Read koho Đơs Crih 78 Bible Online

Đơs Crih 78 - koho bible

Đơs Crih 78

¹Jơnau Đơs Crih Asap cih nàng bơto sồr Ơ làng bol añ jê, ai tồr iat tĕ bơta bơto sồr añ jê; Wèt tồr iat tĕ jơnau đơs bơh bơr añ jê.

²Añ rơp pò bơr đơs jơnau pơnyơu; Añ rơp đơs ală jơnau ndơp ndơr rài yau dê,

³Hơ̆ la ală jơnau bol he neh kơno mơ git, Mơ ồng pàng bol he neh yal bol hi in,

⁴Bol he rơp ò pồn ală jơnau hơ̆ di kòn sau bol khai dê, Mơya rơp yal wơl rài tơnơ̆ rơp tus in, Bơh ală broă gơklŏ Yàng Jehôwa dê, mơ gơnoar pràn Kơnràñ dê, mơ bơh ală broă crih crài Kơnràñ neh lơh.

⁵Kơnràñ neh bơtào jơnau sồr kràñ cê tòm Jakôp, Lơh nền bơta boh lam tòm Israel, Hơ̆ la bơta Kơnràñ sồr ồng pàng bol he dê pal bơto wơl bơta boh lam hơ̆ kòn sau he in.

⁶Tồ rài tơnơ̆, hơ̆ la kòn sau òhềt deh, rgơi git ală bơta hơ̆, tòm tŭ neh dờng gen rơp yal wơl bơta boh lam hơ̆ kòn sau bol khai in,

⁷Nàng bol khai in gơn kơnòm di Yàng Tom Trồ, Ò hŭi ală broă Yàng Tom Trồ dê, Mơya kơrmap gàr ală bơta sồr lam Kơnràñ dê.

⁸Nàng bol khai in ò di be ồng pàng bol khai dê, La dô rài kơldang bồ mơ sòdră, la rài ò kơ̆ nùs, Gơs hwềng nùs ò kơ̆ dơn mơ Yàng Tom Trồ.

⁹Ală cau Epraim at àtak nàng tòmlơh, Mơya bol khai wèt ngkòi tòm ngai tòmlơh.

¹⁰Bol khai ò prap gàr bơta ho bal Yàng Tom Trồ dê, Kung ò bài lơh jat bơta boh lam Kơnràñ dê.

¹¹Bol khai hŭi ală broă Kơnràñ lơh, Mơ ală bơta crih crài Kơnràñ neh ràng tơlik bol khai in gŏ.

¹²Tòm lơgar Ejiptơ mơ tòm ƀlàng Joan, Kơnràñ lơh ală bơta krơi di đap ồng pàng bol khai dê.

¹³Kơnràñ cah is dàlềng, lòi bol khai in lòt gan, mơ lơh dà ơm wơl be dô nơm dà bơt.

¹⁴Tòm trồ ngai Kơnràñ ngui mhwal nàng tề lam bol khai, Tòm trồ mang ngui bơta àng jrong ồs dê.

¹⁵Kơnràñ pòng bơcah pơnai lŭ tòm ƀlàng bràs, Ai bol khai in hùc dà tơngkah tơngkañ be bơh tòm tiah jrô.

¹⁶Kơnràñ kung lơh ală croh dà bơh pơnai lŭ hòr lik, Mơ lơh dà in hòr be ală hiòng.

¹⁷Bulah behơ̆, bol khai kư̆ tìs glài tòmdră tai mơ Kơnràñ, Tòm ƀlàng bràs bol khai sòdră mơ Bơtau Hơđang Rlau Jơh.

¹⁸Tòm nùs bol khai lòng Yàng Tom Trồ, Mơ dan phan sa jat nùs bol khai kòñ.

¹⁹Bol khai đơs tòmdră mơ Yàng Tom Trồ lah: “Yàng Tom Trồ rgơi yò sa tòm ƀlàng bràs sơl ơ?

²⁰Ne, Kơnràñ neh pòng pơnai lŭ gen dà hòr lik, dà hòr bềng lìu. Kơnràñ kung rgơi ai ƀañ hala rcang ai poac làng bol Kơnràñ in sơl ơ?”

²¹Tài behơ̆ tòm tŭ Yàng Jehôwa kơno gen Kơnràñ gơhào gơjrañ, Ai ồs tòmdră mơ Jakôp, Bơta gơjrañ Kơnràñ dê gơhào di làng bol Israel;

²²Tài bơh bol khai ò gơs bơta dòn di Yàng Tom Trồ, Kung ò dòn kơnòm di gơnap gơnoar dong klàs Kơnràñ dê.

²³Bulah behơ̆ Kơnràñ ai jơnau sồr ală tap trồ hơđang, Mơ pò ală mpồng trồ,

²⁴Tơndùh mana be mìu hơđang nàng ai bol khai in sa, mơ ai bol khai in gar sa bơh đang trồ.

