Read koho Đơs Crih 66 Bible Online

Đơs Crih 66 - koho bible

Đơs Crih 66

¹Bơta đơs chò. Jơnau Đơs Crih ai cau lam bồ đơs chò in ngui Ơ jơh ală cau làm plai ù, Ai tĕ jơnau driau chò jòng ro Yàng Tom Trồ.

²Đơs chò tĕ bơh bơta gơklŏ sơnđan Yàng dê, jòng ro tĕ mơ lơh àng sơnđan Yàng.

³Đơs tĕ mơ Yàng Tom Trồ lah: “Ală broă lơh Kơnràñ dê cau pal rngòt ngan! Tài bơh gơnap gơnoar Kơnràñ dê dờng ngan, tian gơs ală cau sò tơm di Kơnràñ rngòt rơm să di đap Kơnràñ,

⁴Làm jơh plai ù duh khoai Kơnràñ, Mơ đơs chò jòng ro Kơnràñ, Bol khai đơs chò jòng ro sơnđan Kơnràñ.” (Selah)

⁵Tus tĕ sền ală broă Yàng Tom Trồ neh lơh: Ală broă Kơnràñ lơh digùl kòn mơnus la pal rngòt ngan.

⁶Yàng tòmgơl dàlềng gơlik ù rañ rsơh; Cau lòt jơng gan hiòng. Tềng hơ̆ bol hi chò hòp tòm Kơnràñ.

⁷Yàng ngui gơnoar pràn Kơnràñ dê mơ at bồ sùm sùm, Mat Yàng sền sơwì ală làng bol; Ală cau tòmdră bañ jòng să he. (Selah)

⁸Ơ ală làng bol, jòng ro tĕ Yàng Tom Trồ bol hi dê, Lòi cau in kơno ntas jơnau jòng ro Yàng.

⁹Kơnràñ sền gàr bơta kis bol he dê, Ò lòi jơng bol he gơcồt.

¹⁰Ơ Yàng Tom Trồ, Kơnràñ neh lòng bol hi, Tŏ tiar bol hi kung be cau tŏ tiar priă.

¹¹Kơnràñ neh bơrkòl bol hi be kòl tòm bơtơng, Lơh bol hi in bòl glar be àñ phan kơnjơ̆.

¹²Kơnràñ lòi cau hào hơđang bồ bol hi; Bol hi lòt gan ồs gan dà; Mơya Kơnràñ lam bol hi lik hơ tiah dờng ơnàng.

¹³Añ rơp mut tòm hìu Kơnràñ dê bal mơ phan ơn chu duh khoai, Añ rơp tơm Kơnràñ in ală bơta ho pơgon añ jê,

¹⁴La ală bơta sơndồi añ neh đơs, Mơ bơr añ neh ho tòm tŭ bòl glar.

¹⁵Añ rơp ơn Kơnràñ in ală phan lơmă lơh gơs phan ơn chu duh khoai, Bal mơ ñhŭ dơngi belàt dam; añ kung rơp ơn ală kơnrồ dam mơ be dam. (Selah)

¹⁶Ơ jơh ală cau duh rngòt di Yàng Tom Trồ, tus tĕ iat, Gen añ rơp yal wơl bơta Yàng neh lơh añ in.

¹⁷Añ neh jơh nùs hòi dan mơ Yàng, Mơ bơr añ jòng ro Yàng.

¹⁸Dilah nùs añ neh kơlôi gơboh di tồi glài, Gen Yàng ò bài iat añ.

¹⁹Mơya ngan Yàng Tom Trồ neh iat; Kơnràñ neh ai tồr iat jơnau hòi dan añ jê.

²⁰Pal jòng ro Yàng Tom Trồ, Bơh Kơnràñ ò sang lòi jơnau hòi dan añ jê, Kung ò tă tơlik bơta kòñ gơboh kơ̆ dơn Kơnràñ dê bơh di añ.