Read koho Đơs Crih 7 Bible Online

Đơs Crih 7 - koho bible

Đơs Crih 7

¹Jơnau Đơs Crih Dabit cih mơ đơs chò Yàng Jehôwa in, bơh jơnau Kus la cau Benjamin Ơ Jehôwa Yàng Tom Trồ añ jê, añ kìng crŭ tòm Kơnràñ; Dan dong klàs añ bơh di jơh ală cau ting jat añ, mơ dong tă añ.

²Rngòt bol khai crè añ be klìu triă mòn, Crè gơs rpot rpet, ò gơs cau lơi dong tă añ.

³Ơ Jehôwa Yàng Tom Trồ añ jê, dilah añ neh lơh bơta hơ̆, Dilah añ gơs bơta tồi glài iơh bơsak tòm tê añ.

⁴Dilah añ neh sal wơl bơta iơh di cau ơm gơtòmsòr mơ añ, Dilah añ neh nisơna tòmpìt kơñau phan cau sòdră di añ,

⁵Gen lòi cau sò tơm ting kup añ, Jă trơm bơta kis añ tòm ù, Mơ bồr hwềng soàn añ jê tòm kơmbuh ù.

⁶Ơ Yàng Jehôwa, dan guh tòm bơta gơjrañ Kơnràñ dê, guh mơ tòmdră mơ bơta gơhào gơjrañ cau sò tơm añ jê; Ơ Yàng Tom Trồ añ jê, dan kah rngal; Kơnràñ neh sồr bơtào bơta cahrña rau.

⁷Lòi mpồl jơnum ală làng bol pơjum gùt dar Kơnràñ; Dan Kơnràñ nggui hơđang jòng digùl bol khai.

⁸Yàng Jehôwa cahrña ală làng bol. Ơ Yàng Jehôwa, dan cahrña añ jat bơta song ring añ jê, mơ jat bơta song ngan tòm nùs añ.

⁹Dan tơnlồi bơta iơh bơsak cau iơh bơsak dê, mơya lơh kơ̆ cê ală cau song ring in, Bơh Yàng Tom Trồ song ring, la Bơtau sền sơwì nùs nhơm kòn mơnus dê.

¹⁰Yàng Tom Trồ la khèl đo añ jê, Kơnràñ la Bơtau dong klàs ală cau gơs nùs song ngan.

¹¹Yàng Tom Trồ la Bơtau cahrña song ring, la Yàng Tom Trồ kòp ngai gơjrañ di bơta iơh bơsak.

¹²Dilah cau ò gơjrañ sang glài, gen Yàng Tom Trồ rơp tồl đào.

¹³Yàng rcang pềs tà nàng tơnchơt, Mơ lơh ală kam Kơnràñ dê gơlik ồs.

¹⁴Ne, kung be cau ùr bun bơta iơh, Cau iơh bơsak bun bơta tồi glài iơh bơsak, mơ deh bơta blac chừt.

¹⁵Khai tò dô nơm trồm tơrluh, tò bơtô Mơ khai dùh tòm trồm tơrluh khai neh tò.

¹⁶Bơta iơh bơsak khai dê tuh wơl hơđang bồ khai, Mơ bơta rhung rhang khai dê gơđềt di bìng liang khai dê.

¹⁷Añ rơp ưnngài Yàng Jehôwa bơh bơta song ring Kơnràñ dê, Mơ đơs chò jòng ro sơnđan Yàng Jehôwa la Bơtau Hơđang Rlau jơh.