Read koho Đơs Crih 73 Bible Online

Đơs Crih 73 - koho bible

Đơs Crih 73

¹Jơnau Đơs Crih Asap cih Ngan Yàng Tom Trồ gơwèt niam mơ cau song ngan, La cau gơs nùs sàng goh.

²Ai đah mơ añ, jơng añ mòr gơtup pừ, cơnđòa añ mòr gơcồt.

³Tài bơh tòm tŭ añ gŏ cau iơh bơsak geh pas gơs, Gen añ ƀoah di cau pơnhừ să.

⁴Bơh bol khai ò gơs bơta jê; Să jan bol khai dê pràn kơldang mơ niam,

⁵Bol khai ò kong bòl glar be cau ndai, Bol khai kung ò tìp rung rài be cau ndai sơl.

⁶Tài bơh hơ̆ bơta pơnhừ să lơh gơs be ñòng wan di ngko bol khai; Bơta rhung rhang lơh gơs be ồi ào soh bol khai dê.

⁷Să jan lơmă bol khai dê bềng bơta iơh bơsak, Nùs bol khai dê bềng lìu bơta kơlôi sơnơng blac pơrlồm.

⁸Bol khai dơñŏ tơnhial, đơs jơnau iơh bơsak; Bol khai pơnhừ să mơ đơs pơhìn rồn bơklơn;

⁹Bol khai đơs tòmdră mơ trồ, Mơ jơnau bol khai đơs pơnro làm ù.

¹⁰Tài bơh hơ̆ làng bol wèt jat bol khai, Mơ jòi ò bàn bơta tìs lơi tòm bol khai.

¹¹Bol khai đơs lah: “Mbe Yàng Tom Trồ rgơi git taih? Bơtau Hơđang Rlau Jơh gơs bơta git wă sơl ơ?”

¹²Hơ̆ la bơta lơh lòt ală cau iơh bơsak dê; Bol khai ơm lơngai sùm, phan mơna bol khai dê gơbơtơl oă.

¹³Añ neh kơrmap gàr nùs añ sàng goh, Mơ tê añ ò lơh tìs, mơya ală bơta hơ̆ la ò kwơ añ in.

¹⁴Tài bơh jơh ngai mho añ gơkòl tòm bơta rung rài, Kòp drim añ kong bơta lơh glài tơmàl.

¹⁵Dilah añ neh đơs lah: “Añ rơp đơs behơ̆,” Gen behơ̆ añ neh lơh ò song gơwèt mơ jơi bơtiàn kòn sau Kơnràñ dê.

¹⁶Mơya tòm tŭ añ kơlôi mbe lơi nàng wă ală bơta hơ̆, sền gơlơh be bòl glar kalke ngan añ in,

¹⁷Jơl tus di tŭ añ mut tòm tiah sàng goh Yàng Tom Trồ dê; Gen sồng añ git wă bơh bơta lồi dut bol khai dê.

¹⁸Ngan Kơnràñ ơn bol khai di tiah ntiar, Lơh bol khai in roh rui.

¹⁹Heh! Bol khai kong tơnroh tòm dô huơt lơm! Bơta rngòt rngơt lơh bol khai in roh rui jơh hir.

²⁰Ơ Yàng, tòm tŭ kah rngal cau sền òsơp di bơta mpau mbe lơi, Gen tòm tŭ kah rngal Kơnràñ kung sền òsơp di bol khai behơ̆ sơl.

²¹Tòm tŭ hwềng soàn añ sràt bơtang, tòm tŭ nùs añ be gơsrơp bluh.

²²Gen tŭ hơ̆ añ ơm bơrngơl gơla, ò git wă bơta lơi, Di đap Kơnràñ añ kung ò gơkrơi be phan poan jơng,

²³Bulah behơ̆ añ kư̆ lòt bal mơ Kơnràñ sùm; Kơnràñ at di tê ma añ jê.

²⁴Kơnràñ ai jơnau bơto sơnio tề lam añ, tus di ngai tơnơ̆ Kơnràñ rơp wă rò añ tòm bơta gơklŏ.

²⁵Hơđang trồ, añ gơs ñcau rlau mơ Kơnràñ taih? Ai tòm ù añ ò kòñ bơta lơi ndai rlau mơ Kơnràñ.

²⁶Bulah poac să mơ nùs nhơm añ siar roh, mơya Yàng Tom Trồ la bơta pràn kơldang nùs añ jê, mơ la pơnah añ jê gam sùm sùm.

²⁷Ngan behơ̆, ală cau ơm ngài mơ Kơnràñ gen rơp roh rui; Kơnràñ pơndut tơnlồi cau lơi ò dòn song mơ Kơnràñ.

²⁸Mơya đah mơ añ, niam añ in ơm rềp mơ Yàng Tom Trồ; Añ neh bơtào Yàng Jehôwa la tiah kìng crŭ añ jê, Nàng añ yal wơl bơh jơh ală broă Kơnràñ dê.