Read koho Đơs Crih 63 Bible Online

Đơs Crih 63 - koho bible

Đơs Crih 63

¹Jơnau Đơs Crih Dabit cih tòm tŭ khai ơm tòm ƀlàng ngềt ngơt lơgar Juda dê Ơ Yàng Tom Trồ, Kơnràñ la Yàng Tom Trồ añ jê, añ jòi jat Yàng, Hwềng soàn añ tơhìr bơh Kơnràñ; poac să añ kơp kòñ Kơnràñ, Be ơm tòm ù tiah rañ rsơh, bòl glar, mơ ò gơs dà.

²Behơ̆ añ neh tơnggòr sền di Yàng tòm tiah sàng goh Kơnràñ dê, Sền gŏ gơnap gơnoar mơ bơta gơklŏ Kơnràñ dê.

³Tài bơh bơta kòñ gơboh kơ̆ dơn Kơnràñ dê la niam rlau mơ bơta kis, Gen bơr sơndồi añ rơp jòng ro Kơnràñ.

⁴Behơ̆ añ rơp jòng ro Kơnràñ jơl jơh rài kis añ jê; Añ rơp pò tê hòi dan di sơnđan Kơnràñ.

⁵Hwềng soàn añ geh hòm lai gơlơh be neh sa khu mơ dơngi; Bơr sơndồi añ jòng ro Kơnràñ dô bă chò hòp,

⁶Tòm tŭ añ ơm hơđang cơnòng bic mơ kah Yàng, Mơ añ kơlôi sơnơng bơh Kơnràñ tòm ală tŭ jơ drơng mang.

⁷Bơh Yàng neh dong kòl añ, Tòm tiah mƀur pơnđar Kơnràñ dê añ rơp đơs chò bơh nùs hòn chò.

⁸Hwềng soàn añ gơđềt mơ Kơnràñ; Tê ma Kơnràñ dê yò tơngguh añ.

⁹Mơya ală cau jòi bơta nàng tơnchơt añ, Bol khai rơp kòl tơmù tòm tiah jrô plai ù dê.

¹⁰Bol khai rơp kong tơnchơt mơ đào, Lơh gơs phan sa so brê in.

¹¹Mơya cau bơtau rơp chò hòp tòm Yàng Tom Trồ; Jơh ală cau lơi sơnio Kơnràñ mơ srat să gen rơp jòng să tòm Kơnràñ; Bơh bơr ală cau đơs blac rơp gơkòl tơmềm wơl.