Read koho Đơs Crih 86 Bible Online

Đơs Crih 86 - koho bible

Đơs Crih 86

¹Jơnau hòi dan Dabit cih Ơ Yàng Jehôwa, dan wèt tồr iat mơ ho wơl añ in, Bơh añ rƀah lơòi mơ siơ̆u siar.

²Dan sền gàr bơta kis añ jê, bơh añ la cau dòn song di Kơnràñ; Ơ Yàng Tom Trồ añ jê! Dan dong klàs cau duh broă Kơnràñ dê la cau dòn kơnòm di Kơnràñ.

³Ơ Yàng! Kơnràñ la Yàng Tom Trồ añ jê, Dan ai añ in bơta nđàc, bơh jơh ngai mho añ hòi dan mơ Yàng.

⁴Dan lơh chò hòp hwềng soàn cau duh broă Yàng dê, Ơ Yàng Jehôwa, bơh hwềng soàn añ guh tus hơ Yàng tòm bơta hòi dan,

⁵Ơ Yàng, Yàng gơs nùs niam mơ toh glài, Gơs nùs kòñ gơboh kơ̆ dơn tơngkah tơngkañ gơwèt mơ ală cau hòi dan mơ Yàng.

⁶Ơ Yàng Jehôwa, dan ai tồr iat jơnau hòi dan añ jê, Dan kơno jơnau rac dan añ jê.

⁷Tòm ngai añ tìp bòl glar añ hòi dan mơ Yàng, Bơh Yàng ho wơl añ in.

⁸Ơ Yàng, digùl ală yàng ò gơs yàng lơi ndròm be Kơnràñ, Kung ò gơs broă lơi ndròm be ală broă Yàng dê.

⁹Ơ Yàng, jơh ală làng bol mơ Yàng neh crơng gơs Rơp lòt tus cùn khoai di đap Yàng, mơ jòng ro sơnđan Kơnràñ.

¹⁰Bơh Yàng la dờng ngan, lơh ală broă crih crài; Mìng dô nă Yàng lơm la Yàng Tom Trồ.

¹¹Ơ Yàng Jehôwa, dan bơto añ in git gùng dà Kơnràñ dê, Nàng añ rơp lòt jat jơnau song Kơnràñ dê; Dan lơh añ in gơs nùs song ngan nàng duh rngòt di sơnđan Kơnràñ.

¹²Ơ Yàng la Yàng Tom Trồ añ jê, añ jơh nùs ưnngài Yàng, Mơ añ rơp jòng ro sơnđan Yàng sùm sùm.

¹³Bơh bơta kòñ gơboh kơ̆ dơn Yàng dê gơwèt mơ añ la dờng ngan; Yàng neh dong tă hwềng soàn añ klàs bơh tiah jrô lơgar Làng ƀồc dê.

¹⁴Ơ Yàng Tom Trồ, ală cau pơnhừ să neh gơtơngguh sòdră di añ; Dô mpồl jàñ bơsak jòi bơta nàng tơnchơt añ, bol khai ò kơlôi sơnơng bơh Yàng.

¹⁵Mơya, ơ Yàng, Kơnràñ la Yàng Tom Trồ gơs nùs kòñ nđàc mơ ai bơta nđàc, Òbat gơjrañ, gơs bơta dòn song mơ bơta kòñ gơboh kơ̆ dơn tơngkah tơngkañ.

¹⁶Dan Yàng wèt sền añ mơ nđàc sơngit di añ; Dan ai bơta pràn kơldang Yàng dê cau duh broă Kơnràñ in, Mơ dong klàs kòn klau kòn ùr cau ùr duh broă Kơnràñ in.

¹⁷Dan Yàng ai añ in gŏ dô nơm tềl sơnio bơh bơta nđàc Kơnràñ dê; Tồ cau gơjrañ kơuềng di añ rơp gŏ tềl hơ̆ mơ kòl ƀàssìl; Ơ Yàng Jehôwa, tài bơh Yàng neh dong kòl mơ pơndòm pơniang añ.