rgơi klàs chơt kơnòm di bơta màng ryŭ khai dê, Khai kung be phan poan jơng roh rui hơ̆.