Read koho Đơs Crih 88 Bible Online

Đơs Crih 88 - koho bible

Đơs Crih 88

¹Bơta đơs chò. Jơnau Đơs Crih kòn sau Kôra cih ai cau lam bồ đơs chò in ngui. Jat sap liah. Bơta bơto sồr Heman dê la cau Ejrahit Ơ Yàng Jehôwa, la Yàng Tom Trồ bơta dong klàs añ jê, tòm trồ mang añ rac dan di đap Yàng.

²Dan jơnau hòi dan añ jê geh tus di đap Yàng, Dan wèt tồr iat jơnau rac dan añ jê.

³Bơh hwềng soàn añ gơs bềng bơta bòl glar, Bơta kis añ tus rềp di lơgar Làng ƀồc.

⁴Añ gơkòl kơp tơmut tòm khà ală cau mù tòm bơtô ƀồc; Añ be cau ò gơs bơta dong kòl lơi.

⁵Añ ò gơkrơi be cau gơkòl sang lòi digùl cau chơt, Be ală cau kòl tơnchơt bic tòm bơtô ƀồc, Be ală cau Kơnràñ ò kah tai, Bơh bol khai neh kòl koh sang bơh di tê Yàng dê.

⁶Yàng neh ơn añ tòm tiah jrô bơtô ƀồc dê, Tòm tiah klam jơngo mơ jrô.

⁷Bơta gơjrañ dờng Yàng dê klơn kơnjơ̆ hơđang añ, Yàng bồr añ mơ ală ryà dà Yàng dê. (Selah)

⁸Yàng neh lơh ală cau mòng git añ pleh ngài di añ, Kơnràñ lơh añ in gơlik gơs dô nơm phan cù kìr bol khai in. Añ kòl krơ̆ ò rgơi lik klàs;

⁹Mat añ gơlik lu li tài bơh bơta moat jrùng. Ơ Yàng Jehôwa, kòp ngai añ hòi dan mơ Kơnràñ, Mơ pò tê wèt hơ Kơnràñ.

¹⁰Yàng lơh ală bơta krơi cau chơt in sơl ơ? Ală cau chơt guh nàng jòng ro Yàng sơl ơ?

¹¹Bơta kòñ gơboh kơ̆ dơn Yàng dê geh bơto yal tòm bơtô ƀồc sơl ơ? Hala bơta dòn song Yàng dê geh bơto yal tòm brong jrô hùt hung sơl ơ?

¹²Ală bơta krơi Yàng dê geh git tòm tiah klam jơngo sơl ơ? Hala bơta dong klàs Yàng dê geh git tòm lơgar kòl lòi hŭi sơl ơ?

¹³Ai añ, ơ Yàng Jehôwa, añ hòi dan mơ Kơnràñ; Gơ rơp rìng àng jơnau hòi dan añ jê tus di đap Kơnràñ.

¹⁴Ơ Yàng Jehôwa, ñchi bơh tài Kơnràñ sang lòi añ, Mơ pồn mat Kơnràñ bơh di añ taih?

¹⁵Añ gơkòl bòl glar mòr chơt bơh tòm tŭ gam kơnòm să; Añ kong jê sồt bơh bơta rngòt rngơt di Yàng, añ pal phi să añ.

¹⁶Bơta gơjrañ dờng Yàng dê neh pơs hơđang añ; Bơta sò tơm rngòt rngơt Yàng dê tơnroh añ.

¹⁷Bol khai gơrwàng gùt dar añ be dà kŏ jơh ngai mho, Bơh kòp đah bol khai ntềt hơđang añ.

¹⁸Yàng lơh ală cau bơyô añ mơ ală cau gơp ƀòn añ jê pleh ngài bơh di añ; Ală cau mòng git añ, bol khai ơm tòm tiah klam jơngo.