Read koho Đơs Crih 55 Bible Online

Đơs Crih 55 - koho bible

Đơs Crih 55

¹Jơnau Đơs Crih Dabit cih nàng bơto sồr. Ai cau lam bồ đơs chò in ngui mơ kơñi pĕ Ơ Yàng Tom Trồ, dan ai tồr iat jơnau hòi dan añ jê; Bañ pồn să Kơnràñ bơh di jơnau rac dan añ jê.

²Dan iat mơ ho wơl añ in; Añ ò suk ơm bơh bơta bòl glar mơ jơnau yoam añ jê.

³Tài bơh jơnau đơs pơhìn cau sò tơm dê, Mơ tài bơh bơta rồn bơklơn cau iơh bơsak dê gen nùs añ dơrcul. Bơh bol khai cèng bơta bòl glar tus hơ añ, Mơ bol khai lơh iơh di añ dô bă gơjrañ mañ.

⁴Nùs añ jê sồt ngan tòm să añ, Bơta rngòt rngơt bơh di bơta chơt ơm hơđang añ.

⁵Bơta rngòt mơ bơta rơm să tus hơđang añ, Bơta kìr rngòt kup añ.

⁶Añ đơs: “Ôih, kơp kòñ añ gơs pơnđar be ntòp! Gen añ rơp par thit mơ geh ơm lơngap lơngai;

⁷Ngan añ rơp dô ngài ngan, añ rơp ơm tòm ƀlàng ngềt ngơt.

⁸Añ rơp sơrbac sơrbang jòi tiah kìng crŭ añ in, bơh di càl dờng Mơ bơh di rbut dờng.”

⁹Ơ Yàng, dan tơnroh bơta bơyai bol khai dê, mơ lơh sơlồng sơlàng jơnau đơs bol khai dê, Bơh añ gŏ bơta iơh rhung rhang mơ bơta tòmpìt tòmhà tòm ƀòn dờng.

¹⁰Ngai mơ mang bol khai lòt gùt dar gơ hơđang dơrñang ƀòn; Bơta lơh iơh mơ bơta bòl glar ơm digùl ƀòn;

¹¹Bơta tơnroh kung ơm digùl ƀòn hơ̆; Bơta rồn bơklơn mơ bơta jak pơrlồm ò cah ngài bơh di ală drà ƀòn dê.

¹²Bơh ò di la cau sò tơm bơtat bơtròh añ, dilah behơ̆ añ rgơi kong jai; Kung ò di la cau sòdră di añ bơtào tơngguh tòmdră di añ dô bă pơnhừ să, Dilah behơ̆ añ rgơi pồn să bơh di khai.

¹³Mơya hơ̆ la să tòm mê, la cau ndròm bal mơ añ, Oh mi bơyô añ, mơ bơyô đềt mềr añ jê.

¹⁴Bol he neh tòmbơhbơr bal dô bă bơkah lơngồt; Bol he neh gơs bơta ring lơngai lòt tus tòm hìu Yàng Tom Trồ dê.

¹⁵Lòi bơta chơt tus nisơna di bol khai! Lòi bol khai dùh tòm lơgar làng ƀồc tòm tŭ gam kis, Tài bơh bơta iơh bơsak ơm tòm hìu bol khai mơ ơm tòm nùs bol khai.

¹⁶Mơya añ hòi dan mơ Yàng Tom Trồ, Gen Yàng Jehôwa rơp dong klàs añ.

¹⁷Mho, drim mơ gùl ngai, añ rac ròc mơ pơt wòl, Mơ Kơnràñ rơp kơno jơnau đơs añ jê.

¹⁸Kơnràñ rơp dong tă hwềng soàn añ ò gơkòl roh gơprah, klàs bơh bơta tòmlơh bơh jền tơngai añ jê, Bơh gơs oă ngan cau pơjum tòmdră mơ añ.

¹⁹Yàng Tom Trồ la Bơtau neh at bồ bơh sơnròp ò git lồi, Rơp kơno mơ tơmù bol khai. (Selah) Tài bơh bol khai ò prap bơta boh lam lơi, Kung ò duh rngòt di Yàng Tom Trồ sơl.

²⁰Oh mi bơyô añ jê neh ai tê tòmdră di ală cau bơyô khai dê, Khai neh sang lòi bơta ho bal khai dê.

²¹Jơnau đơs khai dê ntiar rlau mơ dơngi dà toh, Mơya tòm nùs gơs bơta kơlìn gơtoă; Ală jơnau khai dê lơbơn rlau mơ mơñà, Mơya ngan la đào rlai.

²²Jào tĕ bơta àñ kơnjơ̆ mê dê Yàng Jehôwa in, Kơnràñ rơp yò đo mê; Kơnràñ ò gơs tŭ lơi lòi cau song ring kong wañ lơnggơh.

²³Mơya, ơ Yàng Tom Trồ, Yàng rơp tơmut bol khai tòm trồm bơta roh rui; Hơ̆ la cau kòñ lơh gơtuh mhàm mơ cau blac pơrlồm ò geh kis tus digùl ngai Yàng neh lơh nền bol khai in. Ai añ, añ rơp dòn kơnòm di Yàng.