Read koho Đơs Crih 71 Bible Online

Đơs Crih 71 - koho bible

Đơs Crih 71

¹Ơ Yàng Jehôwa, añ kìng crŭ tòm Kơnràñ; Dan bañ tŭ lơi lòi añ gơkòl ƀàssìl!

²Dan dong tă añ mơ ai añ in geh lik klàs, jat bơta song ring Kơnràñ dê; Dan wèt tồr di añ mơ dong klàs añ.

³Dan să tòm Kơnràñ lơh gơs dô nơm lŭ klềr nàng lơh añ in kìng crŭ, Lơh gơs dô nơm theng kơ̆ cê nàng dong klàs añ, Bơh Kơnràñ la lŭ klềr mơ la theng kơ̆ cê añ jê.

⁴Ơ Yàng Tom Trồ añ jê, dan dong añ klàs bơh di tê cau iơh bơsak, Klàs bơh di tê cau ò song ring mơ cau jàñ bơsak.

⁵Ơ Yàng Jehôwa, Kơnràñ la Bơtau añ gơn kơnòm, Mơ la Bơtau añ dòn kơnòm bơh tŭ añ gam kơnòm

⁶Añ sơnđìng să di Kơnràñ bơh di tŭ añ pa deh; Kơnràñ la Bơtau neh cèng añ lik bơh di kơndul mè añ. Añ rơp jòng ro Kơnràñ sùm sùm.

⁷Añ gơlik gơs tềl oă cau in rcang lài, Mơya Kơnràñ la tiah kìng crŭ kơ̆ cê añ in.

⁸Bơr añ bềng bơta jòng ro Yàng, Mơ lơh gơklŏ Kơnràñ in sùm kòp ngai.

⁹Dan Kơnràñ bañ sang añ tòm tŭ kra krồñ; Kung bañ lòi añ tòm tŭ gơhuc bơta pràn kơldang,

¹⁰Bơh ală cau sò tơm đơs iơh bơh añ, Ală cau kơp nàng tơnchơt añ, bol khai tòmbơyai bal.

¹¹Mơ lah: “Yàng Tom Trồ neh sang khai; Ting jat tĕ mơ kup khai, bơh ò gơs cau lơi dong tă khai.”

¹²Ơ Yàng Tom Trồ, dan bañ ơm ngài bơh añ; Ơ Yàng Tom Trồ añ jê, dan mhar mhar tus dong kòl añ!

¹³Ală cau yă añ, lòi bol khai gơkòl ƀàssìl mơ roh rui; ală cau jòi bơta nàng lơh iơh di añ, Lòi bol khai gơkòl sền òsơp mơ ƀàssìl.

¹⁴Mơya añ rơp gơn kơnòm sùm sùm, Mơ jòng ro Kơnràñ sơlo ngai sơlo oă rlau tai.

¹⁵Bơr añ rơp yal bơh ală broă song ring Kơnràñ dê, Mơ bơh bơta dong klàs Kơnràñ dê jơh ngai mho, bơh khà gơ dê rlau mơ bơta git wă añ jê.

¹⁶Añ rơp tus yal ală broă gơnap gơnoar Yàng Jehôwa dê, Añ rơp jòng ro bơta song ring Kơnràñ dê, mìng bơta song ring Kơnràñ dê lơm.

¹⁷Ơ Yàng Tom Trồ, Kơnràñ neh bơto añ bơh di tŭ añ gam kơnòm, Jơl tus di tŭ do añ gam yal tơlik ală broă crih crài Kơnràñ dê.

¹⁸Ơ Yàng Tom Trồ, bulah di tŭ añ neh kra bồ kò sŏ rau, Dan bañ sang lòi añ, Jơl tus di tŭ añ yal tơlik jơh ală kòn sau rài tơnơ̆ in bơh gơnoar pràn Kơnràñ dê.

¹⁹Ơ Yàng Tom Trồ, gơnap gơnoar mơ bơta song ring Kơnràñ dê jơnhoa tus di ală tap trồ. Kơnràñ la Bơtau neh lơh ală broă dờng ngan; Ơ Yàng Tom Trồ, ñcau rgơi ndròm be Kơnràñ taih?

²⁰Kơnràñ neh ai añ in gŏ oă ngan bơta bòl glar jê sồt, Kơnràñ kung rơp lơh añ in geh kis wơl, Mơ cèng añ guh bơh di tiah cìr jrô ù dê.

²¹Yàng rơp bơtơl bơta màng ryŭ añ in, Mơ pơndòm pơniang añ dô dơ̆ tai.

²²Ơ Yàng Tom Trồ añ jê, añ kung rơp pĕ kơñi dờng Mơ jòng ro Kơnràñ, bơh bơta dòn song Kơnràñ dê; Ơ Bơtau Sàng goh Israel dê, añ rơp pĕ kơñi mơ đơs chò jòng ro Kơnràñ.

²³Bơr sơndồi añ rơp driau chò, tòm tŭ añ đơs chò jòng ro Kơnràñ; Hwềng soàn añ kung lơh behơ̆ sơl, bơh Kơnràñ neh dong tơwài añ.

²⁴Jơh ngai mho lơmpiat añ rơp yal bơh bơta dong kòl song ring Kơnràñ dê, Bơh ală cau jòi bơta nàng lơh iơh di añ, Bol khai neh gơkòl cau sền òsơp mơ ƀàssìl.