Read koho Đơs Crih 50 Bible Online

Đơs Crih 50 - koho bible

Đơs Crih 50

¹Jơnau Đơs Crih Asap cih Bơtau Gơnap Gơnoar la Yàng Tom Trồ, la Yàng Jehôwa đơs mơ hòi pơjum cau tòm dunnia, Bơh đah mattơngai lik jơl tus di đah mattơngai mut.

²Bơh di Siôn hàng mơnĕ wil tơl, Yàng Tom Trồ ràng tơlik să tòm Kơnràñ.

³Yàng Tom Trồ bol he dê tus mơ ò ơm mŏ mŏ; Di đap Kơnràñ gơs ồs chu pơrguc, Gùt dar Kơnràñ gơs càl rbut dờng.

⁴Kơnràñ hòi ală tap trồ hơđang mơ ù hơđơm sơl, Nàng cahrña làng bol Kơnràñ dê:

⁵“Pơjum tĕ hơ Añ ală cau dòn song Añ jê, La ală cau neh bơtào dô bơta ho bal mơ Añ mơ phan ơn pơdơng.”

⁶Ală tap trồ bơto yal bơta song ring Kơnràñ dê, Tài bơh să tòm Yàng Tom Trồ la Bơtau cahrña! (Selah)

⁷Yàng đơs lah: “Ơ làng bol Añ jê, iat tĕ, Añ rơp đơs; Ơ Israel, Añ rơp lơh cơng tòmdră mơ mê. Añ la Yàng Tom Trồ, hơ̆ la Yàng Tom Trồ mê dê;

⁸Añ ò lah pơrhơng mê bơh ală phan duh khoai mê dê; Ală phan ơn chu pơrguc mê dê gơ ơm sùm di đap Añ.

⁹Añ rơp ò dòp kơnrồ dam bơh di hìu mê, Kung ò dòp be dam bơh di mpồl mê dê,

¹⁰Bơh jơh ală phan poan jơng gơrê mơ Añ, Bơh jơh ală phan poan jơng hơđang bồ mơnơm kung behơ̆ sơl.

¹¹Añ git jơh ală sềm hơđang pah gòi, Jơh ală phan wañ tòm ƀlàng la gơrê bal mơ Añ.

¹²Dilah Añ jơgloh Añ ò càng yal mê in git, Bơh lơgar dunnia mơ jơh ală phan tòm gơ la gơrê bal mơ Añ.

¹³Añ sa poac kơnrồ dam, hala hùc mhàm be dam sơl ơ?

¹⁴Ai tĕ bơta ưnngài lơh gơs phan ơn duh khoai Yàng Tom Trồ in, Mơ tơm bơta ho pơgon mê dê Bơtau Hơđang Rlau Jơh in.

¹⁵Hòi dan tĕ mơ Añ tòm ngai bòl glar; Añ rơp dong tă mê, mơ mê rơp lơh gơklŏ Añ in.”

¹⁶Mơya Yàng Tom Trồ đơs mơ cau iơh bơsak lah: Mbe mê khin yal wơl ală jơnau sồr Añ jê taih? Ñchi bơh tài sơndồi mê đơs bơh bơta ho bal Añ jê taih?

¹⁷Bơh mê gơjrañ kơuềng di bơta lơh glài tơmàl, Ală jơnau đơs Añ jê mê sang lòi đah ngkòi mê dê.

¹⁸Tòm tŭ mê gŏ cau ntung kơñau, Gen mê lơh bơyô mơ khai, mê lơh gơs dô bă bal mơ cau rềs àr bơrnàn.

¹⁹Mê lòi bơr mê đơs iơh dô bă khat gơboh, Lơmpiat mê ò rngòt đơs bơta blac pơrlồm.

²⁰Mê nggui đơs tòmdră di oh mi mê dê, Đơs joh kòn klau mè mê dê.

²¹Hơ̆ la ală bơta mê neh lơh, ai Añ ơm mŏ mŏ, Mê tồnlah Añ la dô nă cau be să tòm mê lơm. Mơya tŭ do Añ lah pơrhơng mê, mơ ơn ală bơta hơ̆ di đap mat mê.

²²Behơ̆, ơ ală cau hŭi Yàng Tom Trồ, kơlôi kah tĕ bơta do, rngòt Añ crè mê rpot rpet, mơ ò gơs cau lơi dong tă mòn.

²³Cau lơi ai bơta ưnngài lơh gơs phan ơn duh khoai la dòn duh Añ; Ai cau lơi lòt jat gùng song, Añ rơp sơnio khai in bơta dong klàs Yàng Tom Trồ dê.