Read koho Đơs Crih 79 Bible Online

Đơs Crih 79 - koho bible

Đơs Crih 79

¹Jơnau Đơs Crih Asap cih Ơ Yàng Tom Trồ, ală làng bol bơdìh neh mut tòm sre brê Yàng dê, Lơh ƀơ̆ ƀơl Hìu Duh Khoai Sàng Goh Yàng dê, Mơ lòi Jerusalem in gơlik gơs lề lac.

²Bol khai neh phi ƀồc ală cau duh broă Yàng dê lơh gơs phan sa sềm in, Kung neh phi poac ală cau sàng goh Yàng dê ală phan poan jơng in tòm ù.

³Bol khai lơh gơhòr mhàm cau sàng goh dê be dà gùt dar Jerusalem, Mơ ò gơs cau lơi tơp bol khai.

⁴Bol hi neh gơlik gơs bơta bơtat bơtròh di cau ơm rềp mơ hi, Ală cau ơm gùt dar bol hi dơñŏ tơnhial mơ sền òsơp di bol hi.

⁵Ơ Yàng Jehôwa, gam nđò jŏ taih? Kơnràñ rơp gơhào gơjrañ sùm sùm sơl? Bơta ƀoah gơjrañ dờng Yàng dê rơp sa be ồs sơl ơ?

⁶Dan dùh bơta gơhào gơjrañ Yàng dê hơđang ală làng bol ò git Yàng, Mơ hơđang ală lơgar ò hòi dan di sơnđan Kơnràñ.

⁷Bơh bol khai neh sa loan Jakôp, Mơ lơh gơprah tiah ơm khai dê.

⁸Dan Yàng bañ kah wơl mơ tòmdră di bol hi bơh ală tồi glài iơh bơsak ồng pàng bol hi dê; Dan Yàng ai nùs kòñ nđàc mhar tus dong kòl bol hi; Bơh bol hi kong bòl glar oă ngan.

⁹Ơ Yàng Tom Trồ la Bơtau dong klàs bol hi, dan dong kòl bol hi, Bơh bơta gơklŏ sơnđan Yàng dê; dan dong klàs, mơ dan toh glài bol hi in, tài bơh sơnđan Kơnràñ.

¹⁰Ñchi bơh tài ală làng bol đơs lah: “Ntềng đah Yàng Tom Trồ bol khai dê taih?” Dan bơta sal tê bơh bơta gơhòr mhàm cau duh broă Yàng dê geh tơnggit digùl ală làng bol di đap mat bol hi.

¹¹Dan lòi jơnau rac ròc cau kòl jàm dê geh tus di đap Yàng: Jat gơnap gơnoar dờng Yàng dê dan sền gàr ală cau kòl lơh nền pal chơt.

¹²Ơ Yàng Jehôwa bơta bơtat bơtròh mơ cau ơm rềp di bol hi neh bơtat bơtròh di Yàng, Dan tơm bơta hơ̆ poh dơ̆ di ntơh cau gơp ƀòn bol hi dê.

¹³Gen bol hi la làng bol Yàng dê, mơ la mpồl belàt tòm ƀlàng ñhơt Yàng dê, Bol hi rơp ưnngài Yàng sùm sùm; Bơh rài do tus rài ne bol hi rơp yal wơl bơta jòng ro Yàng.