Read koho Đơs Crih 57 Bible Online

Đơs Crih 57 - koho bible

Đơs Crih 57

¹Jơnau Đơs Crih Dabit cih tòm tŭ khai dô bơh di Sol tòm trồm lŭ. Ai cau lam bồ đơs chò in ngui. Jat sap đơs chò “Bañ Tơnroh” Dan kòñ nđàc di añ; ơ Yàng Tom Trồ, dan kòñ nđàc di añ, Bơh hwềng soàn añ kìng crŭ tòm Yàng. Ngan, añ rơp kìng crŭ să añ tòm tiah mƀur đar Kơnràñ dê, Jơl tus di tŭ ală càl rbut dờng bơta tơnroh neh rlau rau.

²Añ hòi dan mơ Yàng Tom Trồ Hơđang Rlau Jơh, Hơ̆ la Yàng Tom Trồ lơh gơlik wil tơl bơta lơh nền lài Kơnràñ dê añ in.

³Bơh đang trồ Kơnràñ rơp sồr mơ dong klàs añ, Kơnràñ rơp lơh ƀàssìl di ală cau in jă trơm hơđang añ. (Selah) Yàng Tom Trồ rơp sồr bơta kòñ gơboh kơ̆ dơn mơ bơta dòn song Kơnràñ dê tus.

⁴Añ bic digùl ală klìu triă, Hơ̆ la phan sa loan poac kòn mơnus; Bol gơ gơs sề be ală tà mơ ală kam, Mơ lơmpiat bol gơ be đào sồt.

⁵Ơ Yàng Tom Trồ, dan Yàng geh bơtào jơnhoa rlau mơ ală tap trồ! Dan bơta gơklŏ Yàng dê geh làm jơh plai ù!

⁶Bol khai neh dang bơtơng di cơnđòa añ jê, Hwềng soàn añ kòl kun tơmù. Bol khai neh tò dô nơm tơrluh tòm gùng añ jê, Mơya să tòm bol khai neh gơdùh tòm hơ̆. (Selah)

⁷Ơ Yàng Tom Trồ, nùs añ kơ̆ cê, nùs añ kơ̆ cê! Añ rơp đơs chò mơ jòng ro Yàng.

⁸Ơ hwềng soàn añ jê, kah rngal tĕ! Ơ kơñi pĕ mơ kơñi gòng, kah rngal tĕ! Añ rơp pơrlai àng drim!

⁹Ơ Yàng Jehôwa, añ rơp ưnngài Kơnràñ digùl ală làng bol; Añ rơp đơs chò jòng ro Kơnràñ digùl ală lơgar.

¹⁰Bơh bơta kòñ gơboh kơ̆ dơn Kơnràñ dê jơnhoa be ală tap trồ, Bơta dòn song Kơnràñ dê guh tus hơ ală mhwal.

¹¹Ơ Yàng Tom Trồ, dan Yàng geh yò tơngguh jơnhoa hơđang ală tap trồ! Dan bơta gơklŏ Kơnràñ dê geh làm jơh plai ù!