Read koho Đơs Crih 83 Bible Online

Đơs Crih 83 - koho bible

Đơs Crih 83

¹Bơta Đơs Chò. Jơnau Đơs Crih Asap cih Ơ Yàng Tom Trồ, dan bañ ơm mŏ mŏ; Ơ Yàng Tom Trồ, dan bañ ơm ring ngềt, bañ ơm rlô.

²Bơh ne, ală cau sò tơm di Yàng gơtơngguh nggồr nggàc; Mơ ală cau gơjrañ kơuềng di Yàng pò bồ hơđang.

³Bol khai kơlôi ngui kai lac lèo nàng lơh iơh di làng bol Yàng dê; Bol khai bơyai bal sòdră di ală cau mơ Yàng sền gàr.

⁴Bol khai đơs lah: “Tus tĕ tơnroh bol khai bơh di ală làng bol, Tồ sơnđan Israel ò gam geh cau kah tai.”

⁵Ngan, bol khai bơyai bal dô nùs, Bol khai bơtào bơta ho bal sòdră di Yàng:

⁶Hơ̆ la ală sàl Edôm mơ cau Ismael, Môap mơ cau Hagrit,

⁷Gebal, Ammôn mơ Amalek, Cau Philistin mơ làng bol Tirơ;

⁸Asiri kung gơs dô bă bal mơ bol khai; Bol hơ̆ la tơwòr tê pràn kơldang kòn sau Lot dê. (Selah)

⁹Dan lơh di bol khai be Kơnràñ neh lơh di Midian, be di Sisera, mơ di Jabin tòm hiòng Kisôn,

¹⁰La cau kong tơnroh tòm Endôr, gơlik gơs phan pơnđồm ù.

¹¹Dan lơh ală cau ryŭ ryơm bol khai dê gơlik gơs be Ôrep mơ Jeep; Dan lơh jơh ală kwang dờng bol khai dê gơlik gơs be Jeba mơ Jalmuna,

¹²La cau neh đơs lah: “Bol he tòmpìt ai lă he in Ală tiah Yàng Tom Trồ dê.”

¹³Ơ Yàng Tom Trồ añ jê, dan lơh bol khai in gơlik gơs be kơmbuh ù gơtìp càl khồm pơrdô, Be nsiap par di đap càl.

¹⁴Be ồs sa pơrguc dơr brê, Lơmpiat ồs sa mơnơm be lơi,

¹⁵Gen dan Yàng ai càl rbut Kơnràñ dê ting jat bol khai Mơ ngui càl rbut dờng Yàng dê lơh bol khai in rngòt rngơt behơ̆ sơl.

¹⁶Ơ Yàng Jehôwa, dan lơh ƀàssìl mat bol khai dê Nàng bol khai in jòi jat sơnđan Kơnràñ dê.

¹⁷Dan lòi bol khai kòl ƀàssìl mơ dơrcul rngòt sùm sùm; Dan lòi bol khai kong sền òsơp mơ roh rui.

¹⁸Dan lòi bol khai in git lah mìng dô nă Yàng, La Bơtau Hơđang Rlau Jơh tòm plai ù, Sơnđan Kơnràñ la Yàng Jehôwa.