Read koho Đơs Crih 89 Bible Online

Đơs Crih 89 - koho bible

Đơs Crih 89

¹Bơta bơto sồr Ethan dê la cau Ejrahit Ơ Yàng Jehôwa, añ rơp đơs chò sùm sùm bơh bơta kòñ gơboh kơ̆ dơn Kơnràñ dê; Bơr añ rơp yal tơlik bơta dòn song Kơnràñ dê gơwèt mơ jơh ală rài.

²Bơh bơta kòñ gơboh kơ̆ dơn Kơnràñ dê neh geh bơtào gam sùm sùm, Bơta dòn song Kơnràñ dê la kơ̆ cê be ală tap trồ.

³Kơnràñ neh đơs lah: “Añ neh bơtào bơta ho bal mơ cau geh sac rwah Añ jê, Añ neh srat să tòmho mơ Dabit la cau duh broă Añ jê mơ lah:

⁴Añ rơp bơtào jơi bơtiàn mê dê jơl sùm sùm, Mơ bơt bơtào sơbàn mê dê jơl jơh ală rài.” (Selah)

⁵Ơ Yàng Jehôwa, lòi ală tap trồ jòng ro ală broă crih crài Kơnràñ dê, Mơ bơta dòn song Kơnràñ dê tòm mpồl jơnum ală cau sàng goh dê.

⁶Hơđang ală tap trồ, ñcau geh pơndròm bal mơ Yàng Jehôwa taih? Digùl ală cau hơđang trồ, ñcau geh ndròm be Yàng Jehôwa taih?

⁷Kơnràñ la Yàng Tom Trồ cau pal rngòt ngan tòm mpồl jơnum ală cau sàng goh dê, La Bơtau dờng mơ cau pal rngòt rngơt rlau mơ jơh ală cau ơm gùt dar Kơnràñ.

⁸Ơ Jehôwa Yàng Tom Trồ Gơnap Gơnoar Dờng Làm Jơh dê, ñcau gơs gơnap gơnoar ndròm be Yàng taih? Ơ Yàng Jehôwa, bơta dòn song Yàng dê ơm gùt dar Kơnràñ.

⁹Yàng at bồ bơta gơrơndul lơnggac dàlềng dê; Tòm tŭ ryà dà gơguh, gen Yàng lơh gơ in ring ngềt.

¹⁰Yàng neh lơh lề lac Rahap ò gơkrơi be dô nơm ƀồc ồm, Kơnràñ neh lơh gơprah gơpring ală cau sò tơm di Kơnràñ, mơ tơwòr tê gơnoar pràn Kơnràñ dê.

¹¹Ală tap trồ gơrê mơ Kơnràñ, plai ù kung gơrê mơ Kơnràñ; Yàng neh bơtào gơs dunnia mơ jơh ală phan tòm gơ.

¹²Đah đang mơ đah đơm kung bơh Yàng crơng gơs; Mơnơm Thabôr mơ mơnơm Hermôn jòng ro sơnđan Yàng dô bă hòn chò.

¹³Yàng gơs tơwòr tê gơnap gơnoar, Mpàng tê Yàng gơs pràn kơldang, mơ tê ma Kơnràñ la jơnhoa hơđang.

¹⁴Bơta song ring mơ bơta song ngan la mơnàng sơbàn Kơnràñ dê; Bơta kòñ gơboh kơ̆ dơn mơ bơta dòn song lòt di đap Yàng.

¹⁵Ơ Yàng Jehôwa, lơngai làng bol lơi in git jơnau driau dờng hòn chò, Mơ cơnđòa lòt tòm gùng bơta àng Yàng dê.

¹⁶Jơh ngai mho bol khai hòn chò bơh sơnđan Yàng, Mơ yal tơlik nàng jòng ro bơta song ring Kơnràñ dê.

¹⁷Bơh Yàng la bơta gơklŏ bơta pràn kơldang bol khai dê; Kơnòm di bơta nđàc Yàng dê, mơ gơnoar pràn bol hi dê geh yò tơngguh.

¹⁸Bơh khèl bol hi dê gơrê mơ Yàng Jehôwa. Cau bơtau bol hi dê gơrê mơ Bơtau sàng goh Israel dê.

¹⁹Tòm rài yau, tòm bơta gơtơnggŏ, gơs Yàng đơs mơ cau dòn song Kơnràñ dê lah: “Añ neh tơndau sơgơn bơtau hơđang dô nă cau gơs gơnoar pràn, Añ neh yò tơngguh dô nă cau geh sac rwah bơh digùl làng bol.

²⁰Añ neh jòi bàn Dabit la cau duh broă Añ jê, Mơ neh bong khai in mơ mơñà sàng goh Añ jê,

²¹Nàng tê Añ rơp dong kòl khai, Mơ tơwòr tê Añ kung rơp ò geh tơmù khai.

²²Cau sò tơm rơp ò pơrlồm khai, Mơ cau iơh bơsak kung rơp ò geh tơmù khai.

²³Añ rơp lơh lề lac cau sòdră di khai di đap khai, Mơ kung pòng lơh ală cau gơjrañ kơuềng di khai.

²⁴Bơta dòn song mơ bơta kòñ gơboh kơ̆ dơn Añ jê rơp ơm bal mơ khai, Tòm sơnđan Añ jê gơnoar pràn khai dê rơp geh yò tơngguh hơđang.

