Read koho Đơs Crih 54 Bible Online

Đơs Crih 54 - koho bible

Đơs Crih 54

¹Jơnau Đơs Crih Dabit cih nàng bơto sồr, tòm tŭ cau ƀòn Jip neh tus yal mơ Sol lah: “Dabit pồn să digùl bol he.” Ơ Yàng Tom Trồ, dan ai sơnđan Kơnràñ mơ dong klàs añ, Ngui gơnoar pràn Kơnràñ dê mơ yal tơlik añ la song ring.

²Ơ Yàng Tom Trồ, dan iat jơnau hòi dan añ jê; Ai tồr iat ală jơnau añ đơs.

³Bơh cau đơs iơh pơnhừ să neh bơtào tơngguh tòmdră mơ añ, Cau iơh rmơh kòñ tơnchơt añ; bol khai ò ơn Yàng Tom Trồ di đap bol khai. (Selah)

⁴Mơya ngan, Yàng Tom Trồ la Bơtau dong kòl añ; Yàng la Bơtau yò tơngguh bơta kis añ jê.

⁵Kơnràñ rơp sal wơl bơta iơh bơsak di ală cau sò tơm di añ; Dan tơnroh bol khai jat be bơta song ngan Kơnràñ dê.

⁶Añ rơp ơn phan duh khoai bơh nùs kòñ ơn Kơnràñ in; Añ rơp ưnngài sơnđan Yàng dê, bơh bơta hơ̆ la niam; Ơ Yàng Jehôwa.

⁷Bơh Kơnràñ neh dong tă añ klàs bơh jơh ală bơta bòl glar, Mat añ neh gŏ cau sò tơm di añ kong alah.