Read koho Đơs Crih 77 Bible Online

Đơs Crih 77 - koho bible

Đơs Crih 77

¹Jơnau Đơs Crih Asap cih ai Jeduthun in la cau lam bồ đơs chò Añ rac dan mơ Yàng Tom Trồ, Ai jơnau đơs dờng mơ Yàng Tom Trồ nàng Kơnràñ iat añ.

²Tòm ngai bol glar añ jòi jat Yàng; Tòm trồ mang añ pò tê hơđang hòi dan ò glar; Hwềng soàn añ ò bài geh pơndòm pơniang.

³Añ kah Yàng Tom Trồ mơ añ rac ròc; Añ kơlôi sơnơng is mơ gơplơ̆ nùs. (Selah)

⁴Yàng ò ai mat añ ñềm bic rlô; Añ dơrcul nùs oă ngan, ò rgơi đơs.

⁵Añ kơlôi sơnơng bơh ngai yau òr, Mơ kah ală sơnam neh rlau.

⁶Tòm trồ mang añ đơs is tòm nùs añ; Añ kơlôi sơnơng is, mơ hwềng nùs añ lùp lah:

⁷“Yàng rơp sang lòi jơl tus sùm sùm, Mơ ò gơs tŭ lơi gam ai bơta nđàc tai sơl ơ?

⁸Bơta kòñ gơboh kơ̆ dơn Kơnràñ dê neh roh jơh jơl tus sùm sùm sơl ơ? Ală jơnau ho Kơnràñ dê ò gơs tŭ lơi gam tai sơl ơ?

⁹Yàng Tom Trồ neh hŭi ai bơta nđàc sơl ơ? Tòm tŭ gơhào gơjrañ Kơnràñ ò tai gơs nùs nđàc sơngit sơl ơ?” (Selah)

¹⁰Chòp añ đơs: “Do la bơta moat jrùng añ jê, hơ̆ la tê ma Bơtau Hơđang Rlau Jơh neh tòmgơl.”

¹¹Añ rơp kah wơl ală broă Yàng Jehôwa dê, Ngan añ rơp kah wơl ală broă crih crài Kơnràñ dê tòm rài yau.

¹²Añ rơp kơlôi sơnơng is bơh jơh ală broă Yàng dê, Mơ đơs is bơh ală broă gơnap gơnoar Kơnràñ dê.

¹³Ơ Yàng Tom Trồ, gùng dà Yàng dê la sàng goh. Gơs yàng lơi ndai dờng ndròm be Yàng Tom Trồ bol he dê sơl ơ?

¹⁴Yàng la Yàng Tom Trồ lơh ală broă crih crài, Kơnràñ neh yal tơlik gơnap gơnoar Kơnràñ dê digùl ală làng bol.

¹⁵Kơnràñ ngui tơwòr tê Kơnràñ mơ tơwài làng bol Kơnràñ dê, Hơ̆ la ală kòn sau Jakôp mơ Jôsep dê. Selah

¹⁶Tòm tŭ ală dà gŏ Yàng, ơ Yàng Tom Trồ, Tòm tŭ ală dà neh gŏ Yàng gen gơ rngòt, Ngan, ală cìr jrô gơlơnggơr.

¹⁷Ală mhwal gơtuh dà mìu, Ală tap trồ gơlik ntơr kơnàs, Puhlèp Kơnràñ dê be kam pañ gùt dar.

¹⁸Ntơr kơnàs Yàng dê gơ ơm tòm càl wàl bong, Puhlèp Kơnràñ dê sòl pơnđàng dunnia, Plai ù gơlơnggơr mơ nggồr.

¹⁹Gùng Yàng dê gan tòm dàlềng, Ală gùng lòt Yàng dê gan tòm ală dà har, Ai ală tềl jơng Yàng lòt gen ò gơs cau lơi gŏ.

²⁰Yàng ngui tê Môise mơ Arôn Nàng tề lam làng bol Kơnràñ dê be dô mpồl belàt.