Read koho Jơnau Pơnđik 13 Bible Online

Jơnau Pơnđik 13 - koho bible

Jơnau Pơnđik 13

¹Kòn jak chài iat jơnau bơto sồr bèp dê; Mơya cau bơrsèl tơnhial ò iat jơnau lah pơrhơng.

²Kơnòm plai đo bơr sơndồi bol khai dê, cau lơbơn niam dòp geh bơta niam; Mơya bơta hàm kòñ cau pơrlơ̆ dră la bơta rhung rhang.

³Cau kơrmap gàr bơr he, geh prap gàr bơta kis he; Mơya cau lơi pò sơndồi he oă, gen kong roh gơprah.

⁴Nùs cau lơh alah kơp kòñ mơ ò geh phan lơi; Ai nùs cau tơryang tơryồng geh lìu làc phan ngui sa.

⁵Cau song ring gơjrañ bơta lac lèo; Mơya cau iơh rmơh pal cù kìr mơ kong ƀàssìl ƀàsso.

⁶Bơta song ring sền gàr gùng dà cau lơh lòt song ngan; Mơya tồi glài tuh tơlup cau iơh bơsak.

⁷Gơs cau lơh be pas, mơya ò gơs phan lơi; Kung gơs cau lơh be rƀah, mơya gơs phan mơna oă.

⁸Khà priă tơwài bơta kis kòn mơnus dê hơ̆ la phan mơna he; Ai cau rƀah ò tŭ lơi kơno jơnau đơs pơhìn.

⁹Bơta àng cau song ring dê la hòn chò; Mơya đèng cau iơh kòl lơh tơnchơt.

¹⁰Bơta pơnhừ să tơnggơs bơta tòm pơndang bal; Ai bơta jak chài ơm mơ cau dòp jơnau bơto tơngkah.

¹¹Phan mơna ò di pal ngan pal kong roh gơcoh; Ai cau lơi kư̆ dòñ prap rơp geh bơtơl oă.

¹²Bơta kơp gơn òbat nyà lơh nùs jê sồt; Mơya tŭ bơta kơp kòñ geh tơl rau la dô nơm chi bơta kis.

¹³Cau lơi sền òsơp jơnau bơto sồr, cèng bơta roh gơprah bol khai in; Ai cau lơi duh rngòt bơta boh lam, gen geh phan ƀàn.

¹⁴Bơta bơto sồr cau jak chài dê ngan la dô nơm croh dà bơta kis dê, Nàng lơh cau in pleh di dă bơta chơt.

¹⁵Bơta àng loh ngan geh bơta nđàc; Mơya gùng lòt cau ò dòn song la bơta roh rui bol khai in.

¹⁶Cau chài rgơi lơh broă kư̆ jat bơta git wă; Mơya cau tùl gơla ràng tơlik bơta bơrngơl he dê.

¹⁷Cau kong sồr iơh cèng bơta rung rài; Ai cau kong sồr dòn song cèng bơta sơmbòi.

¹⁸Cau lơi pơndang sang bơta bơto tơngkah rơp kong rƀah rƀừp mơ ƀàssìl ƀàsso; Mơya cau lơi dòp prap jơnau lah pơrhơng geh jòng màng.

¹⁹Bơta kơp kòñ geh gơlik gơs lơh lơngồt bơkah hwềng soàn in; Mơya pleh ngài bơta iơh, la bơta cù kìr cau tùl gơla in.

²⁰Gơtòmklac mơ cau jak chài, gơlik gơs jak chài; Mơya lơh yô mơ cau tùl gơla rơp kong roh gơprah.

²¹Bơta rung rài ting jat cau gơs glài; Ai bơta lơngai lơngò la phan ƀàn cau song ring dê.

²²Cau niam lòi wơl sre brê kòn sau he in; Mơya phan mơna cau gơs glài lòi wơl cau song ring in.

²³Ƀlàng sre cau rƀah tơnggơs oă phan sa; Mơya gơkòl cèng pơrdô tài bơh siơ̆u bơta song ring;

²⁴Cau lơi ò bài ngui gai mơng gơjrañ di kòn klau he; Mơya cau lơi kòñ gơboh kòn gen pal mhar lơh tơmàl khai.

²⁵Cau song ring geh sa hòm tơl phan bơkah; Ai klung cau iơh ơm jơgloh.