Read koho Đơs Crih 91 Bible Online

Đơs Crih 91 - koho bible

Đơs Crih 91

¹Cau lơi kìng crŭ să he tòm Bơtau Hơđang Rlau Jơh, Mơ ơm sùm tòm tiah mƀur Bơtau Gơnap Gơnoar Làm Jơh dê,

²Gen Añ rơp đơs mơ Yàng Jehôwa lah: “Kơnràñ la tiah kìng crŭ mơ la theng kơ̆ cê añ jê, Kung la Yàng Tom Trồ añ jê, añ dòn kơnòm di Kơnràñ.”

³Bơh Kơnràñ rơp dong tă mê kung be cau dong tă sềm klàs bơh dă, Mơ dong tă mê klàs bơh pluh plàng chơt rung.

⁴Yàng rơp jơm gòm mê kung be iar me jơm gòm kòn tòm tiah đar gơ dê, Mơ tòm tiah đar Kơnràñ dê mê rơp kìng crŭ să he; Bơta dòn song Kơnràñ dê kung be khèl mơ phan đo mê dê.

⁵Mê rơp ò rngòt rngơt tòm trồ mang, Kung ò rngòt di kam par tòm trồ ngai,

⁶hala ò rngòt di pluh plàng gơtòp tòm klam jơngo, kung ò rngòt di bơta chơt roh tòm tŭ gùl ngai.

⁷Rơp gơs dô rbô nă cau gơpừ chơt di gah mê, Hala dô tơlak nă cau chơt di gah ma mê, Mơya bơta sơbơng roh hơ̆ rơp ò tus rềp di mê ò.

⁸Mê rơp mìng sền mơ mat, Mơ rơp gŏ bơta lơh glài di cau iơh bơsak.

⁹Tài bơh mê neh kìng crŭ să he tòm Yàng Jehôwa, Mơ neh ơm tòm Bơtau Hơđang Rlau Jơh,

¹⁰Gen tàng mê rơp ò kong bơta iơh lơi, Kung ò gơs cau lơi tòm hìu mê dê rơp kong bơta rung rài lơi.

¹¹Bơh Yàng rơp sồr ală cau gơnrơh Kơnràñ dê Sền gàr mê tòm jơh ală gùng dà mê dê.

¹²Bol khai rơp đo mê mơ mpàng tê bol khai dê, Rngòt mê gơjrŭ jơng di lŭ mòn!

¹³Mê rơp jă hơđang klìu triă mơ bơs tur; Mê rơp jă klìu triă brồ dam mơ bơs hơđơm mpàng jơng mê dê.

¹⁴Yàng Tom Trồ đơs lah: “Tài bơh khai kòñ gơboh đềt mềr dê Añ, gen tàng Añ rơp dong tă khai; Añ rơp sền gàr khai bơh khai git sơnđan Añ.

¹⁵Tòm tŭ khai hòi dan di Añ, gen Añ rơp dòp jơnau khai dê; Añ rơp ơm bal mơ khai tòm tŭ khai tìp bơta bòl glar, Añ rơp dong tă khai mơ lơh khai in geh jòng ro.

¹⁶Añ rơp ai khai in hừh nùs kis jŏ, Mơ ai khai in gŏ bơta dong klàs Añ jê.”