Read koho Đơs Crih 69 Bible Online

Đơs Crih 69 - koho bible

Đơs Crih 69

¹Jơnau Đơs Crih Dabit cih ai cau lam bồ đơs chò in ngui, jat sap đơs chò sơnđan la “Bơkào Lili” Ơ Yàng Tom Trồ, dan dong klàs añ! Bơh dà neh ngŏ tus di ngko añ.

²Añ gơkram tòm bŏ jrô, tềng hơ̆ ò gơs tiah ơn jơng; Añ neh gơkram tòm dà jrô, dà tih hòr croh hơđang añ.

³Añ bòl glar bơh añ ñìm sùm, rnồng dò añ jê ro rañ, Mat añ lu li tòm tŭ añ ơm kơp gơn Yàng Tom Trồ añ jê.

⁴Ală cau gơjrañ kơuềng di añ ò bồ; Oă rlau mơ sŏ di bồ añ jê; Bol khai la ală cau kòñ tơnroh añ, ală cau sò tơm di añ yă blac añ. Tŭ do añ pal tơm phan añ ò kơñau sơl ơ?

⁵Ơ Yàng Tom Trồ, Kơnràñ git bơta bơrngơl gơla añ jê, Mơ ală bơta tìs añ neh lơh ò rgơi pồn bơh di Kơnràñ.

⁶Ơ Jehôwa Yàng Tom Trồ Gơnap Gơnoar Dờng dê, Dan bañ lòi ală cau gơn kơnòm di Kơnràñ kong ƀàssìl tài bơh añ; Ơ Yàng Tom Trồ Israel dê,

⁷Hơ̆ la tài bơh Kơnràñ mơ añ kong cau bơtat bơtròh, Mơ kòl bơta ƀàssìl gơ jơm hơđang mat añ.

⁸Añ neh gơlik gơs be dô nă cau crih mat oh mi añ in, Be dô nă cau lơgar ndai gơwèt mơ ală kòn mè añ jê.

⁹Bơh bơta ngac ngar bơh hìu Kơnràñ dê sa roh añ; Ală jơnau bơtat bơtròh cau đơs bơtat bơtròh di Kơnràñ, gơ neh dùh hơđang añ.

¹⁰Tòm tŭ añ ơt sa nàng bơklơn hwềng soàn añ pơndêt să, Gen bol khai bơtat bơtròh di añ bơh lơh behơ̆.

¹¹Tòm tŭ añ ai bài sơnò kiat lơh gơs phan soh añ in, Gen añ gơlik gơs jơnau pơnđik bol khai in.

¹²Ală cau nggui di mpồng ƀòn đơs joh bơh añ; Añ la jơnau đơs chò ală cau bơñul ñô dê.

¹³Mơya đah mơ añ, ơ Yàng Jehôwa, añ hòi dan mơ Kơnràñ. Ơ Yàng Tom Trồ, tòm tŭ di tŭ geh dòp, Dan ho wơl jơnau añ jat bơta kòñ gơboh kơ̆ dơn dờng ơnàng Kơnràñ dê.

¹⁴Dan tă añ bơh bŏ lơnggơr, jat bơta dong kòl dòn song Kơnràñ dê; Dan lòi añ geh dong tă bơh di ală cau sò tơm di añ, Mơ klàs bơh di dà jrô.

¹⁵Dan bañ lòi dà tih hòr pơrdô añ, Hala dà jrô sa loan añ, Hala trồm jrô til wơl bơr gơ hơđang añ.

¹⁶Ơ Yàng Jehôwa, dan ho wơl añ in, bơh bơta kòñ gơboh kơ̆ dơn Kơnràñ dê la niam; Dan wèt sền añ, jat bơta kòñ nđàc dờng ơnàng Kơnràñ dê.

¹⁷Dan Kơnràñ bañ pồn mat di cau duh broă Kơnràñ dê; Dan mhar mhar ho wơl añ, tài bơh añ bòl glar ngan.

¹⁸Dan tus rềp mơ añ, mơ dong tơwài añ; Dan hồ toh añ tài bơh gơs cau sò tơm di añ.

¹⁹Yàng git añ kong bơta bơtat bơtròh, bơta ƀàssìl mơ bơta cau sền òsơp; Yàng git jơh ală cau sò tơm di añ.

²⁰Bơta bơtat bơtròh lơh jê sồt nùs añ, tài bơh hơ̆ añ roh jơh bơta gơn kơnòm. Añ jòi bơta nđàc sơngit, mơya ò gơs; Añ jòi cau pơndòm pơniang, mơya ò bàn.

²¹Bol khai ai añ in phan bih khih lơh gơs phan sa, Mơ tòm tŭ añ tơhìr, bol khai ai añ in hùc dà sràt.

²²Dan lơh cơnòng ñô sa di đap bol khai gơlik gơs dô nơm dă; Dan lơh bơta pơjum sa duh khoai bol khai dê gơlik gơs dô nơm bơtơng.

²³Dan lơh jơngo mat bol khai dê nàng bol khai ò rgơi gŏ, Mơ lơh ală kồ jơng bol khai dê ơrơm sùm.

²⁴Dan tuh bơta gơjrañ dờng Kơnràñ dê hơđang bol khai, Dan lòi bơta gơhào gơjrañ Kơnràñ dê jat bàn bol khai.

²⁵Dan lòi tiah ơm bol khai dê gơlik tiah ngềt ngơt, Bañ gơs cau lơi ơm tòm sàl bol khai dê.

²⁶Bơh bol khai kup kơryan cau mơ Kơnràñ neh pù lơh, Mơ lơh jê sồt bơtơl tai di cau mơ Kơnràñ neh lơh jê sồt.

²⁷Dan bơtơl bơta lơh glài hơđang bơta lơh glài di bol khai; Dan bañ lòi bol khai klàs di bơta lơh glài.

²⁸Dan jùt sơnđan bol khai bơh tòm sră bơta kis; Dan bañ cih sơnđan bol khai bal mơ ală cau song ring.

²⁹Mơya añ kong bòl glar mơ jê sồt; ơ Yàng Tom Trồ, Dan lòi bơta dong klàs Kơnràñ dê, cang kìng añ!

³⁰Añ rơp ngui bơta đơs chò mơ jòng ro sơnđan Yàng Tom Trồ dê; Añ rơp ngui bơta ưnngài mơ jòng ro Kơnràñ.

³¹Bơta hơ̆ rơp niam nùs Yàng Jehôwa rlau mơ ơn kơnrồ, Hala kơnrồ dam gơs ngke mơ kơnđias.

³²Ală cau kong rồn bơklơn, lòi bol khai gŏ bơta hơ̆ mơ chò hòp; Ơ ală cau jòi jat Yàng Tom Trồ, lòi nùs bol mê geh wơl bơta kis,

³³Bơh Yàng Jehôwa kơno jơnau cau siơ̆u siar dê, Ò sền òsơp di ală cau ơm jàm Kơnràñ dê.

³⁴Lòi trồ, tiah, dàlềng, Mơ ală phan kis tòm hơ̆ jòng ro Yàng.

³⁵Bơh Yàng Tom Trồ rơp dong klàs Siôn mơ bơt wơl ală ƀòn dờng Juda dê; Ală cau duh broă Kơnràñ dê rơp ơm tềng hơ̆ mơ dòp geh gơlơh gơs sre brê.

³⁶Kòn sau ală cau duh broă Kơnràñ dê rơp pơrdòn sre brê hơ̆, Mơ cau lơi kòñ gơboh di sơnđan Kơnràñ gen rơp ơm tềng hơ̆.