²⁵Kòn mơnus sa ƀañ cau gơnrơh dê; Kơnràñ pơyoa bol khai in phan sa tơngkah tơngkañ.

²⁶Kơnràñ ai càl đah mattơngai lik khồm bơh hơđang trồ; Bơh gơnap gơnoar Yàng dê, Kơnràñ lam càl bơh đah đơm;

²⁷Kơnràñ tơndùh poac be mìu hơđang bol khai oă be kơmbuh ù, Hơ̆ la sềm par oă be bràs di gah dàlềng;

²⁸Kơnràñ lơh bol gơrung digùl sàl bol khai dê, làm jơh gùt dar tiah bol khai ơm.

²⁹Behơ̆ bol khai sa, geh hòm ngan, Kơnràñ ai bol khai in phan jat nùs bol khai kòñ.

³⁰Mơya lài mơ tŭ bol khai òhềt geh wil tơl jat nùs bol khai hàm kòñ, Tòm tŭ phan sa gam tòm bơr bol khai dê,

³¹Gen bơta gơhào gơjrañ Yàng Tom Trồ dê gơguh di bol khai, Kơnràñ tơnchơt ală cau pràn kơldang rlau jơh tòm bol khai, Tòmpừ ală cau pơnu niam rlau jơh tòm Israel.

³²Bulah gơs ală bơta hơ̆ bol khai gam tìs glài, Bulah gŏ ală broă crih crài Kơnràñ dê bol khai kung ò dòn.

³³Tài bơh hơ̆, Kơnràñ tơnlồi ală ngai bol khai dê be dô dơ̆ tă nhơm, Lơh tơnlồi ală nam bol khai dê dô bă rngòt rngơt.

³⁴Tòm tŭ Kơnràñ tơnchơt bol khai, gen bol khai jòi jat Kơnràñ; Bol khai gơjrañ sang glài mơ jòi jat Yàng Tom Trồ dô bă ngac ngar.

³⁵Gen bol khai kah wơl lah Yàng Tom Trồ la be pơnai lŭ bol khai dê, Yàng Tom Trồ Hơđang Rlau Jơh la Bơtau dong tơwài bol khai dê,

³⁶Mơya bol khai ai bơr mơ đơs rơmhòc mơ Kơnràñ, Ngui lơmpiat he đơs blac mơ Kơnràñ.

³⁷Nùs bol khai ò kơ̆ nền gơwèt mơ Kơnràñ; Bol khai kung ò dòn song tòm bơta ho bal Kơnràñ dê.

³⁸Bulah behơ̆, bơh nùs kòñ nđàc Kơnràñ toh bơta tồi glài iơh bơsak bol khai dê. Ò tơnroh bol khai; oă dơ̆ Kơnràñ tơnruc bơta gơhào gơjrañ Kơnràñ dê, mơ ò gơrơndul jơh bơta gơjrañ dờng Kơnràñ dê.

³⁹Kơnràñ kah bol khai mìng la kòn mơnus lơm, Kung be dô nơm càl khồm mơ ò rê wơl tai.

⁴⁰Ò git nđò dơ̆ bol khai sòdră mơ Kơnràñ tòm ƀlàng ngềt ngơt, Mơ lơh Kơnràñ in moat jrùng jê sồt tòm ƀlàng bràs.

⁴¹Bol khai lòng Kơnràñ oă dơ̆, bơrcek Bơtau Sàng goh Israel dê.

⁴²Bol khai ò kah sùm gơnap gơnoar Kơnràñ dê, Kung ò kah ngai mơ Kơnràñ neh dong tơwài bol khai klàs bơh di cau sò tơm,

⁴³Tòm tŭ Kơnràñ lơh ală tềl is Kơnràñ dê tòm lơgar Ejiptơ, Mơ ală bơta krơi tòm ƀlàng Joan.

⁴⁴Kơnràñ lơh ală hiòng dà bol khai dê gơlik gơs mhàm, Tian gơs bol khai ò rgơi hùc dà tòm croh.

⁴⁵Kơnràñ sồr sơmac tòt tus mơ mpồl kap sa bol khai, Mơ ală kit tơnroh bol khai.

⁴⁶Kơnràñ jào phi mìr sre bol khai dê ală tu in sa, Mơ jào phi plai đo bơh tơngai broă bol khai dê ală srah in sa.

⁴⁷Kơnràñ tơnroh suơn plai ño bol khai dê mơ mìu piar, Tơnroh chi sơr bol khai dê mơ dà tŭ be piar.

⁴⁸Kơnràñ jào phi rpu kơnrồ bol khai dê mìu piar in, Mơ jào phi mpồl belàt bol khai dê ntơr kơnàs in.

