Read koho Đơs Crih 9 Bible Online

Đơs Crih 9 - koho bible

Đơs Crih 9

¹Jơnau Đơs Crih Dabit cih. Ai cau lam bồ đơs chò in ngui. Jat sap đơs chò “Mut Laben” Añ rơp jơh nùs ưnngài Yàng Jehôwa, Añ rơp yal tơlik jơh ală broă crih crài Kơnràñ dê.

²Añ rơp chò hòp hừh hơh tòm Kơnràñ, Ơ Bơtau Hơđang Rlau Jơh, añ rơp đơs chò jòng ro sơnđan Kơnràñ dê.

³Tòm tŭ cau sò tơm di añ ruc wơl, Gen bol khai gơtup pừ mơ roh rui di đap Kơnràñ.

⁴Bơh Kơnràñ neh dong tò gơnoar di pal añ jê, Kơnràñ nggui di sơbàn mơ cahrña dô bă song ring.

⁵Kơnràñ neh lah pơrhơng ală lơgar, tơnroh cau iơh bơsak, Kơnràñ neh jùt sang sơnđan bol khai jơl sùm sùm.

⁶Cau sò tơm neh tus di lồi dut mơ kong tơnroh ngềt ngơt gam sùm sùm, Yàng neh tuh tơlup ƀòn dờng bol khai dê, Tian gơs ală bơta kir yau bol khai dê kung neh gơkòl roh rui.

⁷Mơya Yàng Jehôwa nggui at bồ sùm sùm, Kơnràñ neh bơtào kơ̆ sơbàn Kơnràñ dê nàng cahrña.

⁸Kơnràñ ai bơta song ring nàng cahrña dunnia, Kơnràñ cahrña ală làng bol dô bă ring bal.

⁹Yàng Jehôwa lơh gơs theng kìng crŭ kơ̆ cê ală cau gơkòl rồn bơklơn in, dô nơm theng kìng crŭ kơ̆ cê tòm ală tŭ bòl glar.

¹⁰Cau lơi git sơnđan Kơnràñ gen dòn kơnòm di Kơnràñ, Ơ Yàng Jehôwa, bơh Kơnràñ ò sang lòi cau lơi jòi jat Kơnràñ.

¹¹Đơs chò jòng ro tĕ Yàng Jehôwa la Bơtau ơm tòm Siôn! Yal tơlik tĕ digùl ală làng bol ală broă Kơnràñ dê.

¹²Bơh Bơtau sal wơl mhàm kah tus di ală cau bòl glar, Kơnràñ ò hŭi jơnau hòi dan rac ròc bol khai dê.

¹³Ơ Yàng Jehôwa, dan kòñ nđàc di añ! Kơnràñ la Bơtau yò tơngguh añ lik klàs bơh mpồng bơta chơt, Dan sền di ală bơta bòl glar añ gơtìp tài bơh cau gơjrañ kơuềng di añ,

¹⁴Tồ añ rơp yal tơlik jơh ală bơta jòng ro Yàng, mơ di mpồng kòn ùr Siôn Añ rơp hòn chò tòm bơta Kơnràñ dong tă añ.

¹⁵Ală làng bol neh dùh tòm tơrlung bol khai tò. Jơng bol khai neh yar tòm dă bol khai pơt.

¹⁶Yàng Jehôwa neh yal tơlik să tòm Kơnràñ mơ lơh bơta cahrña; Cau iơh bơsak gơkòl kơt tòm broă tê he lơh. (Higaion. Selah)

¹⁷Cau iơh bơsak gơkòl tơlo dùh tòm lơgar làng ƀồc, Mơ jơh ală lơgar hŭi Yàng Tom Trồ kung behơ̆ sơl.

¹⁸Cau siơ̆u siar rơp ò gơkòl lòi hŭi sùm ò, Mơ bơta gơn kơnòm cau rƀah dê rơp ò gơkòl roh rui sùm sùm.

¹⁹Ơ Yàng Jehôwa, dan guh, bañ lòi kòn mơnus pha rlau; Lòi ală làng bol gơkòl cahrña di đap Kơnràñ.

²⁰Ơ Yàng Jehôwa, dan lơh bol khai in rngòt rngơt! Lòi ală làng bol git he mìng la kòn mơnus lơm. (Selah)