Read koho Đơs Crih 65 Bible Online

Đơs Crih 65 - koho bible

Đơs Crih 65

¹Bơta đơs chò. Jơnau Đơs Crih Dabit cih ai cau lam bồ đơs chò in ngui Ơ Yàng Tom Trồ, Kơnràñ pal geh jòng ro tòm Siôn; Mơ cau rơp tơm Kơnràñ in bơta bol khai ho pơgon.

²Ơ Bơtau iat jơnau hòi dan, Jơh ală kòn mơnus rơp lòt tus hơ Kơnràñ.

³Tòm tŭ ală tồi glài iơh bơsak bol hi dê pha rlau mơ bol hi, Gen Kơnràñ toh glài bol hi in.

⁴Lơngai cau lơi in geh Kơnràñ sac rwah mơ cèng tus rềp, Nàng ơm tòm tiah ơm Kơnràñ dê. Bol hi rơp geh hừh hơh bơh ală bơta niam tòm hìu Kơnràñ dê, la Hìu Duh Khoai Sàng Goh Kơnràñ dê.

⁵Ơ Yàng Tom Trồ la Bơtau Dong Klàs bol hi, Kơnràñ ho wơl bol hi in bơh ală broă lơh pal rngòt nàng dong tă bol hi; Yàng Tom Trồ la bơta dong klàs bol hi dê; Yàng la bơta gơn kơnòm jơh ală cau tòm tiah lồi dut plai ù dê; mơ ală cau ơm tòm tiah ngài rlau jơh dàlềng dê.

⁶Bơh bơta pràn Kơnràñ dê, Yàng bơtào kơ̆ ală mơnơm, Bơh Yàng kơt but mơ gơnoar pràn Kơnràñ dê.

⁷Yàng lơh ring ngềt bơta nggồr dàlềng dê, bơta nggồr ală ryà gơ dê, Mơ bơta sơlồng sơlàng làng bol dê.

⁸Ală cau ơm tòm nhàr ngài rlau jơh plai ù dê rngòt bơh tềl krơi Kơnràñ dê; Yàng lơh ală mpồng dờng driau hòn chò tòm tŭ àng drim mơ tòm tŭ trồ mho.

⁹Yàng lòt còp ù tiah mơ tuh dà gơ in, Lơh gơ in gơlik ù bơkah tiah lơngồt; Hiòng Yàng Tom Trồ dê bềng dà; Kơnràñ ai cau in phan sa bơh Kơnràñ neh rcang lài.

¹⁰Kơnràñ tuh oă dà tòm ală gùng lơòr, lơh ring ù tiah ò ring, Ai mìu nhàc lơh ù in lơbơn, mơ ai lơngai ală phan tam in.

¹¹Kơnràñ tơndau sơgơn bơtau ală sơnam in bơh nùs dờng ơnàng Kơnràñ dê. Tềl jơng Kơnràñ lòt gan ù gơhòr lik bơta pas sơm.

¹²Ală ƀlàng ñhơt tòm tiah ngềt ngơt gơlik tơlir niam, Mơ ală mơnơm dềt mpong jơnau driau chò hòp.

¹³Ală ƀlàng ñhơt bềng mpồl belàt, Ală thòng bềng kòi lơm; Bol khai driau dờng mơ đơs chò bơh hòn chò.