⁴⁹Kơnràñ tơndùh hơđang bol khai bơta gơjrañ ngan Kơnràñ dê, Hơ̆ la bơta gơjrañ dờng, bơta gơhào nùs mơ bơta rung rài, Kung be dô mpồl cau gơnrơh tơnroh.

⁵⁰Kơnràñ pò tơlik bơta gơhào gơjrañ Kơnràñ dê, Ò pơlai tơnchơt bol khai, Mơya phi bơta kis bol khai dê pluh plàng in.

⁵¹Kơnràñ tơnchơt jơh ală kòn tơnhoa tòm lơgar Ejiptơ, Hơ̆ la ală kòn klau deh sơnròp tòm ală sàl Cam dê.

⁵²Chòp Kơnràñ cèng làng bol Kơnràñ dê lik be belàt, Tề lam bol khai tòm ƀlàng ngềt ngơt be dô mpồl belàt.

⁵³Kơnràñ lam bol khai dô bă lơngap lơngai, gen sồng bol khai ò rngòt bơta lơi; Ai dàlềng gen bŭ jơh ală cau sò tơm di bol khai.

⁵⁴Kơnràñ cèng bol khai tus tòm lơgar sàng goh Kơnràñ dê, Hơ̆ la tus di mơnơm mơ tê ma Kơnràñ neh tòmpìt geh.

⁵⁵Kơnràñ bơtrơh tơlik ală làng bol di đap bol khai; Kơnràñ tòmpà lơgar lơh gơs sre brê bol khai in, Mơ ai ală jơi bơtiàn cau Israel in ơm tòm sàl ală làng bol hơ̆ dê.

⁵⁶Bulah behơ̆, bol khai lòng Yàng Tom Trồ Hơđang Rlau Jơh, mơ sòdră mơ Kơnràñ. Ò prap gàr ală jơnau sồr kràñ cê Kơnràñ dê.

⁵⁷Mơya bol khai tòmgơl nùs mơ pơrlơ̆ dră kung be ală ồng pàng bol khai dê; Bol khai lơh pơrlồm kung be dô nơm àtak ò song.

⁵⁸Bơh bol khai bơrcek Kơnràñ gơjrañ tài bơh ală tiah jơnhoa duh rùp ràk; Bol khai chồl nùs Kơnràñ ƀoah tài bơh ală rùp pac sềr bol khai dê.

⁵⁹Tòm tŭ Yàng Tom Trồ kơno bơta hơ̆ gen bềng nùs gơhào gơjrañ, Mơ sang lòi jơh Israel.

⁶⁰Kơnràñ sang lòi hìu ơm Kơnràñ dê tòm Silô, Hơ̆ la sàl Kơnràñ neh ơm digùl jơi kòn mơnus.

⁶¹Kơnràñ jào gơnap gơnoar Kơnràñ dê nàng gơkòl kup, Mơ phi bơta gơklŏ Kơnràñ dê tòm tê cau sò tơm.

⁶²Kơnràñ jào phi làng bol Kơnràñ dê kong tơnchơt mơ đào. Mơ gơhào gơjrañ dờng di sre brê Kơnràñ dê.

⁶³Ồs chu pơrguc ală cau pơnu bol khai dê, Ai ală cau ơruh bol khai dê ò gơs bơta đơs chò tòmbau.

⁶⁴Ală cau gơnoar ơn phan duh khoai bol khai dê kong chơt mơ đào, Mơ ală cau ùr bơnrau ò ñìm rac.

⁶⁵Gen Yàng kah rngal bơh bơta bic, Ò gơkrơi be cau pràn kơldang driau dờng tài bơh tơrnòm.

⁶⁶Kơnràñ lơh gơprah ală cau sò tơm di Kơnràñ, Lơh bol khai in kong ƀàssìl sùm sùm.

⁶⁷Kơnràñ sang lòi sàl Jôsep dê, Ò sac rwah jơi bơtiàn Epraim;

⁶⁸Mơya Kơnràñ sac rwah jơi bơtiàn Juda, La mơnơm Siôn mơ Kơnràñ kòñ gơboh.

⁶⁹Kơnràñ bơt hìu sàng goh Kơnràñ dê ndròm be ală tap trồ jòng, Ò gơkrơi be plai ù mơ Kơnràñ neh bơtào gơs gam sùm sùm.

⁷⁰Kơnràñ neh sac Dabit nàng lơh gơs dĭ gơna Kơnràñ dê, cèng tơlik khai bơh di ală wàng belàt,

⁷¹Kơnràñ cèng tơlik khai bơh di ală mpồl gam pô Nàng lơh gơs cau ê gàr Jakôp la làng bol Kơnràñ, Hơ̆ la Israel la sre brê Kơnràñ dê.

⁷²Khai ê gàr bol khai bơh nùs song ngan khai dê, Mơ ai tê chài rgơi khai dê mơ tề lam bol khai.