²⁵Añ rơp ơn tê khai dê hơđang dàlềng, Mơ tê ma khai dê hơđang ală hiòng,

²⁶Khai rơp hòi di Añ lah: ‘Yàng la Bèp Añ, La Yàng Tom Trồ Añ, mơ la pơnai lŭ bơta dong klàs Añ jê.’

²⁷Mơ Añ rơp lơh khai in gơlik gơs kòn tơnhoa Añ jê, Gơlik gơs bơtau hơđang rlau jơh mơ ală cau bơtau tòm plai ù.

²⁸Añ rơp prap lòi khai in bơta kòñ gơboh kơ̆ dơn Añ jê jơl sùm sùm, Bơta ho bal Añ jê rơp geh bơtào kơ̆ cê khai in.

²⁹Añ rơp bơtào jơi bơtiàn khai dê gam sùm sùm, Mơ sơbàn khai dê gam jŏ jòng be ală tap trồ.

³⁰Dilah kòn sau khai dê sang lòi bơta boh lam Añ jê, Mơ ò lòt jat jơnau gơnoar sồr Añ jê,

³¹Dilah bol khai tòmdră mơ jơnau sồr Añ jê, Ò prap gàr ală bơta sồr lam Añ jê,

³²Gen Añ rơp ngui gai nàng lơh glài bol khai bơh bơta tìs glài bol khai dê. Mơ pù ơlih bol khai bơh bơta tồi glài iơh bơsak bol khai dê.

³³Mơya Añ rơp ò tă tơlik bơta kòñ gơboh kơ̆ dơn Añ jê bơh di khai, Kung ò sang lòi jơnau ho pơgon Añ jê gơwèt mơ khai.

³⁴Añ rơp ò tòmdră mơ bơta ho bal Añ jê, Kung ò tòmgơl jơnau neh lik bơh bơr Añ jê.

³⁵Añ neh ai bơta sàng goh Añ jê mơ srat să dô dơ̆ tơl rau; Añ rơp ò đơs blac mơ Dabit.

³⁶Jơi bơtiàn khai dê rơp gam gơs sùm sùm, Mơ sơbàn khai dê rơp gam jŏ jòng di đap Añ be mattơngai.

³⁷Sơbàn hơ̆ geh bơtào sùm sùm be mat kơnhai, Gơ rơp ơm kơ̆ cê tòm tŭ gam gơs ală tap trồ.” (Selah)

³⁸Mơya tŭ do Yàng neh sang lòi mơ ò bài dòp, Kơnràñ bềng nùs gơjrañ dờng tòmsò mơ cau kong bong mơñà Kơnràñ dê.

³⁹Yàng neh sang lòi bơta ho bal mơ cau duh broă Kơnràñ dê, Mơ neh lơh ƀơ̆ ƀơl sơgơn bơtau khai dê tòm kơmbuh ù.

⁴⁰Yàng neh tơnroh jơh ală dơrñang khai dê, Lơh tơrlah tơrlơm ală theng kơ̆ cê khai dê.

⁴¹Jơh ală cau lơi lòt gan gen tòmpìt sơmbrơt khai; Khai neh gơlik gơs bơta mơ cau gơp ƀòn khai dê sền òsơp.

⁴²Yàng neh yò tê ma cau sòdră di khai, Lơh hòn chò ală cau sò tơm di khai.

⁴³Ngan Yàng neh lơh mat đào khai dê ò sồt, Mơ ò dong khai ntào jai tòm tŭ tòmlơh.

⁴⁴Yàng neh tă tơlik gai gơnoar bơh di tê khai. Mơ sơrbì sơbàn khai dê tòm ù.

⁴⁵Yàng neh pơndut ală ngai tòm tŭ khai gam pơnu, Mơ lơh khai in kong bơta ƀàssìl ò git lơh. (Selah)

⁴⁶Ơ Yàng Jehôwa, gam nđò jŏ taih? Kơnràñ rơp pồn să sùm sùm sơl ơ? Bơta gơjrañ dờng Kơnràñ dê rơp sa be ồs jơl tus di tŭ lơi taih?

⁴⁷Ơ Yàng, dan kah wơl rài kis cau dê la liah kàr lơi, Mơ kah bơh tơnggume lơi mơ Yàng neh crơng gơs jơi kòn mơnus.

⁴⁸Ñcau la cau kis mơ rơp ò gŏ bơta chơt taih? Ñcau rgơi dong tă hwềng soàn he klàs di gơnoar lơgar Làng ƀồc taih? (Selah)

⁴⁹Ơ Yàng, ntềng đah bơta kòñ gơboh kơ̆ dơn Kơnràñ dê bơh tòm rài yau taih? La bơta mơ Yàng neh srat să tòmho mơ Dabit tòm bơta dòn song Kơnràñ dê.

⁵⁰Ơ Yàng Jehôwa, dan kah wơl mbe cau duh broă Yàng dê kong sền òsơp, Mbe añ kong tòm nùs bơta bơtat bơtròh bơh ală làng bol.

⁵¹Ơ Yàng Jehôwa, hơ̆ la bơta mơ ală cau sò tơm di Yàng Bol khai ngui nàng dơñŏ tơnhial mơ bơtat bơtròh ală cơnđòa cau kong bong mơñà Yàng dê.

⁵²Pal jòng ro Yàng Jehôwa jơl sùm sùm. Amen! Amen!