Read koho Đơs Crih 74 Bible Online

Đơs Crih 74 - koho bible

Đơs Crih 74

¹Jơnau Đơs Crih Asap cih nàng bơto sồr Ơ Yàng Tom Trồ, ñchi bơh tài Kơnràñ sang lòi bol hi sùm sùm taih? Ñchi bơh tài bơta gơjrañ Kơnràñ dê gơguh be ñhŭ tòmsò di mpồl belàt tòm ƀlàng ñhơt Kơnràñ dê taih?

²Dan kah mpồl jơnum Kơnràñ dê mơ Kơnràñ neh bàn bơh yau, Mơ neh tơwài wơl nàng lơh gơs phan jơtài Kơnràñ dê; Kung dan kah mơnơm Siôn la tiah Kơnràñ neh tus ơm.

³Dan Kơnràñ cơnđòa song tus di tiah tơrlah tơrling sùm sùm; Cau sò tơm neh tơnroh jơh ală phan tòm tiah sàng goh.

⁴Ală cau sòdră Kơnràñ dê ơluh ơhùm tòm tiah sàng goh Kơnràñ dê; Bol khai bơtào bồng bi bol khai dê nàng lơh tềl sơnio tềng hơ̆.

⁵Di gùng mut đah đang bol khai be cau yàt sùng kơl ală chi tòm brê.

⁶Bol khai ngui sùng mơ mut pòng bơcah jơh ală phan pac sềr.

⁷Bol khai neh chu tiah sàng goh Kơnràñ dê, Lơh roh bơta sàng goh tiah ơm sơnđan Yàng dê tơmù tus di ù.

⁸Bol khai đơs tòm nùs lah: “Bol he rơp kup bol khai dòn duh jơh.” Bol khai neh chu jơh ală tiah pơjum Yàng Tom Trồ dê tòm lơgar.

⁹Bol hi ò gŏ tai ală tềl sơnio bol hi dê; Ò tai gơs cau gơnoar hwơr, Mơ digùl bol hi kung ò gơs cau lơi git gam nđò jŏ tai.

¹⁰Ơ Yàng Tom Trồ, cau sò tơm rơp đơs bơtat bơtròh nđò jŏ taih? Cau sò tơm kư̆ đơs tràl sơrbil di sơnđan Kơnràñ sùm sùm ơ?

¹¹Ñchi bơh tài Kơnràñ ruc wơl tê taih? Ñchi bơh tài Kơnràñ ơn tê ma Kơnràñ di ntơh taih?

¹²Bulah behơ̆, Yàng Tom Trồ la Bơtau añ jê bơh yau òr, Kơnràñ lơh broă bơta dong klàs digùl ală lơgar.

¹³Kơnràñ neh ngui gơnap gơnoar Kơnràñ dê mơ cah is dàlềng, Kơnràñ neh lơh bơcah bồ ală phan jàñ bơsak tòm dà.

¹⁴Kơnràñ lơh bơcah lề ală bồ Lebiathan dê, Ai gơlơh gơs phan sa ală phan kis ơm tòm tiah ngềt ngơt.

¹⁵Kơnràñ lơh dà cat mơ dà croh in gơ nsoac dà, Mơ lơh ală hiòng dà dờng in gơlik rañ rsơh.

¹⁶Ngai gơrê bal mơ Yàng, mang kung behơ̆ sơl; Kơnràñ neh bơtào gơs ală sơmañ, kơnhai mơ mattơngai.

¹⁷Kơnràñ neh lơh nền ală nhàr ù dê, Mơ lơh gơs kơnhai duh mơ kơnhai mrềt.

¹⁸Ơ Yàng Jehôwa, dan kah mbe cau sò tơm đơs bơtat bơtròh, Mơ dô nơm làng bol tùl gơla đơs tràl sơrbil di sơnđan Kơnràñ.

¹⁹Dan bañ phi phan jàñ bơsak in bơta kis cau kòñ gơboh Kơnràñ; Kung dan bañ hŭi sùm bơta kis cau rƀah lơòi Kơnràñ dê.

²⁰Dan kah wơl bơta ho bal Kơnràñ dê, Bơh ală tiah klam jơngo tòm lơgar gơs bềng bơta rhung rhang.

²¹Dan bañ lòi cau gơkòl rồn bơklơn kong ƀàssìl; Lòi cau rƀah lơòi mơ cau siơ̆u siar jòng ro sơnđan Kơnràñ.

²²Ơ Yàng Tom Trồ, dan guh, dong tò jơnau song Kơnràñ dê; Kah wơl mbe cau tùl gơla đơs bơtat bơtròh di Kơnràñ jơh ngai mho.

²³Dan bañ hŭi jơnau nggà driau cau sò tơm di Kơnràñ, Bơta nggồr nggàc cau tòmdră di Kơnràñ gơguh pơnjat sùm ò dơh.