Read koho Đơs Crih 94 Bible Online

Đơs Crih 94 - koho bible

Đơs Crih 94

¹Ơ Yàng Jehôwa la Yàng Tom Trồ, bơta sal tê gơrê mơ Kơnràñ, Ơ Yàng Tom Trồ, bơta sal tê gơrê mơ Kơnràñ, dan tơlik mat Kơnràñ dê.

²Ơ Bơtau cahrña plai ù, dan guh, dan sal wơl di cau pơnhừ să bơta di pal bol khai in.

³Ơ Yàng Jehôwa, cau iơh bơsak rơp gam nđò jŏ taih? Cau iơh bơsak rơp geh hòn chò tus di tŭ lơi taih?

⁴Bol khai đơs oă jơnau pơnhừ să, Jơh ală cau lơh iơh bơsak jòng is să he.

⁵Ơ Yàng Jehôwa, bol khai jă lề lac làng bol Kơnràñ dê, Lơh bòl glar jê sồt di sre brê Kơnràñ dê.

⁶Bol khai tơnchơt cau ùr bơnrau mơ cau crih mat, Mơ tơnchơt ală cau kòn đòi.

⁷Bol khai đơs lah: “Yàng Jehôwa ò gŏ ò, Yàng Tom Trồ Jakôp dê ò dòp git bơh bơta hơ̆.”

⁸Ơ cau tùl gơla rlau jơh tòm làng bol, git wă tĕ! Ơ cau bơrngơl gơla, tŭ lơi sồng bol mê gơlik jak chài taih?

⁹Bơtau neh lơh gơs tồr gen Kơnràñ ò rgơi iat sơl ơ? Bơtau neh lơh gơs gar mat gen Kơnràñ ò rgơi gŏ sơl ơ?

¹⁰Bơtau lơh glài tơmàl ală làng bol, gen Kơnràñ ò lơh glài sơl ơ? Kơnràñ la Bơtau bơto bơta git jak kòn mơnus in.

¹¹Yàng Jehôwa git ală bơta kơlôi sơnơng kòn mơnus dê, bol khai gơs mơya ò gơs nhơm tă.

¹²Ơ Yàng Jehôwa, lơngai cau lơi in geh Kơnràñ lơh glài tơmàl, Mơ geh Kơnràñ bơto bơta boh lam Kơnràñ dê.

¹³Nàng ai cau hơ̆ in geh dơh wơl bơh ală ngai bòl glar, Jơl tus di tŭ trồm neh tò sir cau iơh bơsak in.

¹⁴Bơh Yàng Jehôwa rơp ò sang lòi làng bol Kơnràñ dê, Kung ò sang sre brê Kơnràñ dê sơl.

¹⁵Bơh bơta cahrña song ring rơp jat bơta song ring, Jơh ală cau gơs nùs song ngan gen rơp lơh jat bơta hơ̆.

¹⁶Ñcau bơh añ mơ guh tòmdră di cau iơh bơsak taih? Ñcau bơh añ ñă ntào tòmdră mơ cau lơh bơta iơh bơsak taih?

¹⁷Dilah Yàng Jehôwa neh ò dong kòl añ, Gen hwềng soàn añ neh ơm mo tòm tiah ngềt ngơt rau.

¹⁸Ơ Yàng Jehôwa, tòm tŭ añ kơlôi sơnơng lah: “Jơng añ gơcồt,” Gen bơta kòñ gơboh kơ̆ dơn Kơnràñ dê yò đo añ.

¹⁹Tòm tŭ gơs oă bơta kơlôi rcang tòm nùs añ jê, Gen bơta pơndòm pơniang Kơnràñ dê lơh chò hòp hwềng soàn añ.

²⁰Ală cau at bồ iơh bơsak, la cau ai bơta boh lam nàng lơh gơs bơta iơh rmơh, Bol khai rgơi gơs dô bă bal mơ Kơnràñ sơl?

²¹Bol khai gơs dô bă bal tòmsò di bơta kis cau song ring dê, Mơ lơh nền glài chơt di cau ò gơs glài.

²²Mơya Yàng Jehôwa neh gơlik gơs be theng kơ̆ cê añ jê; Yàng Tom Trồ añ jê la pơnai lŭ kìng crŭ añ jê.

²³Kơnràñ rơp tơm wơl bol khai in bơh bơta tồi glài iơh bơsak bol khai dê, Mơ pơs tơlik bol khai bơh bơta iơh bơsak bol khai dê; Jehôwa Yàng Tom Trồ bol he dê rơp pơs tơlik bol khai.